މި އަހަރުގެ މިހާތަނަށް ސޮވެރިން ޑިވެލޮޕްމެންޓު ފަންޑު (އެސްޑީއެފް) ގައި ދަރަނި އަދާ ކުރުމަށް ބޭނުން ކުރަން 100 މިލިއަން އެމެރިކާ ޑޮލަރު ރައްކާ ކޮށްފައިވާ ކަމަށް ފިނޭންސް މިނިސްޓަރު މޫސާ ޒަމީރު ވިދާޅުވެއްޖެއެވެ. މިކަން މިނިސްޓަރު ހާމަކުރެއްވީ، އަންނަ އަހަރަށް ލަފާކުރާ ދައުލަތުގެ ބަޖެޓު ރައްޔިތުންގެ މަޖިލީހަށް ހުށަހަޅުއްވައި ދެއްވަމުން އިއްވެވި ބަޖެޓު ބަޔާނުގައެވެ.
މިނިސްޓަރު ޒަމީރު ވިދާޅުވި ގޮތުގައި، ދަރަނިވެރި ނުވެ ސުކޫކު އަނބުރާ ދެއްކުމަށް ސަރުކާރުން ކުރި މަސައްކަތްތަކުގެ ތެރެއިން ސޮވެރިން ޑިވެލޮޕްމެންޓު ފަންޑު ހަމަ މަގަށް އަޅުވައި، ޑޮލަރުން މެނޭޖު ކުރާ ފަންޑަކަށް ބަދަލުކޮށްފައިވެއެވެ. އޭގެ ނަތީޖާއެއްގެ ގޮތުން، އެ ފަންޑުގައި މިއަދާ ހަމައަށް 100 މިލިއަން ޑޮލަރު ނަގުދު ފައިސާއިން ރައްކާ ކުރެވިފައިވާކަން އޭނާ ފާހަގަ ކުރެއްވިއެވެ.
“އިތުރަށް ދަރަނިވެރިނުވެ، ވިސްނުންތެރިކަމާއެކު ސުކޫކް އަނބުރާ ދެއްކުމުގެ ސިޔާސަތުގެ ދަށުން، މި ސަރުކާރުން ވާނީ ސޮވެރިން ޑިވެލޮޕްމަންޓް ފަންޑު ހަމަ މަގަށް އަޅުވައި، ޑޮލަރުން މެނޭޖު ކުރާ ފަންޑަކަށް ބަދަލު ކޮށްފައި. އެ ފަންޑުގައި މިއަދު ވެސް 100 މިލިއަން އެމެރިކާ ޑޮލަރަށް ވުރެ ގިނަ ނަގުދު ފައިސާ، ދަރަނި އަނބުރާ ދެއްކުމުގެ މުހިންމު ބޭނުމަށްޓަކައި ރައްކާ ކޮށްފައިވޭ،” މިނިސްޓަރު ޒަމީރު ވިދާޅުވިއެވެ.
އަންނަ އަހަރުގެ ބަޖެޓު ތަންފީޒުކުރުމަށް ޖުމުލަ 26.3 ބިލިއަން ރުފިޔާގެ ފައިނޭންސިންގ ހޯދަން ޖެހޭނެ ކަމަށް ލަފާ ކުރެވޭއިރު، އޭގެ ތެރެއިން 12.9 ބިލިއަން ރުފިޔާ އަކީ ދަރަނި އަދާ ކުރުމަށް ބޭނުން ކުރަން ޖެހޭ ފައިސާއެވެ. އަދި ޑެފިސިޓު ފައިނޭންސްކުރުމަށް 8.8 ބިލިއަން ރުފިޔާ ހޯދަންޖެހެއެވެ.
ބަޖެޓަށް ފައިނޭންސިންގ ހޯދުމަށް ރޭވިފައިވާ ގޮތުގެ ތަފުސީލު ހިއްސާ ކުރައްވަމުން މިނިސްޓަރު ވިދާޅުވީ، ބޭރުގެ ފަރާތްތަކުން ލޯނުގެ ގޮތުގައާއި، ބޮންޑް ނުވަތަ ސުކޫކް ފަދަ ތަކެތި ވިއްކައިގެން އަދި މަލްޓިލެޓަރަލް ނުވަތަ ބައިލެޓަރަލް ފައިނޭންސިންގގެ ގޮތުގައި ޖުމުލަ 16.8 ބިލިއަން ރުފިޔާ ހޯދުމަށް ރާވާފައިވާ ކަމަށެވެ. މީގެ ތެރޭގައި ސުކޫކު ރީފައިނޭންސްކުރުމަށް ބޭރު ފަރާތްތަކުން 450 މިލިއަން ޑޮލަރު (6.9 ބިލިއަން ރުފިޔާ) ހޯދުމާއި، އެކުވެރި ގައުމުތަކުން ބަޖެޓު ސަޕޯޓަށް 300 މިލިއަން ޑޮލަރު (4.6 ބިލިއަން ރުފިޔާ) ހޯދުން ހިމެނެއެވެ.
އެސްޑީއެފްއަށް ޖަމާކުރާ ފައިސާއިން ވަކި އަދަދެއް ދައުލަތުގެ ދަރަނި ދެއްކުމަށް ކަނޑައަޅައިގެން 4.2 ބިލިއަން ރުފިޔާގެ ދަރަނި އެ ފައިސާއިން ދެއްކުމަށް ރާވާފައިވާކަމަށްވެސް މިނިސްޓަރު ޒަމީރު ވިދާޅުވިއެވެ. މީގެ އިތުރުން، ބަޖެޓު ފައިނޭންސްކުރުމަށް ރާއްޖޭގެ މާލީ އިދާރާތައް ހިމެނޭ ގޮތަށް ޑޮމެސްޓިކް މާކެޓުން ޖުމްލަ ފަސް ބިލިއަން ރުފިޔާ ހޯދޭނެ ކަމަށް ލަފާކުރައްވާ ކަމަށްވެސް އޭނާ ހާމަކުރެއްވިއެވެ.