ތެދެކެވެ. ލިޔުންތެރިޔަކު ބުނެފައިވާ ވަރަށްވެސް ބޮޑު ތެދެކެވެ. ދުނިޔެއަކީ ވަރަށްވެސް ރީތި ތަނެކެވެ. ދިރިއުޅުމަކީ އިންތިހާއަށް ނަލަ އެއްޗެކެވެ. އަދި އަމިއްލަ ނަފުސުގެ ނަލަކަމާއި ރީތިކަން، ހަގީގީ ތިމާ، ބޭރުފުށުގެ ސިފަތައް އެއްކިބާކޮށްފައި ބަލައިލުމުން ތިމާގެ ލޮލުން ފެންނާނެއެވެ. މި 3 ހަގީގަތް އެއްކޮށްލުމުން ދުނިޔޭގެ ދިރިއުޅުން ވަރަށްވެސް އުފާވެރިވާނެއެވެ. ތިމާ އެހެންމީހަކަށް ވާން ނޫޅެ ތިމާގެ ރީތިކަމުގައި ދިރިއުޅުމުގެ ހަގީގަތް ގަބޫލުކޮށް މިދެކަންތައް ބަލައިގެންފިނަމަ ކުރިމަތިވާކޮންމެ ގޮންޖެހުމަކާ ކުރިމަތިލާނެ ހިތްވަރު ފަސޭހައިން ލިބިގެންދާނެއެވެ. ޝަފާގެ “އެކްސެޕްޓެންސް: ދަ ބިއުޓީ އޮފް އެކްސެޕްޓިންގ ލައިފް އެންޑް ސެލްފް” އަކީ މިދެންނެވި ހަގީގަތްތައް ހާމަކޮށްދޭ ފޮތެކެވެ. ނަމުންވެސް ފޮތުގެ ފުރިހަމަކަން އިހުސާސްވޭ އެހެންނޫންތޯއެވެ.
ޅަޒުވާން ލިޔުންތެރިއެއްގެ ހިތުގެ އަޑު، އޭނާގެ އަމިއްލަ ތަޖުރިބާތަކާއި އިހުސާސްތައް ފޮތެއްގެ ސިފައިގައި ދިވެހި ކިޔުންތެރިންނާ ހަމައަށް މިވަނީ ދާދި އިހަކަށްދުވަހު ގެނެސްދީފައެވެ. މިއީ އުމުރުން 15 އަހަރުގައި އައިޝަތު ޝަފާ ޝާމިން، ލިޔަން ފެށި ފޮތެކެވެ. 17 އަހަރުގައި ނިންމާލި “އެކްސެޕްޓެންސް: ދަ ބިއުޓީ އޮފް އެކްސެޕްޓިންގ ލައިފް އެންޑް ސެލްފް” ފޮތަކީ ހަމައެކަނި ފޮތެއް ނޫނެވެ، އެއީ ޝަފާގެ އަމިއްލަ ހިތުގެ އަޑެވެ. ޝަފާގެ އަމިއްލަ ތަޖުރިބާތަކާއި، ނޫކަށި ފުރައިން ފުރާވަރުގެ އުމުރުގައި ކުރިމަތިވި އެކިކަހަލަ ކަންތަކާއި، ދިމާވި އަމިއްލަ ގޮންޖެހުންތަކާއި، ނަފްސާނީ ގޮތުން ދިމާވި އުނދަގޫތަކުގެ ވާހަކަ އެމުނިގެން ދިޔަ ބަސްތަކަކުން ލިޔެފައިވާ ފޮތެކެވެ.
ޝަފާގެ މިފޮތަކީ ސައްތައިން ސައްތަ އޭނާގެ އަމިއްލަ މަސައްކަތެކެވެ. ޚާއްސަކޮށް ފުރާވަރުން ޒުވާން އުމުރަށްދާ ވަގުތުގެ ނާޒުކު ދަނޑިވަޅުގައި ދިމާވާ ކަންބޮޑުވުންތަކާއި، އަމިއްލަ ނަފްސަށް އޮންނަ ޝައްކުތަކާއި، އިޖުތިމާޢީ ގޮންޖެހުންތަކާ ބެހޭގޮތުން ވަރަށް ފުންކޮށް މި ފޮތުގައި ބަޔާން ކޮށްފައިވެއެވެ.
