އައްޑޫ ސިޓީ ކައުންސިލް އުފެދިފައިވާ ގޮތަށް ބަދަލުގެނައުމަށް އެ ސިޓީގެ ތިން ރަށެއްގެ ރައްޔިތުންގެ ފެންނަ ނުފެންނަ ވޯޓެއް ނެގުމަށް ރައީސުލްޖުމްހޫރިއްޔާ އިޞްލާހު ގެންނެވި ސުވާލުތަކާއި، މަޢުލޫމާތު ކަރުދާސް އިލެކްޝަންސް ކޮމިޝަނުން މިއަދު ވަނީ ޢާންމުކުރައްވާފައެވެ.
މި މަހުގެ 6 ވަނަ ދުވަހު ރައީސުލްޖުމްހޫރިއްޔާ ނެރުއްވި ޤަރާރެއްގައި، އައްޑޫ ސިޓީ ކައުންސިލް އެކުލެވިފައިވާ ގޮތަށް ބަދަލުގެނައުމަށްޓަކައި އައްޑު އަތޮޅު ހުޅުދޫ، މީދޫ އަދި ފޭދޫގެ ރައްޔިތުންގެ ޚިޔާލު ހޯދުމަށް އާންމު ވޯޓެއް ނެގުމަށް ވަނީ ކަނޑައަޅުއްވާފައެވެ. މި ވޯޓު ނެގުމަށް އިލެކްޝަންސް ކޮމިޝަނުން ވަނީ މި މަހުގެ 25 ވަނަ ދުވަސް ކަނޑައަޅުއްވާފައެވެ.
ރައީސުލްޖުމްހޫރިއްޔާގެ ޤަރާރުގައި ކޮންމެ ރަށަކަށް ވަކި ސުވާލެއް ހުށަހަޅުއްވާފައިވެއެވެ. މިގޮތުން ހުޅުދޫގެ ރައްޔިތުންނާ ކުރައްވާ ސުވާލަކީ “އައްޑުއަތޮޅު ހުޅުދޫއަށް ޚާއްޞަކުރެވިގެން، އައްޑުއަތޮޅު ހުޅުދޫ ކައުންސިލް އުފައްދަން ފެނޭހެއްޔެވެ؟” އެވެ. މީދޫ އަދި ފޭދޫގެ ރައްޔިތުންނާވެސް ކުރައްވާނީ އެ ރަށްތަކަށް ޚާއްޞަކޮށްގެން ހަމަ މިފަދަ ސުވާލެކެވެ.
އިލެކްޝަންސް ކޮމިޝަނުން މިއަދު ވިދާޅުވެފައިވާ ގޮތުގައި، މި ވޯޓުލުން ކުރިއަށްދާނީ މި މަހުގެ 25 ވަނަ ދުވަހުގެ ހެނދުނު 8:00 އިން ހަވީރު 4:00 އަށެވެ. އަދި ވޯޓުގެ ނަތީޖާ އިޢުލާންކުރާނީ 26 ވަނަ ދުވަހުގައި ކަމަށްވެސް އެ ކޮމިޝަނުން ވަނީ ހާމަކުރައްވާފައެވެ.
ރައީސުލްޖުމްހޫރިއްޔާގެ ޤަރާރާއި، ސުވާލުތަކާއި އަދި މަޢުލޫމާތު ކަރުދާސް ވަނީ ދިވެހި ސަރުކާރުގެ ގެޒެޓުގައި ޝާއިޢުކުރައްވާފައެވެ. މި ވޯޓަކީ ރައީސުލްޖުމްހޫރިއްޔާއަށް ފެނިވަޑައިގަންނަވާ ހާލަތެއްގައި، ވަޒީރުންގެ މަޖިލީހުގެ މަޝްވަރާއާއެކު ނެގޭ ވޯޓެއްކަން ފާހަގަކުރެވެއެވެ.