45 ވަނަ މަސްވެރިންގެ ދުވަހުގެ މުނާސަބަތުގައި “ރަހަވަރު”ގެ ނަމުގައި ބާއްވާ ކެއްކުމުގެ މުބާރާތުގައި ބައިވެރިވުމުގެ ފުރުސަތު މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސް އިން ހުޅުވާލައިފިއެވެ.
މިނިސްޓްރީން ވިދާޅުވީ، 2025 ވަނަ އަހަރުގެ މަސްވެރިންގެ ދުވަސް ފާހަގަކުރުމުގެ ގޮތުން، ކެއްކުމުގެ މި މުބާރާތް ބޭއްވުމަށް ހަމަޖެހިފައިވަނީ ޑިސެންބަރު މަހުގެ 13 ވާ ހޮނިހިރު ދުވަހު ރ. ދުވާފަރުގައި ކަމަށެވެ.
މި މުބާރާތުގެ މައިގަނޑު އަމާޒަކީ ޒުވާނުންނާއި ކެއްކުމުގެ ދާއިރާއަށް އަލަށް ނުކުންނަ ފަރާތްތަކަށް އެ ދާއިރާއިން ފުރުސަތު ފަހިކޮށްދިނުމެވެ. އަދި ދިވެހިރާއްޖޭގެ މަސްވެރިކަމުގެ ސިނާއަތް ސިންދަފާތުކޮށް، ދެމެހެއްޓެނިވި ގޮތެއްގައި ކުރިއެރުވުމަށް ކުރެވޭ މަސައްކަތްތަކުގައި އެ ފަރާތްތައް ބައިވެރިކުރުމަކީ ވެސް މި މުބާރާތުގެ މުހިއްމު މަގުސަދެކެވެ.
މީގެ އިތުރުން، ދިވެހިރާއްޖޭގެ ކާބޯތަކެތީގެ ރައްކާތެރިކަމަށް މަސްވެރިކަމުން ހިއްސާކުރާ މިންވަރު ފާހަގަކުރުމާއި، ދިވެހިންގެ ކެއުންބުއިމުގެ އާދަކާދަތަކަށް އަންނަމުންދާ ބަދަލުތަކާ އެކު، ތަފާތު އައު ބާވަތްތަކުގެ މަހުގެ އުފެއްދުންތައް އުފައްދާ، ބޭނުންކުރުމުގެ މުހިންމުކަން ދައްކުވައިދިނުމަކީ ވެސް މި މުބާރާތުގެ މަގުސަދުތަކުގެ ތެރޭގައި ހިމެނޭ ކަމަށް މިނިސްޓްރީން ފާހަގަކުރައްވައެވެ.
މުބާރާތުގައި ބައިވެރިވުމަށް ޝައުގުވެރިވާ ފަރާތްތަކުން، ކަމާގުޅޭ ފޯމް (https://tinyurl.com/3wp7r7jz) ފުރިހަމަ ކުރެއްވުމަށް ފަހު، 2025 ވަނަ އަހަރުގެ ނޮވެމްބަރު މަހުގެ 15 ވަނަ ދުވަހުގެ 14:00 ގެ ކުރިން ހުށަހެޅުމަށް މިނިސްޓްރީން ވަނީ އެދިފައެވެ.
މަސްވެރިންގެ ދުވަހާ ގުޅިގެން ރަހަވަރު ކެއްކުމުގެ މުބާރާތުގައި ބައިވެރިވުމުގެ ފުރުސަތު ހުޅުވާލާފައިވާއިރު، މިނިސްޓްރީން ވަނީ ކެޔޮޅުންގެ އެވޯޑާއި ހިދުމަތްތެރި ފަރުމަސްވެރިޔާގެ އެވޯޑަށް ކުރިމަތިލުމަށް ހުޅުވާލާފައިވާ މުއްދަތު ވެސް އިތުރުކޮށްފައެވެ. މި އެވޯޑް ހަފްލާ ވެސް އޮންނާނީ ރ. ދުވާފަރުގައި ކަމަށް މިނިސްޓްރީން މައުލޫމާތު ދެއްވައެވެ.