އެކްޒީމާ ބަލި ތަހައްމަލުކުރާ ކުދިންނަށާއި، ޢާއިލާތަކަށް އެހީތެރިކަމާއި ހިތްވަރު ދިނުމުގެ މަޤްސަދުގައި ޑރ. ޝިރާނީ ލިޔުއްވި ފޮތް “ހަޔާތުގެ ސަފްހާތަކުން ބާބެއް :އެކްޒީމާގެ ދަތުރު” ރަސްމީކޮށް ނެރުއްވައިފިއެވެ. މި ފޮތް ނެރެދެއްވާފައިވަނީ ޑރ. ޝިރާނީގެ މަންމައާއި ބައްޕައެވެ.
“ހަޔާތުގެ ސަފްހާތަކުން ބާބެއް: އެކްޒީމާގެ ދަތުރު” ގެ ނަމުގައި ޑރ. ޝިރާނީ ލިޔުއްވި މި ފޮތަކީ، އެކްޒީމާ ތަހައްމަލުކުރާ ކުދިންނަށާއި، ޢާއިލާތަކަށް ޚާއްސަކޮށް، ބަލި ތަހައްމަލުކުރަމުންދާ ޢާޢިލާއެއްގެ ތަޖުރިބާ ހިއްސާކޮށް، އެހެން ޢާއިލާތަކަށާއި، ބަލި ތަހައްމަލުކުރާ އެހެން ބަޔަކަށް ހިތްވަރު ދިނުމުގެ ގޮތުން ލިޔުއްވާފައިވާ ފޮތެކެވެ.
ޑރ. ޝިރާނީ ވިދާޅުވީ، މި ފޮތަކީ، އެކްޒީމާ ހުންނަ ކުދިންނަށް އިތުރު ހިތްވަރެއް ދިނުމުގެ ގޮތުން ލިޔުއްވި ފޮތެއްކަމަށެވެ. “މިފޮތުން ބުނެދޭން ބޭނުންވޭ. ހަމަ މިއާއިއެކު އެކްޒީމާ ހުންނަ ކުދިންނާއި އެކުދިންގެ ބެލެނިވެރިންނަށް މިފޮތުން އެހީތެރިކަމެއް ލިބި، މި ދަތުރުގައި އެމީހުން ތިބީ އެކަނި ނޫންކަން ބުނެދިނުމަކީ މިފޮތުގެ އެންމެ ބޮޑު މަގުސަދު،” ޑރ. ޝިރާނީ ވިދާޅުވިއެވެ.
މި ފޮތުގައި އެކްޒީމާއާ ގުޅޭގޮތުން ކުޑަކުދިންގެ ޚާއްސަ ޑރ. އައިމިނަތު އަބޫބަކުރު ހިއްސާކުރައްވާފައިވާ މަޢުލޫމާތުގެ އިތުރުން، ކުޑަކުދިންނަށް ޖެހޭ “ފެބްރައިލް ސީޒާސް” ނުވަތަ ހުންއައުމުން ފިޓްޖެހުމާ ގުޅޭގޮތުން ޑރ. އާއިޝަތު ސޮފާ ދެއްވައިފައިވާ މަޢުލޫމާތުވެސް ހިމަނާފައިވާކަމަށް އޭނާ ފާހަގަކުރެއްވިއެވެ.
އެކްޒީމާއަކީ އެބައްޔެއްގެ އުދަގުލާއި ވޭން އެތައް ކުޑަކުދިންނެއް އުފުލާ ބައްޔެކެވެ. ތަފާސް ހިސާބުތައް ދައްކާގޮތުން، ދުނިޔޭގެ %10 އަށްވުރެ ގިނަ ކުޑަކުދިން މި ބަލި ތަހައްމަލު ކުރަމުންދެއެވެ. އެކްޒީމާއަކީ އޭގެ ސަބަބުން ކުއްޖާގެ އާންމު ދިރިއުޅުމަށާއި ކެއުމާއި ނިދުން ފަދަ ކަންކަމަށް އުދަގޫވެ، މައިންބަފައިންނަށްވެސް އެތަކެއް ހިތާމައަކާއި އުދަގުލެއް ކުރިމަތިކުރުވާ ބައްޔެކެވެ.
ޑރ. ޝިރާނީ ވިދާޅުވީ، ވަގުތާއި ހިތްވަރާއި، މަސައްކަތާއި އަދި ދުޢާއާއިއެކު ކޮންމެ ހުވަފެނަކީވެސް ކުލަޖެއްސިދާނެ ހުވަފެނެއްކަމަށެވެ. “މިފޮތް 25 އޮކްޓޯބަރ ގައި ރަސްމީކޮށް މިނެރުނީ މިއީ އަޅުގަނޑުގެ އުފަންދުވަހުގެ މުނާސަބަތުގައި، މިއީ ދަރިފުޅުގެ އުފަންދުވަހުގެ ހަދިޔާ. ފޮތެއް ނެރުމުގެ ހުވަފެނަކީ އަޅުގަނޑު 13 އަހަރުގައި ދެކެން ފެށި ހުވަފެނެއް. އުމުރުން 25 އަހަރުން ފެށިގެން އަމިއްލަ ބްލޮގްގައި ލިޔުމުގެ އިތުރުން އެކި ނޫސްތަކުގައި އެކި ކަހަލަ އާރޓިކަލްތައް ލިޔަމުންގޮސް ފޮތަކާ ހިސާބަށް މިއާދެވުނީ ވަރަށް މަސައްކަތުން. އެހެންކަމުން މިއަދު ދަރިފުޅަށް އަދި އެހެން ކުޑަކުދިންނަށް ބުނެލަދޭން ބޭނުންވަނީ ހުވަފެން ދެކޭށޭ،” ޑރ. ޝިރާނީ ހިތްވަރު ދެއްވިއެވެ.
އެކްޒީމާ ބަލި ތަހައްމަލުކުރާ ކުދިންނަށް ޚާއްސަކޮށް ޑރ. ޝިރާނީ ލިޔުއްވި މި ފޮތް ޕްރިންޓްކުރެވިފައިވަނީ ދިވެހި އަދި އިނގިރޭސި ބަހުން އެއްފޮތަކުން ފެންނާނެގޮތަށެވެ.
މި ފޮތުގެ ކޮޕީއެއް މިހާރު ކުޅުދުއްފުށީގެ ޕަބްލިކް ލައިބްރަރީއަށް ހަދިޔާކުރައްވާފައިވާކަމަށާއި، މިފޮތް އާންމުންނަށް ގަންނަން ލިބޭނެގޮތަށް ކުރިއަށް އޮތް މަހެއްގެ ތެރޭގައި ލިބެން ހުންނާނެކަމަށް އޭނާ ވިދާޅުވިއެވެ. އަދި ޕްރި އޯޑަރ ކުރުމަށްވެސް ހުޅުވާލާނެކަމަށް ޑރ. ޝިރާނީ ވިދާޅުވިއެވެ.