އޭއެފްސީ އޭޝިއަންކަޕް ކޮލިފައިންގައި ރާއްޖެއާ ދެކޮޅަށް ގަލޮޅު ދަނޑުގައި ކުޅުނު މެޗަކީ ވަރަށް އުނދަގޫ މެޗެއް ކަމަށާއި، ރާއްޖޭގެ ކުޅުންތެރިން މި މެޗުގައި ދެއްކީ ފުރަތަމަ މެޗަށްވުރެ މާ ތަފާތު ކުޅުމެއް ކަމަށް ތަޖިކިސްތާނުގެ ކޯޗު ގޯރާން ސްޓެވަންކޮވިޗް ބުނެފިއެވެ.
ރާއްޖެ އަތުން 3-0 އިން މޮޅުވި މެޗަށްފަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަމުން ސްޓެވަންކޮވިޗް ފާހަގަކުރި ގޮތުގައި ރާއްޖެއިން ލަނޑު ޖަހާނެ ރަނގަޅު ފުރުސަތުތައް ހޯދިއެވެ. އަދި މެޗުގައި ވަރަށް ފެންވަރު ރަނގަޅު ކުޅުންތެރިންވެސް ފެނިގެން ދިޔައެވެ.
“3-0 އިން މި މެޗުން މޮޅުވި ނަމަވެސް މިއީ އުނދަގޫ މެޗެއް. ޕެނަލްޓީއަކުން ލީޑު ނެގިޔަސް ރާއްޖޭގެ ކުޅުންތެރިންގެ އެޓޭކުތައް ވަރަށް ވަރުގަދަ،” ތަޖިކިސްތާނުގެ ކޯޗު ބުންޏެވެ.
އިތުރަށް ވާހަކަދައްކަމުން ސްޓެވަންކޮވިޗް ބުނީ މެޗުގެ ކުރީކޮޅު ލީޑުނަގާ ގޭމު ކޮންޓްރޯލް ކޮށްގެން ކުޅެވުނު ކަމަށެވެ. އަދި މެޗުގައި ގެނެވުނު ބަދަލުތަކާމެދުވެސް ހިތްހަމަޖެހޭ ކަމަށް އޭނާ ފާހަގަކުރިއެވެ.
މި މެޗުން ލިބުނު 3 ޕޮއިންޓާއެކު ތަޖިކިސްތާން މިވަނީ ގްރޫޕްގައި 10 ޕޮއިންޓް ހަމަކޮށް 2027 ވަނަ އަހަރުގެ އޭޝިއަން ކަޕް ކޮލިފައިންގައި ކުރިއަށް ޖެހިލާފައެވެ. ކުރިން ރާއްޖެއާ ދެކޮޅަށް އަމިއްލަ ގައުމުގައި ކުޅުނު މެޗުން ތަޖިކިސްތާނު މޮޅުވެފައިވަނީ 2-0 ގެ ނަތީޖާއަކުންނެވެ.