އަވަސްވެ ތެޅި ނުގަނެ، ވެރިކަން ލިބެންދެން ކެތްތެރިވުމަށް، އިދިކޮޅު އެމްޑީޕީއަށް ނަސޭހަތްތެރިވާ ކަމަށް ޖުމްހޫރީ ޕާޓީ (ޖޭޕީ)ގެ ލީޑަރު ޤާސިމް އިބްރާހީމް ވިދާޅުވެއްޖެއެވެ. ނިޝާން ޢިއްޒުއްދީން ޢިއްޒަތުގެ ވެރިޔާ، ޤާސިމް އިބްރާހިމް މިފަދައިން ވިދާޅުވެފައިވަނީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މާމިގިލީގެ ރައްޔިތުންނާ ބައްދަލުކުރެއްވުމަށް ބޭއްވި ޖަލްސާގައި ވާހަކަފުޅުދައްކަވަމުންނެވެ.
އދ. އަތޮޅުގެ ރަށްތަކަށް ރައީސް ޑރ. މުޙައްމަދު މުޢިއްޒު ކުރައްވަމުންގެންދަވާ ދަތުރުފުޅުގެ ތެރެއިން އދ. މާމިގިލީގައި މިރޭ ބޭއްވި ޖަލްސާގައި ވާހަކަދައްކަވަމުން، މާމިގިލީ ދާއިރާގެ މެންބަރު ޤާސިމް ވިދާޅުވީ މިދިޔަ ހުކުރު ދުވަހުގެރޭ އެމްޑީޕީން މުޒާހަރާ ބޭއްވީ ޤާނޫނާ ޚިލާފަށް ކަމަށެވެ. އަދި ޤާނޫނުއަސާސީގައި އެއްވެ އުޅުމުގެ މިނިވަންކަން ދީފައި އޮންނަނީ އުސޫލުތަކެއްގެ މަތިން ކަމަށް ފާހަގަކުރެއްވިއެވެ.
“އެއާ ޚިލާފު ނުވޭތޯ އެމީހުން. އަޅުގަނޑު ބަޔަކާއެކު ޓީވީ ބަލަން އިނދެ، ބުނިން މިހާރު އެމީހުން ޤާނޫނާ ޚިލާފުވީއޭ. މިހާރު ފުލުހުން އިންޒާރުދީފައި ޤާނޫނާ ޚިލާފުވީ ކަމާއި، ބާރުގެ ބޭނުން ޤާނޫނުގައިވާ ގޮތުގެ މަތިން ހިފަން ޖެހޭނެ ކަމަށް އިޢުލާންކޮށްފައި އެކަން ކުރަން. އެހެންވީމާ ޤާނޫނުން ބޭރުވީ، ޤާނޫނުއަސާސީގެ އިމުން ބޭރުވީ،” ޤާސިމް ވިދާޅުވިއެވެ.
ޤާސިމް ވިދާޅުވީ އިސްލާމްދީނުގައި ފިތުނަފަސާދަ އުފައްދަން އަންގަވާފައެއް ނުވާ ކަމަށާއި ފިތުނަވެރިކަން އުފެއްދުމަކީ އިސްލާމްދީނުގެ ނަޒަރިއްޔާތުން ބަލާއިރުވެސް، ކިހާވަރެއްގެ ކަމެއްކަން ގިނަ ބަޔަކަށް އެނގޭނެ ކަމަށެވެ.
“އެތަނަށް އައިސް ތިބީ ކޮން ބައެއްތޯ. ކޮންމެވެސް ވަޒީފާއެއް ބޭނުންވެގެން ތިބި މީހުން. އެމީހުންނަށް ވެސް މާތްﷲ އިރާދަކުރައްވާ ވަގުތު އައިސް ޖެހުނީމަ ވަޒީފާގެ ކަންތައްތައް ވެސް ލިބޭނެ، ބާރުވެރިކަން ވެސް ލިބޭނެ، ވެރިކަން ވެސް ލިބޭނެ. ކޮން ކަމަކާތޯ އަވަސްވެ، މި ތެޅި ގަންނަނީ. ﷲ އަންގަވާފައިވަނީ ކެތްތެރިވާން،” ޤާސިމް ވިދާޅުވިއެވެ.
ޤާސިމް އިބްރާހިމްގެ ވާހަކަފުޅުގައި ވަނީ ރައީސް މުޢިއްޒު ވެރިކަމާ ހަވާލުވެވަޑައިގެންނެވިއިރު ޤައުމުގެ އިޤްތިޞާދު އޮތް ހީނަރު ހާލަތާއި، އެ ހާލަތުން އަރައިގަތުމަށް ސަރުކާރުން ކުރެއްވި މަސައްކަތްތަކަށް އަލިއަޅުވާލައްވާފައެވެ. އެގޮތުން ރައީސް މުޢިއްޒު ވެރިކަމާ ހަވާލުވެވަޑައިގެންނެވިއިރު 132 ބިލިޔަން ރުފިޔާއަށް ދައުލަތުގެ ދަރަނި އަރާފައިވާކަން ފާހަގަކުރައްވައި، އެ ދަރަނިތައް ދެއްކެވުމަށާއި ޤައުމު ބަނގުރޫޓުވިޔަ ނުދިނުމަށް ރައީސް މުޢިއްޒު ކުރެއްވި މަސައްކަތްތަކަކީ ތައުރީފް ހައްޤު މަސައްކަތްތަކެއް ކަމުގައި ވިދާޅުވިއެވެ.
“މަނިކުފާނު އެއްވެސް މީހަކާ ދިމާއަށް ކުޑައިމީސް ބަހެއް ވިދާޅުވި ބަހެއް އަޅުގަނޑު ނާހަން. އެއްވެސް ސިޔާސީ މީހަކު ދަމާފައި ގެންގޮސް ޖަލަށްލީތަނެއް އަޅުގަނޑު ނުދެކެން. ސުޕްރީމް ކޯޓުގައި ތަޅުއެޅުވިތަނެއް ވެސް ނުދެކެން،” ޤާސިމް ވިދާޅުވިއެވެ.
އަދި “މި ޤައުމު ހަލާކުގެ ތެރެއަށް ވައްޓާލަން ފިތުނަ ފަސާދަ އުފައްދަން ދައްކާ އެއްވެސް ވާހަކައަށް ތިބޭފުޅުން އެއްގޮތަކަށްވެސް ޖަވާބު ނުދެއްވާށޭ” ވިދާޅުވެ، އިދިކޮޅު ފަރާތްތަކުން ދައްކަމުންދާ ޙަޤީގަތާ ޚިލާފު ވާހަކަތައް ޤަބޫލުނުކުރުމަށް ރައްޔިތުންނަށް ގޮވާލެއްވިއެވެ.
ޤާސިމް އިބްރާހިމް ވަނީ ރައީސް މުޢިއްޒަކީ ވޯޓު ހޯދުމުގެ ނިޔަތުގައި އިތުރުފުޅު ނުހައްދަވާނެ ބޭފުޅެއްކަމަށާއި، ޤައުމުގެ މާލީ ހާލަތު ތަންދޭ މިންވަރަކުން ރާއްޖޭގެ ތަރައްޤީއަށް އެކި މަޝްރޫޢުތައް ކުރިއަށްގެންދަވާކަންވެސް ފާހަގަކުރައްވާފައެވެ.