ށ. ކަނޑިތީމުގެ ތަރައްގީއަށް ކުރިއަށް ގެންދަންޖެހޭ ގިނަ މަޝްރޫއުތަކެއް އެބަހުރި ކަމަށާއި އަދި ފެށިފައި ހުރި އަދި ބާރު ސްޕީޑްގައި ކުރިޔަށް ނުދާ ކަންކަން ވެސް އޭގެތެރޭގައި ހިމެނޭ ކަމަށް ރައީސުލްޖުމުހޫރިއްޔާ ޑރ. މުހައްމަދު މުއިއްޒު ވިދާޅުވެއްޖެއެވެ.
ރައީސް މިފަދައިން ވިދާޅުވީ ށ. އަތޮޅުގެ މީހުން ދިރިއުޅޭ 14 ރަށަށް އެމަނިކުފާނު މިއަދު ފެއްޓެވި ދަތުރުފުޅުގައި ކަނޑިތީމުގެ ރައްޔިތުންނާ ބައްދަލު ކުރައްވާ ދެއްކެވި ވާހަކަފުޅުގައެވެ.
ރައީސް ވިދާޅުވީ ތަރައްގީއަށް ކުރިއަށް ގެންދަންޖެހޭ ގިނަ މަޝްރޫއުތަކެއް އެބަހުރި ކަމަށާއި އަދި ފެށިފައި ހުރި އަދި ބާރު ސްޕީޑްގައި ނުދާ ކަންކަން ވެސް އޭގެތެރޭގައި ހިމެނޭ ކަމަށާއި، އެކަންކަމަކީ ވެސް ކަނޑިތީމަށް މުހިންމު ކަންކަން ކަމަށެވެ.
“ކޮންމެ ކަމެއް ވެސް ވަރަށް ބާރު ސްޕީޑުގައި ކުރިއަށް ގެންގޮސް ނިންމައިދޭނަން. އެކަންކަން މި ފަށަނީ ކަންކުރެވޭނެ ހުރިހާ ކަމެއް ހަމަޖައްސާފައި. އެކަން ކުރެވޭނެ މަގާއި ވަސީލަތްތައް ވެސް ހަމަޖައްސާފައި. މިކަމުގައި ރައްޔިތުންގެ އެއްވެސް ކަންބޮޑުވުމެއް އޮތަކަ ނުދޭނަން. ކަމާބެހޭ މިނިސްޓްރީތަކާއި ކުންފުނިތަކުން ރައްޔިތުންނާ ވަރަށް ގާތުން މަސައްކަތް ކުރަމުންދާނެ. މިއަދު މި ފެށި މަޝްރޫއުތައް ވެސް ހުއްޓުމެއް ނެތި ކުރިއަށްދާނެ،” ރައީސް ވަނީ ވިދާޅުވެފައެވެ.
ސްކޫލްގެ މަލްޓިޕާޕަސް ހޯސްގެ މަޝްރޫއަކީ ވަރަށް ބޮޑަށް ލަސްވެފައިވާ ކަމެއް ކަމަށާއި އެކަން ހައްލުކުރުމަށް މަސައްކަތްކޮށް މިހާރު ވަނީ ދިމާވި މައްސަލަ ހައްލުކޮށްފައިކަމަށާއި، އެހެންކަމުން ދެން އެ މަޝްރޫއު ބާރު ސްޕީޑްގައި ކުރިއަށްދާނެ ކަމަށް ރައީސް ވަނީ ވިދާޅުވެފައެވެ.
ސިއްހީ މަރުކަޒުގެ މަޝްރޫޢުގެ ތެރޭން ދެ ބުރީގެ އިމާރާތެއް އަޅައި ކޮންސަލްޓޭޝަން ރޫމްތަކާ އެކު ޖުމްލަ 20 އެނދު ހިމެނޭ އިމާރާތެއް އަޅުއްވައިދެއްވާނެ ކަމަށް ވިދާޅުވިއެވެ. އެ މަޝްރޫޢުގެ އަމަލީ މަސައްކަތް މި އަހަރު ތެރޭ ފެށޭނެކަމުގެ ޔަގީންކަން ކަނޑިތީމުގެ ރައްޔިތުންނަށް ރައީސް ވަނީ ދެއްވައިފައެވެ.
ރައީސްގެ ވާހަކަފުޅު ނިންމަވާލެއްވީ ކަނޑިތީމުގެ ތަރައްގީއަށް ފެށި މަޝްރޫއުތައް ނިންމާލުމުގެ ރަސްމިއްޔާތަށް ތިން ވަނަ ފަހަރަށް އެ ރަށަށް ވަޑައިގަތުމުގެ އުއްމީދުގައެވެ.