އާރްޓީއެލް ސްމާޓްކާޑުގެ ނަމުގައި ފޮނުވާ އެއްވެސް ލިންކަކަށް ނުވަނުމަށާއި އެއީ ސްކޭމެއް ކަމުގައި މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގް ކޮމްޕެނީ (އެމްޓީސީސީ) އިން ރައްޔިތުންނަށް ނަސޭހަތްތެރިވެއްޖެއެވެ.
އެމްޓީސީސީން އިއްޔެ “އެކްސް” ގައި ކުރި ޕޯސްޓެއްގައި ބުނެފައިވަނީ އެމްޓީސީސީ ނުވަތަ އާރްޓީއެލްގެ ނަމުގައި ފޮނުވާ މެސެޖުތަކާއި ލިންކުތަކަށް ސަމާލުވެ، ފޭކް ޕޭޖް ނަންބަރުތަކުން ފޮނުވާ އެއްވެސް ލިންކަކަށް ނުފިތުމަށާއި އެއްވެސް ފައިސާގެ މުއާމަލާތެއް ނުކުރުމަށެވެ. އަދި ފޭކް ޕޭޖުތަކުން ފޮނުވާފައިވާ އާރްޓީއެލް ސްމާޓްކާޑުގެ މައުލޫމާތަކީ އެ ކުންފުންޏާއި އަދި އާރްޓީއެލްއާ ވެސް އެއްވެސް ގުޅުން ހުރި މައުލޫމާތެއް ނޫން ކަމުގައި އެމްޓީސީސީން ވަނީ އާންމުންނަށް އަންގާފައެވެ.
މިއީ އެމްޓީސީސީން މިފަދަ ސްކޭމްތަކާ ގުޅޭގޮތުން ދެވަނަ ފަހަރަށް ކުރާ އިންޒާރެވެ. މީގެ ކުރިންވެސް ވަނީ މިފަދަ ސްކޭމެއް ކުރިއަށްދާކަމަށް ބުނެ، އެކަމަށް ސަމާލުވުމަށް ކަސްޓަމަރުންގެ ކިބައިން އިލްތިމާސް ކޮށްފައެވެ.
އެމްޓީސީސީން ދީފައިވާ މައުލޫމާތުގައި، މިފަދަ ކަންކަމަށް ސަމާލުވުމަށާއި އެމްޓީސީސީގެ ހިދުމަތްތަށް ސާފުކުރަން ބޭނުންނަމަ، އެ ކުންފުނީގެ ހޮޓްލައިން 1650 އަށް ގުޅުމަށް އާންމުންނަށް އިރުޝާދު ދީފައިވެއެވެ.
އޮންލައިން ސްކޭމްތައް އިތުރުވަމުން އަންނަ މި ދަނޑިވަޅުގައި، އެމްޓީސީސީން މި ދީފައިވާ އިންޒާރަކީ އާންމުންގެ ސަލާމަތާއި ރައްކާތެރިކަމަށް ދީފައިވާ ވަރަށް މުހިންމު އިންޒާރެއް ކަމުގައި ފާހަގަކުރެވެއެވެ.