ލ. ހިތަދޫގައި އަލަށް އިމާރާތް ކުރާ ފުލުހުންގެ މަރުކަޒާއި ސިއްހީ މަރުކަޒަށް އިތުރު ކުރެވޭ އިމާރާތުގެ އަމަލީ މަސައްކަތް ފަށައިފިއެވެ. މި މަޝްރޫއުގެ އަމަލީ މަސައްކަތް ފައްޓަވާފައިވަނީ ރައީސުލްޖުމުހޫރިއްޔާ ޑރ. މުހައްމަދު މުއިއްޒު ލ. އަތޮޅަށް ކުރައްވާ 3 ދުވަހުގެ ދަތުރުފުޅުގެ ތެރެއިން އެ އަތޮޅު ހިތަދޫއަށް ވަޑައިގެން ބޭއްވެވި ރަސްމިއްޔާތެއްގައެވެ.
އެ މަޝްރޫގެ ދަށުން ފުލުހުންގެ މަރުކަޒުގެ ބިންގާ އަޅުއްވައިދެއްވީ ދާހިލީ ސަލާމަތާއި ފަންނިއްޔާތާބެހޭ ވަޒީރު އަލީ އިހްސާން އަދި ކޮމިޝަނާ އޮފް ޕޮލިސް އިސްމާއިލް ނަވީނެވެ.
ހިތަދޫގައި އަލަށް އިމާރާތްކުރާ ފުލުހުންގެ މަރުކަޒުގެ މަސައްކަތް ހަވާލުކޮށްފައިވަނީ ރޯޑް ޑިވެލޮޕްމަންޓް ކޯރޕަރޭޝަން، އާރްޑީސީއާއެވެ.
ރާއްޖޭގެ ހުރިހާ ރަށެއްގައި ފުލުހުންގެ ޚިދުމަތަށް، ފުލުހުންގެ އަމިއްލަ އިމާރާތް ޤާއިމުކުރުމުގެ މަސައްކަތަކީ ސަރުކާރުން ޚާއްސަ އިސްކަމެއް ދީގެން ފައްޓަވާފައިވާ މަސައްކަތެކެވެ.
ސަރުކާރުގެ އަމާޒަކީ އަންނަ އަަހަރު ނިމެންވާ އިރަށް ރާއްޖޭގެ ކޮންމެ ރަށަކީ ވެސް ފުލުހުންގެ ހިދުމަތް ގާއިމުވެފައިވާ ރަށަކަށް ހެދުމެވެ.
ލ. ހިތަދޫ ސިއްހީ މަރުކަޒަށް އިތުރުކުރެވޭ އިމާރާތުގެ އަމަލީ މަސައްކަތް ފެށުމުގެ ރަސްމިއްޔާތުގެ ތެރެއިން… ފޮޓޯ: ރައީސް އޮފީސް
ހިތަދޫ ސިއްހީ މަރުކަޒަށް އަލަށް އިތުރުކުރެވޭ އިމާރާތުގެ އަމަލީ މަސައްކަތް ފައްޓަވައި ދެއްވީ މިނިސްޓާ އޮފް ހެލްތް އަބްދުﷲ ނާޒިމެވެ. އަރިހުގައި "ވޭސްޓް މެނޭޖްމަންޓް ކޯޕަރޭޝަން" ވެމްކޯގެ މެނޭޖިން ޑިރެކްޓަރު އަހުމަދު މުޖުތަބާ އަދި ހިތަދޫ ކައުންސިލްގެ ރައީސް އިބްރާހިމް ޝަމްއޫން ބައިވެރިވެ ވަޑައިގެންނެވިއެވެ.
މި މަޝްރޫޢުގެ ސަބަބުން ހިތަދޫ ޞިއްޙީ މަރުކަޒަށް ދިމާވެފައިވާ ޖާގައިގެ މައްސަލަ ހައްލުވެ، އިތުރު ޚިދުމަތްތައް ފުޅާކުރުމަށް މަގުފަހިވެގެންދާނެކަމަށް ސަރުކާރުން ވަނީ ބުނެފައެވެ.
ހިތަދޫ ރައްޔިތުންނާ ބައްދަލު ކުރައްވައި ދެއްކެވި ވާހަކަފުޅުގައި ރައީސް ޑރ. މުއިއްޒު ވިދާޅުވި ގޮތުގައި ސިއްހީ މަރުކަޒަށް އިތުރު ކުރާ އިމާރާތުގައި ހަތަރު އެނދު ހިމެނޭ ވޯޑެއް ގާއިމުކުރާނެއެވެ. އަދި ވޯޑަކާއި ނަރުހުން ތިބޭނެ ސްޓޭޝަނަކާއި ޕަބްލިކް ހެލްތު ޔުނިޓަކާއި ލެބޯޓަރީއަކީ ލޯންޑްރީ، ގަރާޖު އަދި ސްޓޯރޭޖެއް ހިމެނޭނެ ކަމަށް ރައީސް ވިދާޅުވިއެވެ.