ށ. ބިލެތްފަހީގައި އެއާޕޯޓެއް ތަރައްޤީކުރުމަށްޓަކައި ބިން ހިއްކުމާއި އެއާޕޯޓް ތަރައްޤީކޮށް އޮޕަރޭޓްކުރުމުގެ މަސައްކަތް މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އާ ޙަވާލުކޮށް، މިއަދު ވަނީ އެ މަޝްރޫޢުގެ އަމަލީ މަސައްކަތް ފަށައިފައެވެ.
މި މަޝްރޫޢުގެ އެއްބަސްވުމުގައި ސޮއިކުރުމާއި އަމަލީ މަސައްކަތް ފެށުމުގެ ރަސްމިއްޔާތު ބޭއްވުނީ މިއަދު ހަވީރު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެރަށަށް ކުރެއްވި ދަތުރުފުޅެއްގައެވެ. އެއްބަސްވުމުގައި ސަރުކާރުގެ ފަރާތުން ސޮއިކުރެއްވީ މާލީ ކަންކަމާއި ތަރައްޤީގެ ރޭވުންތެރިކަމާ ބެހޭ ވުޒާރާގެ ސްޓޭޓް މިނިސްޓަރު ހުޝާމް ޢަލީ އެވެ. އަދި އެމްއޭސީއެލްގެ ފަރާތުން ސޮއިކުރެއްވީ އެ ކުންފުނީގެ ސީއީއޯ އަދި މެނޭޖިން ޑިރެކްޓަރ އިބްރާހީމް ޝަރީފް މުޙައްމަދެވެ.
ބިލެތްފަހީގައި އެއާޕޯޓެއް ތަރައްޤީކުރުމަކީ އެރަށުގެ ރައްޔިތުންގެ ޒަމާންވީ އުއްމީދެކެވެ. މީގެ ކުރިން ވެސް ދެ ސަރުކާރަކުން އެއާޕޯޓެއް އެޅުމަށް ވަޢުދުވެފައިވީ ނަމަވެސް، އޭގެ އެއްވެސް އަމަލީ މަސައްކަތެއް ކުރެވިފައެއް ނުވެއެވެ. އެންމެ ފުރަތަމަ މި ވަޢުދު ވެވަޑައިގަތީ ކުރީގެ ރައީސް ޢަބްދުﷲ ޔާމީނެވެ. އޭގެފަހުން އެމްޑީޕީގެ ވެރިކަމުގައި ވެސް އެ މަސައްކަތް ފެށޭތޯ މަސައްކަތްކުރި ނަމަވެސް ކާމިޔާބެއް ނުވިއެވެ.
2023 ވަނަ އަހަރުގެ ސެޕްޓެމްބަރު މަހު ރިޔާސީ ކެމްޕޭނުގައި ބިލެތްފަހީގެ ރައްޔިތުންނާ ބައްދަލުކުރެއްވި އިރު، ރައީސް މުޢިއްޒު ވަނީ ކުރީގެ ރައީސް ޔާމީން ވަޢުދުވެވަޑައިގެންނެވި ގޮތަށް އަދި އެރަށު މީހުންގެ އުއްމީދުތަކާ އެއްގޮތަށް ބިލެތްފަހީގައި އެއާޕޯޓް ތަރައްޤީކޮށްދެއްވާނެ ކަމަށް ވިދާޅުވެފައެވެ.
މިހާރު ށ. އަތޮޅުގައި އެއާޕޯޓެއް އޮންނަނީ ހަމައެކަނި ފުނަދޫގައެވެ. ބިލެތްފަހީގައި އެއާޕޯޓެއް ތަރައްޤީކުރުމުން އެ ސަރަޙައްދުގެ ދަތުރުފަތުރުގެ ނިޒާމަށް ފަސޭހަތަކެއް ލިބިގެންދާނެ ކަމަށް ބެލެވެއެވެ.