ހައްދުންމަތީ މާބައިދޫގެ ފުޓްބޯޅަދަނޑު ތަރައްގީކުރުމުގެ މަޝްރޫއާއި އެ އަތޮޅު ދަނބިދޫ މަގު ހެދުމުގެ އެއްބަސްވުމުގައި ރޯޑް ޑިވެލޮޕްމަންޓް ކޯޕަރޭޝަނުން މިއަދު ސޮއިކޮށްފިއެވެ. މި ދެ އެއްބަސްވުމުގައި ސޮއިކުރެވިފައިވަނީ ރައީސް ޑރ. މުހައްމަދު މުއިއްޒު ލ. އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން މާބައިދޫ އަދި ދަނބިދޫއަށް ވަޑައިގެން ބޭއްވެވި ރަސްމިއްޔާތުތަކުގައެވެ.
ހައްދުންމަތީ މާބައިދޫގެ ފުޓްބޯޅަދަނޑު ތަރައްގީކުރުމުގެ މަޝްރޫއު ހަވާލުކުރިކަމުގެ އެއްބަސްވުމުގައި ސޮއިކުރެއްވީ ކުޅިވަރާއި ހަށިހެޔޮކަމާ ބެހޭ ވަޒީރު އަބްދުﷲ ރާފިއު އަދި އާރުޑީސީގެ އެމްޑީ އިބްރާހިމް ނަޒީމެވެ. އަދި ލ ދަނބިދޫ މަގުހެދުމުގެ އެއްބަސްވުމުގައި ސަރުކާރުގެ ފަރާތުން ސޮއިކުރެއްވީ ގެދޮރުވެރިކަމާއި ބިނާވެށި ބެހޭ ވުޒާރާގެ ވަޒީރު ޑރ. އަބްދުﷲ މުއްތަލިބެވެ. އަދި އާރްޑީސީގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އިބްރާހިމް ނަޒީމެވެ.
މި ރަސްމިއްޔާތުގައި ވާހަކަފުޅު ދައްކަވަމުން ރައީސް މުއިއްޒު ފާހަގަކުރެއްވި ގޮތުގައި، ރަށުގެ ނަރުދަމާއަށް ދިމާވެފައިވާ ބޮޑު މައްސަލަ ހައްލުކުރުމަކީ ރައްޔިތުން އެންމެ ބޭނުންވާ އެއްކަމެވެ. “މިކަން ދާއިމީ ގޮތެއްގައި ހައްލުކުރުމަކީ މުހިންމު ކަމެއްކަން އަޅުގަނޑު ގަބޫލުކުރަން” ރައީސް ވިދާޅުވިއެވެ. އަދި އެކަން ހައްލުކުރުމަށް ތަފްސީލީ ދިރާސާއެއް ކަމާބެހޭ ފަރާތްތަކުން ފަށާނެ ކަމަށާއި، ނަރުދަމާގެ މައްސަލަ ހައްލުކުރުމަށްފަހު މަގުތައް ހެދުމުގެ މަސައްކަތް ފެށިގެންދާނެ ކަމަށް ވެސް ވިދާޅުވިއެވެ.
ދަނބިދޫގެ ތަރައްގީގެ މަޝްރޫއުތަކުގެ ތެރެއިން، މިއަދު އެރަށުގައި ފިޓްނެސް އެންޑް ރެކްރިއޭޝަން ސެންޓަރުގެ ބިންގަލާއި ފުލުހުންގެ މަރުކަޒު ގާއިމުކުރުމުގެ މަސައްކަތް ވެސް ވަނީ ފެށިފައެވެ. މީގެއިތުރުން، އެރަށުގައި ބޭންކް އޮފް މޯލްޑިވްސް (ބީއެމްއެލް) އިން ގާއިމުކުރި އޭޓީއެމްގެ ޚިދުމަތް ވެސް ރަސްމީކޮށް މިއަދު ވަނީ ފަށާފައެވެ.