އައްޑޫސިޓީ، ފޭދޫގައި ފުޓްސަލް ދަނޑެއް ތަރައްގީ ކުރުމުގެ މަސައްކަތް ހަވާލު ކުރުމުގެ އެއްބަސްވުމުގައި މިއަދު ސޮއި ކޮށްފިއެވެ. މި މަޝްރޫޢަކީ އައްޑޫގެ ކުޅިވަރުގެ ފެންވަރު މަތިކުރުމަށްޓަކައި ސަރުކާރުން ކުރައްވާ މުހިންމު މަސައްކަތެކެވެ.
ކުޅިވަރާއި ހަށިހެޔޮކަމާ ބެހޭ ވުޒާރާއިން ވިދާޅުވީ، ފޭދޫ ފުޓްސަލް ދަނޑު ތަރައްގީ ކުރުމުގެ އެއްބަސްވުމުގައި ސޮއިކޮށްފައިވަނީ ޒެބޮކް ކުންފުންޏާއެކު ކަމަށެވެ. މި އެއްބަސްވުމުގައި ވުޒާރާގެ ފަރާތުން ސޮއިކުރެއްވީ ޑެޕިއުޓީ މިނިސްޓަރު އަހުމަދު ނިޒާމެވެ. އަދި ޒެބޮކްގެ ފަރާތުން ސޮއިކޮށްފައިވަނީ އެ ކުންފުނީގެ ޖެނެރަލް މެނޭޖަރު ހަސަން މުއާނެވެ.
މި ރަސްމިއްޔާތުގައި ރައްޔިތުންގެ މަޖިލިހުގެ ފޭދޫ ދެކުނު ދާއިރާގެ މެމްބަރު، އިބްރާހިމް ދީދީ (އައިބީ) ވެސް ބައިވެރިވެވަޑައިގެންނެވިއެވެ. މި މަޝްރޫޢު ނިމިގެންދާއިރު، ފޭދޫގެ ޒުވާނުންނަށް ފުޓްސަލް ކުޅުމަށް ފަހި މާހައުލެއް ލިބިގެންދާނެއެވެ.
ފޭދޫގައި ފުޓްސަލް ދަނޑެއް އެޅުމުގެ އިތުރުން، އައްޑޫސިޓީގެ އެހެން ރަށްތަކުގެ ކުޅިވަރާއި ހަށިހެޔޮކަމުގެ ވަސީލަތްތައް ތަރައްގީ ކުރުމުގެ އެއްބަސްވުންތަކުގައި ވެސް މިއަދު ވަނީ ސޮއިކޮށްފައެވެ. މީގެ ތެރޭގައި ފޭދޫ، މަރަދޫ ފޭދޫ، ހުޅުދޫ އަދި މަޑަވެލީގައި އައުޓްޑޯ ޖިމް އިކުއިޕްމެންޓްސް ސަޕްލައިކޮށް، އިންސްޓޯލް ކުރުމާއި، މަރަދޫގެ އައުޓްޑޯ ޖިމް އިކުއިޕްމެންޓްސް ބަދަލު ކުރުން ހިމެނެއެވެ.
މި ދެވަނަ އެއްބަސްވުމުގައި ސޮއިކޮށްފައިވަނީ ކުޅިވަރާއި ހަށިހެޔޮކަމާ ބެހޭ ވުޒާރާއާއި ނޫރައްދީން އިންވެސްޓްމަންޓް އާ ދެމެދުގައެވެ. މި މަސައްކަތްތަކުގެ ސަބަބުން އައްޑޫސިޓީގެ ރައްޔިތުންނަށް ހަށިހެޔޮކަމުގެ ކަންކަމަށް ލުއިފަސޭހަ ގޮތްތައް ލިބިގެންދާނެ ކަމަށް ލަފާކުރެވެއެވެ.