ފޮތުގެ މައިގަނޑު މަޤްޞަދު: ޝަފާގެ މި ފޮތުގެ މައިގަނޑު މަޤްޞަދަކީ ދިރިއުޅުމުގައި ކުރިމަތިވާ ހާލަތްތަކާއި، އިހުސާސްތަކާއި، އެންމެ މުހިންމު ގޮތެއްގައި އަމިއްލަ ނަފްސު ޤަބޫލު ކުރުމުގެ މުހިންމުކަން ހާމަ ކޮށްދިނުމެވެ. ފޮތުގައި އޭނާގެ އަމިއްލަ ވާހަކަތަކާއި، ޑައިރީ ލިޔުންތަކާއި، ޝުޢޫރުތައް ހިމަނައިގެން ކިޔުންތެރިންނަށް ވަރަށް ގާތުން އިހުސާސް ކުރެވޭނެ ގޮތަކަށް ބަޔާން ކޮށްދީފައިވެއެވެ.
ފޮތުގެ ޚާއްޞަ ސިފަތައް: މި ފޮތުގައި ހުރިހާ ކުރެހުންތަކާއި ޑިޒައިންތަކަކީވެސް ޝަފާގެ އަމިއްލަ މަސައްކަތެވެ. އެންމެ ނާޒުކު އުމުރު 15 އަހަރު ފުރި 16 އަހަރަށް އަޅައިގަތް ހިސާބުން ޝަފާ ފެށި މަސައްކަތަށް މަޑުޖެހުމެއ އައިނަމަވެސް އަނެއްކާވެސް ގަދަ ހިތްވަރާއެކު އުއްމީދުތަކުގައި ކުލަޖެއްސުމަށް ގަލަން ހިންގާލީއެވެ، އަދި އެ ގަލަމުގެ ތުނޑުން އެންމެ ފަހުގެ ބަސް =ނިމުނީ= ލިޔުނުއިރު ޝަފާގެ ފުރާވަރުގެ 17 ވަނަ އަހަރު ކުރިއަށް ދަނީއެވެ. އެހިސާބުން ދެން ކުރަންޖެހުނު މަސައްކަތަކީ ދިވެހިރާއްޖޭގެ ލިޔުންތެރިކަމުގެ ގަވާއިދާއި ގާނޫނީ އިމުގެ ތެރެއިން ފޮތް ފާސްކުރުމާއި ރަޖިސްޓްރީ ކުރުމުގެ ކަންތައްތަކެވެ. ދެން ޗާޕަށް ދިނުމާއި ފޮތެއްގެ ސިފައިގައި އޭނާ ލިޔެފައިވާ ސޮފުޙާތައް އަތުރައި ނިންމައިލުމެވެ. މިހުރިހާ ކަމެއް ނިމި މިއަދު ބާޒާރަށް ނެރެފައިވާ ޝަފާގެ “އެކްސެޕްޓެންސް: ދަ ބިއުޓީ އޮފް އެކްސެޕްޓިންގ ލައިފް އެންޑް ސެލްފް” އަކީ ގްރޭޑް 10 ގެ އިމްތިހާނުތަކަށް ތައްޔާރުވަމުން ދިޔަ ދުވަސްވަރުގައި އޭނާ ކުރި ވަރަށްވެސް ފުރިހަމަ މަސައްކަތެއްގެ އިތުރުން ނަލަނަލަ އުފާވެރި ތަޖުރިބާއެއްވެސްމެއެވެ.
ފޮތް ނެރުމުގެ ރަސްމިއްޔާތު: ފޮތް ނެރުމުގެ ރަސްމިއްޔާތު ބޭއްވުނީ އޮކްޓޫބަރު 9 ވަނަ ދުވަހުގެ ހަވީރު ޤައުމީ ކުތުބުޚާނާ ގައެވެ. ޑިއުޑްރޮޕް ރައިޓާރސް އަދި PCoMA ޕްރޮޖެކްޓްގެ “ހަފްސްވުމުގެ ކުރިން އަޅާލަމާ” ލޯންޗިންގ ރަސްމިއްޔާތުގައެވެ. މި ރަސްމިއްޔާތުގައި ޝަހީނާ އަދި މަންމަ ހަމްދިއްޔާ އިބްރާހީމް އަދި ބައްޕަ ޝާމިން ހަފީޒު އަދި ދޮންތަ ޝަހާ ޝާމިން ބައިވެރިވިއެވެ.
