ޅ. ނައިފަރުގައި ގާއިމްކުރާ 30 ޓަނުގެ އައިސްޕްލާންޓްގެ ބިންގާ މިއަދު އަޅައިފިއެވެ. މި މަސައްކަތުގެ ބިންގާ އެޅުއްވީ ރައީސުލްޖުމުހޫރިއްޔާ ޑރ. މުހައްމަދު މުއިއްޒު، ޅ. އަތޮޅަށް މިހާރު ކުރައްވަމުން ގެންދަވާ ދަތުރުފުޅުގެ ތެރެއިން އެރަށަށް ވަޑައިގެން ބޭއްވި ހާއްސަ ހަފްލާއެއްގައެވެ.
މި އައިސް ޕްލާންޓްގެ އަމަލީ މަސައްކަތް ފައްޓަވާ ދެއްވީ މަސްވެރިކަމާއި ކަނޑުތަކާ ބެހޭ ވަޒީރު އަހުމަދު ޝިޔާމެވެ. މި ހާއްސަ ރަސްމިއްޔާތުގައި ނައިފަރު ދާއިރާގެ މަޖިލިސް މެމްބަރު ޔާސީން އަބްދުﷲ އާއި ނައިފަރު ކައުންސިލްގެ ރައީސް މުހައްމަދު ރަޝީދު ވެސް ބައިވެރިވެ ވަޑައިގެންނެވިއެވެ. މި ޕްލާންޓަކީ ނައިފަރުގެ މަސްވެރިކަމަށް ވަރަށް ބޮޑު ކުރިއެރުމެއް ގެނެސްދޭނެ މަޝްރޫޢެކެވެ.
މަސްވެރިންނަށް ފަސޭހައިން އައިސް ލިބޭނެ އިންތިޒާމް ހަމަޖެއްސުމަކީ މި ސަރުކާރުގެ އެންމެ އިސް އެއް އަމާޒެވެ. ރާއްޖޭގެ އެކި ސަރަހައްދުތަކުގައި އައިސްޕްލާންޓްތައް އެޅުމުގެ މަސައްކަތް ސަރުކާރުން ކުރަމުން ދަނީ، މަސްވެރިންގެ ފަރާތުން ފަސޭހައިން އައިސް ނުލިބުމުގެ ޝަކުވާ ބޮޑުވުމާ ގުޅިގެންނެވެ. 30 ޓަނުގެ މި ޕްލާންޓާއެކު ނައިފަރު ސަރަހައްދުގެ މަސްވެރިންނަށް ދިމާވާ އައިހުގެ ދަތިކަން ހައްލުވާނެ ކަމަށް ބެލެވެއެވެ.
މި މަސައްކަތުގެ އިތުރުން ވެސް ސަރުކާރުން ދަނީ މަސްވެރިކަމުގެ ސިނާއަތް ކުރިއެރުވުމަށް ގިނަ މަސައްކަތްތަކެއް ކުރަމުންނެވެ. އެގޮތުން މިފްކޯގެ ކެޕޭސިޓީ އިތުރުކޮށް، މަސްވެރިންނަށް ބޭނުންވާ އެކި ޚިދުމަތްތައް ލިބޭނެ އިންތިޒާމް ހަމަޖެއްސުމަށް ސަރުކާރުން ދަނީ މަސައްކަތްތައް ކުރަމުންނެވެ. މިފަދަ މަޝްރޫޢުތަކުގެ ސަބަބުން މަސްވެރިކަމުގެ ދާއިރާއަށް އިންގިލާބީ ބަދަލުތަކެއް އަންނާނެ ކަމަށް ސަރުކާރުން އުންމީދު ކުރެއެވެ.