އައްޑޫ ކައުންސިލް އޮންނަ ގޮތް ބަދަލުކުރުމާ ބެހޭ ގޮތުން މި މަހުގެ 25 ވަނަ ދުވަހު ނެގުމަށް ހަމަޖެހިފައިވާ ރައްޔިތުންގެ ހިޔާލު ހޯދުމުގެ އާންމު ވޯޓާ ގުޅިގެން ހުށަހެޅޭ ޝަކުވާތައް ބަލައިގަތުމުގެ އިންތިޒާމު އިލެކްޝަންސް ކޮމިޝަނުން ވަނީ ހަމަޖައްސާފައެވެ.
އިލެކްޝަންސް ކޮމިޝަނުން މިއަދު ނެރުނު އިއުލާނެއްގައި ބުނެފައިވާ ގޮތުގައި، ވޯޓު ނެގުމާ ގުޅޭ އެއްވެސް ޝަކުވާއެއް ހުށަހަޅަން ބޭނުންވާނަމަ، އެ ޝަކުވާއެއް ހުށަހަޅަންވާނީ ކޮމިޝަނުން ކަނޑައަޅާފައިވާ “ޝަކުވާ/މައްސަލަ ހުށަހަޅާ ފޯމު” މެދުވެރިކޮށެވެ. މި ފޯމު ކޮމިޝަނުގެ ވެބްސައިޓް www.elections.gov.mv އިން ލިބެން ހުންނާނެއެވެ.
ޝަކުވާތައް ބަލައިގަންނާނީ އީމެއިލް މެދުވެރިކޮށް ކަމަށާއި، ފޯމު ފޮނުވަންވާނީ ކޮމިޝަނުގެ ރަސްމީ އީމެއިލް އެޑްރެސް info@elections.gov.mv އަށް ކަމަށް ކޮމިޝަނުން ވަނީ އަންގާފައެވެ. އަދި ވޯޓު ނަގާ ދުވަހު، ވޯޓުލާ މަރުކަޒުތަކުގައި ދިމާވާ މައްސަލަތައް ސީދާ ވޯޓު ފޮށީގެ ވެރިޔާއަށް ހުށަހެޅުމުގެ އިންތިޒާމުވެސް ހަމަޖެހިފައިވާ ކަމަށް ކޮމިޝަނުން ބުނެފައިވެއެވެ.
އައްޑޫ ސިޓީގައި މި ވޯޓު ނެގުމަށް ހަމަޖެހިފައިވަނީ ހެނދުނު 8:00 އިން ހަވީރު 4:00 އަށެވެ. އަދި ވޯޓު ނަގައި ނިމޭތާ 30 މިނެޓު ފަހުން ވޯޓު ގުނަން ފަށާނެ ކަމަށާއި، ރަސްމީ ނަތީޖާ އިއުލާން ކުރާނީ އާދިއްތަ ދުވަހު ކަމަށް ކޮމިޝަނުން ވަނީ ހާމަކޮށްފައެވެ.
މި ވޯޓަކީ އައްޑޫ ފޭދޫ، އައްޑޫ ހުޅުދޫ އަދި އައްޑޫ މީދޫގެ ނަމުގައި ވަކިވަކި ކައުންސިލްތައް އުފައްދަން ފެނޭތޯ ބެލުމަށާއި، ހުޅުދޫ އާއި މީދޫ އެއް ކައުންސިލެއްގެ (އައްޑޫ ހުޅުމީދޫ ކައުންސިލް) ދަށުން ހިންގުމަށް ފެނޭތޯ ބެލުމަށް ނަގާ ވޯޓެކެވެ. މި ވޯޓުގެ ނަތީޖާއާ ގުޅިގެން އައްޑޫ ސިޓީގެ ރަށްރަށުގެ އިޚްތިޞާޞަށް އަންނާނެ ބަދަލުތައް ދެނެގަތުމުގެ މަސައްކަތް ކުރިއަށް ގެންދިއުމަށް ސަރުކާރުން ވަނީ ނިންމާފައެވެ.