މި ސަރުކާރުން ފައިސާ ޗާޕުކުރަން އުޅޭކަމަށް ދޭހަވާ ގޮތަށް އިދިކޮޅު ފަރާތްތަކުން ދައްކަމުން އަންނަ ވާހަކަތަކަށް ރައްދު ދެއްވައި، ސަރުކާރުން ފައިސާ ޗާޕު ނުކުރާނެ ކަމުގެ ޔަގީންކަން އިގުތިސާދީ ތަރައްގީއާ ބެހޭ ވަޒީރު މުހައްމަދު ސައީދު ދެއްވައިފިއެވެ. މިނިސްޓަރު ސައީދު މި ޔަގީންކަން ދެއްވީ ރައްޔިތުންގެ މަޖިލީހުގެ ޖަލްސާއެއްގައި މެންބަރަކު ކުރެއްވި ސުވާލަކަށް ޖަވާބުދެއްވުމުގެ ތެރެއިން އިތުރު ސުވާލުކުރުމުގެ ވަގުތުގައެވެ.
ހުޅުމާލޭ ދެކުނު ދާއިރާގެ މެންބަރު ޑރ. އަހްމަދު ޝަމްހީދު، އެމްއެމްއޭ މެދުވެރިކޮށް ފައިސާ ޗާޕުކޮށްގެން، ޕެންޝަން ފަންޑު މެދުވެރިކޮށް އިގުތިސާދަށް ދެ ބިލިއަން ރުފިޔާ ނެރުމަށް މި ސަރުކާރުން މަސައްކަތްކުރާ ކަމަށް ތުހުމަތުކުރައްވައި ކުރެއްވި ސުވާލަށް ޖަވާބުދެއްވަމުން މިނިސްޓަރު ވިދާޅުވީ، “އިއްޒަތްތެރި މެންބަރު، މި ސަރުކާރަކުން ފައިސާ ޗާޕެއް ނުކުރާނެ.” މި ސަރުކާރުން ފައިސާ ޗާޕުކުރުމަކީ ކުރާނެ ކަމެއް ނޫންކަން އޭނާ ކަށަވަރުކޮށްދެއްވިއެވެ.
މިނިސްޓަރު ސައީދު ވަނީ ކުރީގެ ފަސް އަހަރު ދައުލަތުގެ މާލީ ކަންކަން ހިންގާފައިވާ ގޮތަށް އަލި އަޅުވައި ލައްވާފައެވެ. އޭނާ ވިދާޅުވީ ކުރީ ފަސް އަހަރު ދައުލަތުގެ ދަރަނި އިތުރުވީ ކޮވިޑުގެ ސަބަބުން ކަމަށް ވިދާޅުވިއިރު، ކޮވިޑުގެ ނަމުގައި 8.7 ބިލިއަން ރުފިޔާ ލިބުނު ނަމަވެސް، ކޮވިޑާ ގުޅިގެން ހަރަދުކުރީ އެންމެ 4.2 ބިލިއަން ރުފިޔާ ކަމަށެވެ. އެހެންކަމުން، ބާކީ ފައިސާ ހުއްޓާ ފައިސާ ޗާޕުކުރި ސަބަބަކީ ކޮބައިތޯ ސައީދު ސުވާލު ކުރެއްވި އެވެ.
އިތުރަށް މިނިސްޓަރު ފާހަގަ ކުރެއްވީ، ކުރިން ފައިސާ ޗާޕުކުރީ މަޖިލީހުގައި ތިއްބެވި އިދިކޮޅު މެންބަރުން ފައިސާ ޗާޕުނުކުރުމަށް އާދޭސްކުރައްވަނިކޮށް ކަމުގައެވެ. ނަމަވެސް އެކަމަށް ރިއާޔަތްނުކުރައްވައި، ދައުލަތުގެ ހަރަދަށް ޒިންމާވުމުގެ ގާނޫނުގެ ބައެއް މާއްދާތައް ސަސްޕެންޑުކުރުމަށްފަހު އަށް ބިލިއަން ރުފިޔާ ޗާޕުކުރުމުގެ ސަބަބުން މިއަދު ދިވެހި ރުފިޔާ ނިކަމެތިވެ، ޑޮލަރުގެ އަގު އިންތިހާއަށް ބޮޑުވެފައިވާކަން އޭނާ ފާހަގަ ކުރެއްވި އެވެ.
މިނިސްޓަރު ސައީދު ވަނީ އެއްވެސް ޒަމާނަކުން އިދިކޮޅު މައި ޕާޓީކަމުގައިވާ އެމްޑީޕީއަށް ރާއްޖޭގެ ވެރިކަން ލިބުނަސް ކުރިން ހެދި ގޮތަށް ގާނޫނު ސަސްޕެންޑުކުރުމަށްފަހު ފައިސާ ޗާޕުނުކުރުމަށް އެދިވަޑައިގެންފައެވެ. މިއީ މާލީ ސަލާމަތާއި އިގުތިސާދީ ހަމަޖެހުން ދެމެހެއްޓުމަށްޓަކައި މުހިންމު ކަމެއް ކަމަށް އޭނާ ވިދާޅުވިއެވެ.