އދ. ހަންޏާމީދޫ ކައިރީގައި އޮތް އުތުރުއަތަފަރަކީ އެރަށުގެ ބައެއްގެ ގޮތުގައި ހަމަޖައްސަވައިދެއްވައި އެތަން ތަރައްޤީކުރުމަށް އެހީތެރިކަން ފޯރުކޮށްދެއްވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިދަފައިން ވިދާޅުވީ އދ. އަތޮޅަށް ފަށްޓަވާފައިވާ ތިން ދުވަހުގެ ދަތުރުފުޅުގެ ތެރެއިން އެއަތޮޅު ހަންޏާމީދޫއަށް ވަޑައިގެން ބޭއްވެވި ޖަލްސާއެއްގައި ރައްޔިތުންނާ ވާހަކަ ދައްކަވަމުންނެވެ.
ރައީސް ވިދާޅުވީ ހަންޏާމީދޫއަކީވެސް ލޯކަލް ޓޫރިޒަމް ފުޅާވަމުންދާ ރަށެއްކަން ފާހަގަކުރައްވަމުން ރައީސް ވަނީ ރަށުގެ ތަރައްޤީއަށް ބޭނުންވާ އިތުރު ކަންކަންވެސް ފަހިކޮށްދިނުމަށް ސަރުކާރުން އިސްކަންދެއްވާކަމަށެވެ. އެގޮތުން ހަންޏާމީދޫ ކައިރީގައި އޮތް އުތުރުއަތަފަރު އެރަށުގެ ބައެއްގެ ގޮތުގައި ހިމެނުމަށް ނިންމަވާފައިވާކަން ރައީސް ހާމަކުރެއްވިއެވެ.
“އުތުރުއަތަފަރު މިރަށުގެ ބައެއްގެ ގޮތުގައި ކަނޑައަޅައި އެކަމުގެ ޤަރާރު ވަރަށް އަވަހަށް ނެރޭނަން. އަދި އެތަން އިތުރަށް ތަރައްޤީކުރުމަށް ބޭނުންވާ އެހީތެރިކަން ސަރުކާރުން ފޯރުކޮށްދޭނަން.” ރައީސް ވިދާޅުވިއެވެ.
އެ އަތޮޅުގައި ފަތުރުވެރިން ގޮވައިގެން ދާނެތަންތަން މަދުކަން ފާހަގަކުރައްވަމުން ރައީސް ވަނީ ފަތުރުވެރިން ދަތުރުދާނެ ރަށެއްގެ ގޮތުގައި އަލިކޮއިރަށް އެކަމަށް ޚާއްސަ ރަށެއްގެގޮތުގައި މިހާރު ކަނޑައަޅުއްވާފައިވާކަމަށްވެސް ރައީސް ވަނީ ވިދާޅުވެފައެވެ.