ވެލާނާ އިންޓަނޭޝަނަލް އެއަރޕޯޓް (ވީއައިއޭ)ގެ އައު ފަސިންޖަރ ޓާމިނަލް، ޓާމިނަލް 1 އިން ކަޒަގިސްތާނުގެ ޤައުމީ އެއަރލައިން، އެއަރ އަސްތާނާއަށް ޚިދުމަތް ދޭން ރަސްމީކޮށް ފަށައިފިއެވެ. މިއީ ވީއައިއޭގެ އައު ޓާމިނަލް 1 ބޭނުންކުރަން ފެށި 15 ވަނަ އެއަރލައިނެވެ. ވީއައިއޭގެ އައު ޓަރމިނަލް ހުޅުވާފައިވަނީ މިއަހަރުގެ ޖުލައި 26 ވަނަ ދުވަހުއެވެ.
ޓާމިނަލް 1 އިން އެއަރ އަސްތާނާއަށް ޚިދުމަތް ދޭން ފެށުން ފާހަގަކުރުމަށް ވަނީ ޚާއްސަ ރަސްމިއްޔާތެއް ބާއްވާފައެވެ. މި ރަސްމިއްޔާތުގައި އެއަރ އަސްތާނާގެ ޗެކިން ކައުންޓަރުތައް ރަސްމީކޮށް ހުޅުވައި، އެ ފްލައިޓުން ދަތުރުކުރި ފަސިންޖަރުންނަށް ވަނީ ހަދިޔާ ދީފައެވެ. މިކަމުގެ ސަބަބުން އެއަރލައިނާއި އެއަރޕޯޓްގެ މެދުގައި އޮތް ގުޅުން އިތުރަށް ބަދަހިވެގެންދާނެއެވެ.
މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ވިދާޅުވެފައިވާ ގޮތުގައި، ޓާމިނަލް 1އަށް އެއަރ އަސްތާނާގެ ޚިދުމަތް ބަދަލުކުރެވުމަކީ، ބައިނަލްއަޤްވާމީ ދަތުރުތައް އިތުރަށް ފުޅާވެ، ރާއްޖެއިން ސެންޓްރަލް އޭޝިއާގެ ގައުމުތަކަށް ބާއްވާ ދަތުރުތައް އިތުރަށް ފުޅާވެގެންދާނެ ކަމެކެވެ. މިއީ ރާއްޖޭގެ ވައިގެ ދަތުރުފަތުރުގެ ދާއިރާއަށް ލިބުނު އިތުރު ކުރިއެރުމެކެވެ.
ވެލާނާ އިންޓަރނޭޝަނަލް އެއަރޕޯޓްގެ އައު ޓަރމިނަލް ހުޅުވުމާއެކު ރާއްޖެއަށް ދަތުރުކުރާ އެއަރލައިންތަކުގެ ޚިދުމަތްތައް އަންނަނީ އައު ޓަރމިނަލަށް ބަދަލުކުރަމުންނެވެ. އެގޮތުން އެންމެ ފަހުން ވީއައިއޭގެ ޓާމިނަލް 1 އިން ޚިދުމަތްދޭން ފަށާފައިމިވަނީ ބްރިޓިޝް އެއަރލައިންސްއަށެވެ. މި ބަދަލުތަކުގެ ސަބަބުން އެއަރޕޯޓްގެ ޚިދުމަތްތަކުގެ ފެންވަރު ރަނގަޅުވެ، ފަސިންޖަރުންނަށް ލިބޭ ތަޖުރިބާ އިތުރަށް ހަރުދަނާވެގެންދާނެއެވެ.