ޅ. ކުރެންދޫގައި ބޭނުންވާ މުހިންމު ދެ މަޝްރޫއެއް ކަމަށްވާ ބަނދަރު ތަރައްގީ ކުރުމުގެ މަޝްރޫއާއި، ފުލުހުންގެ މަރުކަޒު ގާއިމު ކުރުމުގެ މަޝްރޫއުގެ އަމަލީ މަސައްކަތް މިއަދު ފަށައިފިއެވެ. މި މަސައްކަތްތައް ފަށާފައި ވަނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ޅ. އަތޮޅަށް ކުރައްވަމުން ގެންދަވާ ދަތުރުފުޅުގެ ތެރެއިން މިއަދު ކުރެންދޫއަށް ވަޑައިގެން ބޭއްވި ރަސްމިއްޔާތެއްގައެވެ. ބަނދަރުގެ މަސައްކަތް އެމްޓީސީސީއާ ހަވާލުކޮށްފައިވާއިރު، ފުލުހުންގެ މަރުކަޒުގެ މަސައްކަތް ކުރިއަށް ގެންދަނީ ފެނަކައިންނެވެ.
މި ރަސްމިއްޔާތުގައި ބަނދަރު ތަރައްގީ ކުރުމުގެ މަޝްރޫއުގެ އަމަލީ މަސައްކަތް ފައްޓަވާ ދެއްވީ ގެދޮރުވެރިކަމާއި ބިމާއި އުމްރާނީ ތަރައްގީއާ ބެހޭ ވަޒީރު ޑރ. އަބްދުﷲ މުއްތަލިބެވެ. އަދި ފުލުހުންގެ މަރުކަޒުގެ އަމަލީ މަސައްކަތް ފައްޓަވާ ދެއްވީ ދާހިލީ ސަލާމަތާއި ފަންނިއްޔާތާބެހޭ ވަޒީރު އަލީ އިހްސާން އެވެ. މި ރަސްމިއްޔާތުގައި ކުރެންދޫ ދާއިރާގެ އިއްޒަތްތެރި މެންބަރާއި ކުރެންދޫ ކައުންސިލްގެ ރައީސް އަދި އެމްޓީސީސީގެ މެނޭޖިން ޑިރެކްޓަރ ވެސް ބައިވެރިވެ ވަޑައިގެންނެވިއެވެ.
އެމްޓީސީސީއާ ހަވާލުކޮށްފައިވާ ކުރެންދޫ ބަނދަރު ތަރައްގީ ކުރުމުގެ މަޝްރޫއަކީ 53 މިލިއަން ރުފިޔާގެ މަޝްރޫއެކެވެ. މި މަސައްކަތް 450 ދުވަސް ތެރޭގައި ނިންމުމަށް ވަނީ ހަމަޖެހިފައެވެ. މި މަޝްރޫއުގެ ދަށުން، 36،363 ކިއުބިކް މީޓަރުގެ ސަރަހައްދެއްގައި ކުރިން ފުންކޮށްފައިވާ ފަޅު އަލުން ފުންކުރުމުގެ މަސައްކަތް ކުރާނެއެވެ. މީގެ އިތުރުން 63 މީޓަރުގެ ސަރަހައްދެއްގައި ރިވެޓްމެންޓް ޖެހުމާއި، 415 މީޓަރުގެ ސަަރަހައްދެއްގައި ބޭރުތޮށި ލުމުގެ މަސައްކަތް ހިމެނެއެވެ. އަދި 243 މީޓަރުގެ ދިގު ދެ މީޓަރުގެ ފުޅާ އާރްސީ ޖެޓީއަކާއި، 60 މީޓަރުގެ ދިގު ދެ މީޓަރުގެ ފުޅާ އިތުރު އާރްސީ ޖެޓީއެއް ހެދުމުގެ މަސައްކަތް ވެސް މި މަޝްރޫއުގެ ދަށުން ކުރިއަށް ގެންދާނެއެވެ.
ޅ. ކުރެންދޫގައި ފުލުހުންގެ މަރުކަޒު ގާއިމުކުރުމުގެ މަސައްކަތަކީ ރާއްޖޭގެ ހުރިހާ ރަށެއްގައި ފުލުހުންގެ ހިދުމަތް ފުޅާ ކުރެއްވުމަށް ރައީސް ޑރ. މުއިއްޒު ފައްޓަވާފައިވާ ސިޔާސަތުގެ ދަށުން ކުރިއަށް ގެންދާ މަޝްރޫއެކެވެ. ސަރުކާރުގެ އަމާޒަކީ އަންނަ އަހަރު ނިމިގެންދާއިރު ރާއްޖޭގެ ކޮންމެ ރަށަކީ ވެސް ފުލުހުންގެ ހިދުމަތް ގާއިމުވެފައިވާ ރަށަކަށް ހެދުމެވެ. އެގޮތުން ރަށްރަށުގައި ޕޮލިސް ސްޓޭޝަންތައް ހެދުމާއި، ޕޮލިސް ޕޯސްޓުތައް ހެދުން އަދި ޕޮލިސް ޑެސްކުތައް ގާއިމުކުރުމުގެ މަސައްކަތްތައް ކުރިއަށް ގެންދާނެއެވެ.
ރާއްޖޭގައި ކުށް މަދުކުރުމަކީ ސަރުކާރުން ވަރަށް އިސްކަމެއް ދީގެން ކުރިއަށްގެންދާ މަސައްކަތަކަށް ވާއިރު، ފުލުހުންގެ ހިދުމަތް ރަށްރަށުގައި ގާއިމުކުރުމުގެ ސަބަބުން މަސްތުވާތަކެތީގެ މައްސަލައަށް ހައްލު ގެނައުމާއި ގޭންގް މާރާމާރީއަށް ހައްލު ގެނައުމަށް މަގުފަހިވެގެންދާނެ ކަމަށް ސަރުކާރުން ދެކެއެވެ. ކުރެންދޫގައި މި ދެ މަޝްރޫއު އެއްފަހަރާ ފެށުމަކީ ރައްޔިތުންގެ އިޖުތިމާއީ އަދި އިގްތިސާދީ ފުދުންތެރިކަން އިތުރުކުރުމަށް ލިބިގެންދާނެ ބޮޑު ކުރިއެރުމެކެވެ.