ރާއްޖޭގެ 50 ރަށަކަށް ބޭނުންވާ އެމްބިއުލަންސް މި އަހަރުގެ ތެރޭގައި ގެނެވޭނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މީގެ އެއްމަސް ކުރިން ދެއްވި އުފާވެރި ޚަބަރު ޙަގީގަތަކަށްވާން އުޅޭކަމުގެ ފެހު ސިގްނަލް މޯލްޑިވްސް ޕޯޓްސް ލިމިޓެޑް އެމްޕީއެލް އިން ދީފިއެވެ. ސިއްހީ ވުޒާރާއިން ހަވާލުކޮށްފައިވާ 56 އެމްބިއުލަންސް ގެނައުމުގެ ޕްރޮޖެކްޓްގެ ދަށުން، ފުރަތަމަ 18 އެމްބިއުލަންސްގެ އިންސްޕެކްޝަންތައް ވަނީ ދުބާއީގައި ފުރިހަމަކޮށްފައިވާ ކަމަށް މޯލްޑިވްސް ޕޯޓްސް ލިމިޓެޑް (އެމްޕީއެލް) އިން މިއަދު ވަނީ ބުނެފައެވެ.
މިކަމާ ގުޅޭގޮތުން އެމްޕީއެލް އިން ބުނީ، މި ޕްރޮޖެކްޓްގެ ދަށުން އެންމެ ފުރަތަމަ ރާއްޖެ ގެންނަ 18 އެމްބިއުލަންސްގެ އިންސްޕެކްޝަންތައް ދުބާއީގައި ފުރިހަމަކޮށްފައިވާ ކަމަށެވެ. މި އިންސްޕެކްޝަންތައް ކުރިއަށް ގެންގޮސްފައިވަނީ އެމްޕީއެލް އަދި ހެލްތު މިނިސްޓްރީގެ އޮފިޝަލުން ހިމެނޭ ޓީމަކުންނެވެ. މިއީ އެމްބިއުލަންސްތައް ރާއްޖެ ގެނައުމުގެ ކުރިން ބޭނުންވާ މިންގަނޑުތަކަށް ފެތޭކަން ޔަގީންކުރުމަށް ކުރިއަށް ގެންދިޔަ މަސައްކަތެކެވެ.
މި އެމްބިއުލާންސްތަައް ރާއްޖެ ގެންނާނެކަމުގެ ޔަގީންކަން ރައީސް ޑރ. މުހައްމަދު މުއިއްޒު ދެއްވީ މީގެ އެއް މަސްކުރިން ތ. އޮމަދޫ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ. ރައީސް އޮމަދޫ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުން ވިދާޅުވެފައި ވަނީ، ރާއްޖޭގެ 50 ރަށަކަށް ބޭނުންވާ އެމްބިއުލަންސް މި އަހަރުގެ ތެރޭގައި ގެނެވޭނެ ކަމަށެވެ. އަދި އޮމަދޫއަށް ވެސް މި އަހަރު ނިމުމުގެ ކުރިން އެމްބިއުލަންސް ލިބޭނެ ކަމުގެ އުފާވެރި ޚަބަރު އެމަނިކުފާނު ވަނީ ދެއްވާފައެވެ.
ރައީސް ވިދާޅުވެފައިވާ ގޮތުގައި، ރައްޔިތުންނަށް ދަތުރުފަތުރުގެ ފަސޭހަތަކާއި، ސިއްހީ ޚިދުމަތުގެ ފެންވަރު ރަނގަޅުކުރުމަށް ސަރުކާރުން ޚާއްސަ އިސްކަމެއް ދެއްވައެވެ. މިގޮތުން 56 އެމްބިއުލަންސް ގެނައުމުގެ މަސައްކަތް އެމްޕީއެލް އިން ކުރިއަށް ގެންދިއުމަކީ، ރައީސްގެ ސަރުކާރުން ސިއްހީ ޚިދުމަތްތައް ރަނގަޅުކުރުމަށް ދެއްވާ އަހައްމިއްޔަތު ހާމަކޮށްދޭ ކަމެކެވެ. ފުރަތަމަ ބެޗްގެ އިންސްޕެކްޝަން ފުރިހަމަވެފައިވުމާއެކު، މި އެމްބިއުލަންސްތައް ކަނޑައެޅިފައިވާ މުއްދަތުގައި ރާއްޖެއަށް ލިބި، ރައްޔިތުންނަށް އެހީތެރިކަން ފޯރުކޮށްދިނުމުގެ އުންމީދު ވަނީ އާވެފައެވެ.