ދ. މާއެނބޫދޫގެ ބިން ހިއްކުމުގެ މަޝްރޫއުގެ ދަށުން ބަންޑް ވޯލް ޖެހުމުގެ މަސައްކަތް ކުރިއަށްދާ ކަމަށް "މޯލްޑިވްސް ޓްރާސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)" އެމްޓީސީސީން ބުނެފިއެވެ. މިއީ ހިއްކަން ހަމަޖެހިފައިވާ ސަރަހައްދު ފާހަގަކުރުމުގެ ގޮތުން ކުރާ މަސައްކަތެކެވެ.
މިދިޔަ ފެބްރުއަރީ މަހު، ރައީސުލްޖުމުހޫރިއްޔާ ޑރ. މުއިއްޒު މާއެނބޫދޫ އަށް ވަޑައިގެން އެ ރަށުގެ ރައްޔިތުންނާ ބައްދަލު ކުރައްވައި ދެއްކެވި ވާހަކަފުޅުގައި ވަނީ ބިން ހިއްކުމުގެ އަމަލީ މަސައްކަތް ވަރަށް އަވަހަށް ފެށިގެންދާނެ ކަމަށް ވިދާޅުވެފައެވެ. އަދި އެ މަޝްރޫއު ނިމޭއިރު ރައްޔިތުން ބޭނުންވާ ގޮތަށް ދެ ހެކްޓަރު ވަކި ރަށެއްގެ ގޮތުގައި ހިއްކާނެ ކަމަށް ވެސް ރައީސް ވިދާޅުވިއެވެ.
މާއެނބޫދޫ ބިން ހިއްކުމުގެ މަޝްރޫއުގެ ދަށުން ބަންޑް ވޯލް ޖެހުމުގެ މަސައްކަތުގެ ތެރެއިން… ފޮޓޯ: އެމްޓީސީސީ
މާއެނބޫދޫގެ ރައްޔިތުން އެންމެ ބޭނުންވެފައިވާ ބިމުގެ ދަތިކަން ހައްލުކުރުމަށް ސަރުކާރުން އިސްކަމެއް ދީގެން މަސައްކަތް ކުރަމުން ގެންދާ ކަމަށް ރައީސް ވަނީ ވިދާޅުވެފައެވެ.
މާއެނބޫދޫގެ 30 ހެކްޓަރުގެ ބިން ހިއްކުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ.