ފޯކައިދޫގެ ތަރައްޤީއަށް މުހިންމު ކަންތައްތަކެއް ކުރަން ހުރިކަން ފާހަގަކުރައްވައި، އަންނަ އަހަރު އެރަށުގައި ބޯހިޔާވަހިކަމުގެ މަޝްރޫޢެއް ކުރިއަށްގެންދަވާނެކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ފޯކައިދޫގެ ރައްޔިތުންނާ ބައްދަލުކުރެއްވުމުގައި ރައީސް މުޢިއްޒު ވިދާޅުވީ، އެރަށުގެ ތަރައްޤީއަށް މުހިންމު މަސައްކަތްތަކެއް ކުރައްވަން ހުރި ކަމަށާއި، އެ މަސައްކަތްތައް އިސްކަމެއް ދެއްވައިގެން ކުރިއަށް ގެންދަވާނެ ކަމަށެވެ. މިގޮތުން މިހާރު ފަށާފައިވާ ތިން މަޝްރޫޢުއާއި މަގުތައް ތަރައްޤީކުރުމުގެ މަސައްކަތަކީ ރައްޔިތުންނަށް ނަފާ ލިބޭނެ މަސައްކަތްތަކެއް ކަމަށް ރައީސް ފާހަގަކުރެއްވިއެވެ.
ކުޅިވަރުގެ ދާއިރާއިން މިއަހަރު އިތުރު މަޝްރޫޢުތަކެއް ފެށުމަށް ރޭވިފައިވާ ކަމަށް ރައީސް ވިދާޅުވިއެވެ. އެގޮތުން މިމަހުގެ ތެރޭގައި ފުޓްސަލް ދަނޑަކާއި ހޭންޑްބޯޅަ ދަނޑު ތަރައްޤީކުރުމުގެ މަސައްކަތް ބަޔަކާ ހަވާލުކުރައްވާނެ ކަމަށާއި، މި ތަންތަން ތަރައްޤީކުރެވޭނީ ރޭގަނޑުވެސް ކުޅެވޭ ގޮތަށް ކަމަށް ވިދާޅުވިއެވެ.
އަންނަ އަހަރުގެ ބަޖެޓުގައި ފޯކައިދޫ ސްކޫލުގެ ޖާގައިގެ މައްސަލަ ހައްލުކުރުމަށް މަސައްކަތްތަކެއް ހިމަނުއްވާނެ ކަމަށާއި، މީގެ ތެރޭގައި ސައިންސް ލެބަކާއި އޭވީ ރޫމް ފަދަ ތަންތަން ހިމެނޭ ކަމަށް ރައީސް ވިދާޅުވިއެވެ. އަދި ރަށުގެ މޫދަށް އެރޭ ސަރަހައްދު ތަރައްޤީކުރުމުގެ މަސައްކަތް އެމްޓީސީސީއާ ހަވާލުކުރައްވާފައިވާ ކަމަށާއި، ރަށްގިރުމުގެ މައްސަލަ ހައްލުކުރުމުގެ މަސައްކަތްވެސް ކުރިއަށްދާނެ ކަމަށް ވިދާޅުވިއެވެ.
“ރައްޔިތުންނަށް ސިއްޙީ ޚިދުމަތްދޭން ރަށުގައި ޤާއިމްވެ ހުންނަ އެތެރެހަށީގެ ޑޮކްޓަރެއް ލިބުން ވެގެންދާނީ ރަށުގެ ސިއްޙީ ކަންކަން ކުރިއެރުވުމަށް ވަރަށް މުހިންމު ކަމަކަށް،” ރައީސް ވިދާޅުވިއެވެ. އަދި އަންނަ އަހަރުގެ ތެރޭގައި އެކްސްރޭގެ ޚިދުމަތް ޤާއިމްކުރުން ފަދަ ކަންކަން ކުރިއަށް ގެންދަވާނެ ކަމަށްވެސް ވިދާޅުވިއެވެ.
ކައުންސިލުމެންބަރުންނާއި ރަށުގެ އިސްވެރިންނާ ބައްދަލުވުމުގައި ކައުންސިލް މެންބަރުން ވަނީ ރަށުގެ ތަރައްޤީއަށް އެންމެ ބޭނުންވާ ކަންކަން ހިއްސާކުރައްވާފައެވެ. މީގެ ތެރޭގައި ރަށުގެ ގިރާ ސަރަހައްދު ހިމާޔަތްކުރުމާއި، ރައްޔިތުންނާއި ފަތުރުވެރިންނަށް މޫދަށް އެރޭނެ ދެ ސަރަހައްދު ތަރައްޤީކޮށްދިނުމާއި، ރަށުގެ މަގުތައް ހެދުން ހިމެނެއެވެ.