އދ. އަތޮޅުގެ މާފަރުފަޅު އަރބަން ސެންޓަރެއްގެ ގޮތުގައި ތަރައްޤީކުރުމަށް ފަށާފައިވާ މަޝްރޫޢުގެ ތެރެއިން ބިން ހިއްކުމުގެ މަސައްކަތް ކުރިއަށްއޮތް 10 މަސް ދުވަހުގެ ތެރޭގައި ނިންމާ މަހިބަދޫ ރައްޔިތުންނާ ހަވާލުކުރެވޭނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
އދ. އަތޮޅު ތަޢުލީމީ މަރުކަޒުގެ ހޯލުގައި މިރޭ ބޭއްވުނު ބައްދަލުވުމުގައި ވާހަކަފުޅު ދައްކަވަމުން ރައީސް މުޢިއްޒު ވިދާޅުވީ، ރިޔާސީ ކެމްޕޭންގައި މަހިބަދޫގެ ތަރައްޤީއަށް ވެވަޑައިގެންނެވި ވަޢުދުތައް ފުއްދުމަށް މަސައްކަތް ކުރައްވަމުން ގެންދަވާ ކަމަށެވެ.
“އަޅުގަނޑު ދެއްވާނެ ޔަޤީންކަމަކީ މި މަސައްކަތް ނުހުއްޓި ކުރިއަށްދާނެކަން. މިއަދު މި ފެށީ ބިން ހިއްކުމަށް ބޭނުންވާ ބަންޑުވޯލް ޖެހުން. 2 މަސްތެރޭ އެމަސައްކަތް ނިމޭނެ، އެއަށްފަހު ވެލި އެޅުމާއި ބިން ހިއްކުމުގެ މަސައްކަތް މިއަދުން ފެށިގެން ގިނަވެގެން 10 މަސް ދުވަހުގެ ތެރޭގައި 67 ހެކްޓަރުގެ ބިން ހިއްކާ ނިންމާ ރައްޔިތުންނާ ޙަވާލުކުރެވޭނެ،” ރައީސް ވިދާޅުވިއެވެ.
މީގެއިތުރުން ރައީސް އިޢުލާންކުރެއްވި ކަންތައްތަކުގެ ތެރޭގައި، އަންނަ އަހަރުގެ ބަޖެޓުގައި މަހިބަދޫގައި 150 ހައުސިންގ ޔުނިޓު އެޅުމުގެ މަޝްރޫޢު ހިމެނޭކަމަށާއި، 50 އެނދުގެ ހޮސްޕިޓަލެއް ތަރައްޤީކުރުމުގެ މަސައްކަތްވެސް އަންނަ އަހަރުގެ ކުރީކޮޅު ފެށިގެންދާނެ ކަމަށް ވިދާޅުވިއެވެ.
ރައީސް ވިދާޅުވިގޮތުގައި މާފަރުފަޅު އަރބަން ސެންޓަރަކީ މަހިބަދޫގެ އިތުރުން މުޅި އަތޮޅަށްވެސް ދެމެހެއްޓެނިވި ގޮތެއްގައި ތަރައްޤީ ގެނެސްދޭނެ މުހިންމު ހަބަކަށް ވެގެންދާނެއެވެ. އަދި މި މަޝްރޫޢުއަށް ސަރުކާރުން ވަރަށް ބޮޑު އިސްކަމެއް ދެއްވާނެކަމަށްވެސް އެމަނިކުފާނު ވިދާޅުވިއެވެ.