ރައްޔިތުންގެ މަޖިލީހަށް މެންބަރުން ވަޑައިގަންނަވާއިރު ޓައި އެޅުން މަޖުބޫރު ނުވާ އިސްލާހު މަޖިލީހުގެ ގަވާއިދުގައި ހިމަނަން ފާސްކޮށްފިއެވެ.
މަޖިލީހުގެ ރައީސް އަބްދުއްރަހީމް އަބްދުﷲ، ހުށަހެޅުއްވި ހުށަހެޅުއްވުމަކާ ގުޅިގެން މަޖިލީހުގެ މެންބަރުން ހެދުން އަޅުއްވަންވީ ގޮތުގެ އުސޫލު، މަޖިލީހުގެ ގަވައިދުގެ ޖަދުވަލެއްގެ ގޮތުގައި ހިމެނުމަށް އާއްމު ކޮމިޓީން އިއްޔެ ވަނީ ފާސްކޮށްފައެވެ.
އެގޮތުން އެ އުސޫލުގައި ރަސްމީ ހެދުމުގެ ގޮތުގައި ކަނޑައަޅާފައި އޮތީ ހަތަރު ބާވަތެއްގެ ހެދުމެކެވެ. އޭގެ ތެރޭގައި ހިމެނެނީ ކޯޓުފަޓުލޫނާއި، ގައުމީހެދުން/ ދިވެހި ސަގާފީހެދުން، ގަމީހާއި ޓައީ އާއި ފަޓުލޫނު، އަދި ދިވެހިރާއްޖޭގައި ހެދުން އެޅުމުގެ އާއްމު އަދަބާ ހިލާފު ނުވާ ގޮތަށް ހުންނަ ރަސްމީ ހެދުމެވެ.
މެންބަރުން މަޖިލީހަށް ވަޑައިގަންނަވާއިރު އެޅުން ހުއްދަނޫން ހަތް ބާވަތެއްގެ ހެދުމެއް ވެސް އެ އުސޫލުގައި ފާހަގަކޮށްފައެވެ. އެއީ ހަންގަނޑު ފާޅުވާ ފަދަ ތުނި ހެދުމާއި ވަކި ޖަމާއަތަކަށް ނުވަތަ ވަކި ކަމަކަށް ނިސްބަތްވާ ބެޖެއް ނުވަތަ ނިޝާނެއް ޖަހާފައި ހުންނަ ހެދުމާއި އަހުލާގީ ގޮތުން އެކަށީގެންނުވާ ހުތުރު ބަސް، އިބާރާތް، ކުރެހުން، ކާޓޫނު، ފޮޓޯ ޖަހާފައި ހުންނަ ހެދުމެވެ.
ޖީންސާއި ގިނަ ޖީބުލާފައި ހުންނަ ކުރު އަދި ދިގު ހަރުވާޅާއި ޓީޝާޓް ނުވަތަ ޓީޝާޓް ފޮތިން ފަހާފައި ހުންނަ ހެދުމާއި ފެންފައިވާނާއި ޓެނިސް އަދި ޖޮގިން ޝޫޒްއަށް އެރުން ވަނީ މަނާކޮށްފައެވެ.
އެ އުސޫލުތަކުން ބަޔާންވާ ގޮތުގައި ޓައިނާޅާ މަޖިލީހަށް ހާޒިރު ވިޔަސް އެއީ ރާއްޖޭގެ އާއްމު އަދަބާ ހިލާފު ނުވާ ގޮތަށް ހުންނަ ރަސްމީ ހެދުން ކަމަށްވާނަމަ ގަވައިދާ ހިލާފެއްނުވާނެއެވެ.