ފޮތް ލިބެން ހުންނާނެ ތަން:
މި ފޮތް ލިބެން ހުންނާނީ ތިނަދޫގެ ލިލިކޮއި ފޮތް ފިހާރައިންނާއި ޝަފާގެ އިންސްޓަގްރާމް ޕޭޖް މެދުވެރިކޮށެވެ.
މިޒަމާނަކީ އޮންލައިން ޒަމާނަކަށްވެފައި ފޮތެއް ޗާޕްކޮށްގެން ޕަބްލިޝް ކުރުމަކީ ވަރަށްބޮޑު ހޭދައަކަށް ވުމާއެކު އޭގެ މާބޮޑު ނަފާއެއް ނެތް ކަމަށް ގިނަ ބަޔަކު ބުނާ އަޑު އިވޭތީ ޝަފާ އާވެސް އެ ސުވާލުކޮށްލީމެވެ. ޝަފާގެ ޖަވާބު ސާދާވެފައި އެހެނަސް ބަސްތައް ސީދާވެފައި ހަރުދަނާއެވެ.
“ނަފާ ނުވެދާނެ ކަމަކަށް ޖެހިލުމެއް ނުވޭ، މަދުން ނަމަވެސް ފޮތް ކިޔާ މީހުން އުޅޭ ކަން އަބަދުވެސް ގަބޫލު ކުރަން، މައުލޫމާތެއް ބޭނުން ނަމަ އޮންލައިން ޒަމާނަކަސް ފޮތް ވެސް ކިޔާ މީހުން އުޅޭ، ޚުދު އަޅުގަނޑަކީ ވެސް ވަރަށް ފޮތް ކިޔާ ހިތްވާ ފޮތް ކިޔާ މީހެއް، އެންމެ ކުޑަ އިރުއްސުރެ ވެސް ފޮތެއް ލިޔުމަކީ އަޅުގަނޑުގެ ހުވަފެނެއް،” އައިޝަތު ޝަފާ ޝާމިން،
(އެހެންކަމުން ޝަފާގެ ޒަމާންވީ ހުވަފެން ސީދާވެ ކުލަވެގެން އައިކަމުގެ އުފަލުގައި ހުވަދޫމީޑިއާގެ މުޅި ޓީމާއި ޚުދު އަޅުގަނޑުގެ އަމިއްލަ ނަމުގައި ފިސާރި ހޫނު މަރުޙަބާ އަކާއެކު ހެޔޮދުއާ ކުރަމެވެ.)
ޝަފާގެ މި ފޮތަކީ ފުރާވަރުން ޅަޒުވާން އުމުރަށްދާ ޖީލަށް އަމާޒުކޮށްގެން ލިޔެފައިވާ، އަމިއްލަ ނަފްސު ދެނެގަތުމާއި ޤަބޫލުކުރުމުގެ މުހިންމުކަން ދަސްކޮށްދޭ މުހިންމު މަސައްކަތެކެވެ. މި ފޮތުން ޒުވާނުންނަށް ކުރިމަތިވާ ގޮންޖެހުންތަކާ ކުރިމަތިލުމުގެ ހިތްވަރާއި ޤާބިލުކަން ލިބިގެންދާނެކަން ކަށަވަރެވެ.
ހުވަދޫމީޑިއާ އިން އެދެނީ ޝަފާއަށް އަދަށްވުރެ ފެހި ފަހި މާދަމާއެކެވެ، ހުވަފެން ދުށުމަށްފަހު އެހުވަފެން ސީދާ ކުރުމަށް މިންނެތް މަސައްކަތް ކުރާ މީހުންނަކީ ހަގީގީ ކާމިޔާބުގެ އަހުލުވެރިންނެވެ. ޝަފާގެ މި ކާމިޔާބީއަށް ދިވެހި އަންހެންދަރިއެއްގެ މިހިތްވަރަށް އައްސަރިބަހާއި ސާބަސް ދަންނަވަމެވެ.