ރައްޔިތުންގެ މަޖިލީހުގެ ޖުޑިޝަރީ ކޮމެޓީގެ މުގައްރިރުކަމުން މަނަދޫ ދާއިރާގެ މެމްބަރު ހުސްނީ މުބާރިކް މިއަދު އިސްތިއުފާ ދެއްވުމާ ގުޅިގެން، އެ ކޮމެޓީއަށް އާ މުގައްރިރެއް ވަނީ އައްޔަނުކޮފައެވެ. ހުސްނީ މުބާރިކްގެ އިސްތިއުފާއަށް ފަހު، ޖުޑިޝަރީ ކޮމެޓީގެ އާ މުގައްރިރުކަމަށް ހޮޅުދޫ ދާއިރާގެ މެމްބަރު އަބްދުއްސައްތާރު މުހައްމަދު ހޮވާފައިވަނީ ކޮމެޓީގެ އަޣުލަބިއްޔަތުންނެވެ.
ކުރިން ޖުޑިޝަރީ ކޮމެޓީގެ ނައިބު މުގައްރިރުގެ މަގާމުގައި ހުންނެވި ސައްތާރު، މުގައްރިރުކަމަށް ހޮވުމާއެކު، މިއަދުގެ ބައްދަލުވުމުގައި ނައިބު މުގައްރިރުގެ މަގާމަށް ވެސް ވަނީ މެމްބަރަކު އައްޔަނުކޮފައެވެ. އެގޮތުން، ފުނަދޫ ދާއިރާގެ މެމްބަރު މުހައްމަދު މަމްދޫހު ވަނީ ކޮމެޓީގެ ނައިބު މުގައްރިރުކަމަށް އައްޔަންކުރެވިފައެވެ. މި ބަދަލާއެކު، ކޮމެޓީގެ އިސް މަގާމުތައް ވަނީ ބަދަލުވެފައެވެ.
ހުސްނީ މުބާރިކް ޖުޑިޝަރީ ކޮމެޓީގެ މުގައްރިރުކަމުން އިސްތިއުފާ ދެއްވީ، އޭނާ ޖުޑީޝަލް ސާވިސް ކޮމިޝަން (ޖޭއެސްސީ) ގެ މެންބަރުކަމަށް މަޖިލީހުން ކަނޑައަޅާ މެމްބަރުގެ މަގާމަށް އިންތިހާބުވެ، އެ މަގާމާ ހަވާލުވެވަޑައިގަތުމަށެވެ. މިއަދު ރައީސް އޮފީހުގައި ބޭއްވި ރަސްމިއްޔާތެއްގައި ހުސްނީ މުބާރިކް ވަނީ ޖޭއެސްސީ މެންބަރުކަމުގެ ހުވާ ކުރައްވައި، ހުވާގެ އިގްރާރުގައި ސޮއިކުރައްވާފައެވެ. އެމަނިކުފާނަށް ހުވައިލައިދެއްވީ ދިވެހިރާއްޖޭގެ ސުޕްރީމް ކޯޓްގެ ފަނޑިޔާރު އަލީ ރަޝީދު ހުސައިނެވެ.
ޖުޑިޝަރީ ކޮމެޓީއަކީ ޖުޑީޝަލް ސާވިސް ކޮމިޝަން ވެސް ހިމެނޭ ގޮތުން ޝަރުއީ ދާއިރާގެ މަސައްކަތްތައް ބަލައި، އެ ދާއިރާ ޖަވާބުދާރީ ކުރުވުމުގެ މެންޑޭޓް އޮންނަ މުހިންމު ކޮމެޓީއެކެވެ. މަޖިލީހުގެ މުހިންމު މި ކޮމެޓީގެ އިސް މަގާމުތަކަށް އައި މި ބަދަލާއެކު، ޝަރުއީ ދާއިރާގެ ކަންކަން ކުރިއަށްދާނެ ގޮތަށް ގިނަ ބަޔަކު އަންނަނީ ސަމާލުކަން ދެމުންނެވެ.