މުޅި ރާއްޖެއަށް މިހާރު ކުރަމުންދާ ހުޅަނގު މޫސުމުގެ ވިއްސާރައިގައި ތިނަދޫ ސިޓީައަށް ރޭ ވާރޭ ވެހުމުގެ ސަބަބުން އެކި ސަރަހައްދުތަކުގައި ފެންބޮޑުވެ ބައެއް ގެތަކަށް ފެންވަދެފައިވާކަމަށް ތިނަދޫ ސިޓީ ކައުންސިލުން ބުނެފިއެވެ.
އެ ސިޓީ ކައުންސިލުން ސޯޝަލް މީޑިއާގައި ކޮށްފައިވާ ޕޯސްޓެއްގައި ބުނީ ތިނަދޫ ސިޓީައަށް ރޭއްސުރެ ހުއްޓާނުލާ ބޯކޮށް ވާރޭ ވެހުމުގެ ސަބަބުން އެކި ސަރަހައްދުތަކުގައި ފެންބޮޑުވެ ބައެއް ގެތަކަށް ފެންވަދެފައިވާކަމަށާއި، އެކިވަރުގެ ގެއްލުންތައް ލިބިފައިވާ ކަމަށެވެ.
ތިނަދޫ ސިޓީައަށް ބޯކޮށް ވާރޭވެހި، ފެންބޮޑުވެ، ބައެއް ގެތަކަށް ފެންވަދެފައި… ފޮޓޯ: ތިނަދޫ ސިޓީ ކައުންސިލް
ތިނަދޫ ސިޓީ ކައުންސިލް ދަނީ އަވަދިނެތި މިކަމަށް އަވަސް ހައްލެއް ހޯދުމަށް ގުޅުންހުރި އިދާރާތަކާއެކު މަސައްކަތްކުރަމުން ކަމަށް ވެސް ބުނެފައިވެއެވެ.
ތިނަދޫ ސިޓީައަށް ބޯކޮށް ވާރޭވެހި، ފެންބޮޑުވެ، ޕަންޕުން ފެންހިށްކަނީ… ފޮޓޯ: ތިނަދޫ ސިޓީ ކައުންސިލް
އިއްޔެ އެންމެ ބޯކޮށް ވާރޭވެހުނީ ވ. ރަކީދޫއަށް ކަމަށާއި، އެ ރަށަށް 124.7 މިލިމީޓަރުގެ ވާރޭވެހުނު ކަމަށް ގައުމީ މޫސުމާ ބެހޭ އިދާރާއިން ވަނީ ބުނެފައެވެ. އަދި ދެވަނަށް އެންމެ ބޯކޮށް ވާރޭ ވެހުނީ ގދ. ކާޑެއްދޫއަށެވެ. އެއީ 122.8 މިލިމީޓަރުގެ ވާރެއެވެ.