ރާއްޖޭގައި ކަށިމިޔަރުގެ މަސްވެރިކަން ކުރުމަށް ހުއްދަ ދިނުމާއެކު، އެ މަސްވެރިކަން ރާވައި ހިންގައި ބެލެހެއްޓުމާ ބެހޭ ގަވާއިދު، މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން މިއަދު އާންމުކޮށްފިއެވެ. މި ގަވާއިދު އާންމުކުރީ، ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކުރިން ވިދާޅުވެފައިވާ ގޮތަށް، ނޮވެމްބަރު މަހު މި މަސްވެރިކަން ފެށުމަށް ހުއްދަ ދިނުމުގެ ކުރިންނެވެ.
މަސްވެރިކަމާއި ބެހޭ ވުޒާރާއިން އާންމުކުރި “ކަށިމިޔަރުގެ މަސްވެރިކަން ރާވައި ހިންގައި ބެލެހެއްޓުމާއި، ބެހޭ ގަވާއިދު” ގައި ބުނެފައިވަނީ، މިއީ ކަށިމިޔަރުގެ މަސްވެރިކަން މެނޭޖުކުރުމުގެ ރާއްޖޭގެ ޕްލޭން ތަންފީޒުކުރުމާއި، މަސްވެރިކަމާއި ގުޅުންހުރި ހަރަކާތްތައް ރާވައި ހިންގައި ބެލެހެއްޓުމުގެ އުސޫލުތައް ކަނޑައެޅުމަށްޓަކައި، މަސްވެރިކަމުގެ ގާނޫނުގެ ދަށުން އެކުލަވާލާފައިވާ ގަވާއިދެއް ކަމަށެވެ. އަދި މި ގަވާއިދަށް ޢަމަލުކުރަން ފަށާތާ ހަ މަސް ތެރޭގައި، ކަށިމިޔަރުގެ މަސްވެރިކަން މެނޭޖުކުރުމުގެ ޕްލޭނަށް ލަފާދޭ ކޮމިޓީއެއް އެކުލަވައިލަން ޖެހޭނެ ކަމަށްވެސް އުސޫލުގައި ބަޔާންކޮށްފައިވެއެވެ.
މި ގަވާއިދުގެ ދަށުން، ކަށިމިޔަރުގެ މަސްވެރިކަމުގައްޔާއި، ޕްރޮސެސްކުރުމާއި، ސަޕްލައިކުރުމުގެ ވިޔަފާރީގައި ހަރަކާތްތެރިވާ ހުރިހާ ފަރާތްތަކުން އެކަން ކުރަންވާނީ، މިނިސްޓްރީން ދޫކުރާ ލައިސަންސްއެއްގެ ދަށުންނެވެ. ކަށިމިޔަރުގެ މަސްވެރިކަން ކުރުމުގެ ލައިސަންސް ދޫކުރެވޭނީ ގިނަވެގެން ކަނޑައެޅިފައިވާ ޖުމްލަ އަދަދެއްގެ އުޅަނދަށެވެ. ލައިސަންސްގެ މުއްދަތު ކަނޑައަޅާފައިވަނީ ކޮންމެ އަހަރެއްގެ ނޮވެންބަރު މަހުގެ ފުރަތަމަ ދުވަހުން ފެށިގެން، އަންނަ އަހަރުގެ އޮކްޓޯބަރު މަހުގެ ނިޔަލަށެވެ.
މަސްވެރިކަން ކުރާ އުޅަނދުތަކުގެ ސަލާމަތާއި، ހަރަކާތްތައް ބެލެހެއްޓުމަށްޓަކައި، މިނިސްޓްރީން ކަނޑައަޅާ މިންގަނޑަށް ފެތޭ ވެސަލް ލޮކޭޓިންގ ޑިވައިސް (ވީއެލްޑީ) އެއް އުޅަނދުތަކުގައި ހަރުކޮށް ބަލަހައްޓަން ޖެހެއެވެ. މީގެ އިތުރުން، ކަށިމިޔަރުގެ މަސްވެރިކަމުގެ ހަރަކާތްތައް ހިންގޭނީ އަތޮޅުދުނިން ބޭރުގެ ސަރަހައްދުތަކުގައި ކަމަށް ގަވާއިދުގައި ބުނެފައިވެއެވެ. އަދި މި މަސްވެރިކަން ކުރެވޭނީ މީލާދީ ކޮންމެ އަހަރަކު ހަތް މަސްދުވަހަށް ވުރެ ދިގު ނޫން މުއްދަތަކަށެވެ.
މަސްވެރިކަމުގެ ހަރަކާތްތަކަށް ހާއްސަ ހުއްދަތަކެއް ކަނޑައަޅާފައިވާއިރު، ކަށިމިޔަރުގެ މަސްވެރިކަމުގައި ކަށިމިޔަރު ފިޔަވައި އެހެން އެއްވެސް ބާވަތެއްގެ މިޔަރަކަށް އަމާޒުކޮށް މަސްވެރިކަންކުރުމަކީ މަނާކަމެކެވެ. އަދި ވާނާ މަހުގެ އެއްވެސް ބައެއް، ބަނދަރަށް ގެނައުމުގެ ކުރިން، އޭގެ ހަށިގަނޑުން ވަކިކުރުމަކީ ނުވަތަ ޕްރޮސެސްކުރުމުގެ އެއްވެސް ހަރަކާތެއް ހިންގުމަކީ މަނާކަމެއް ކަމަށްވެސް އުސޫލުގައި ބަޔާންކޮށްފައިވެއެވެ. މިއީ މަސްވެރިކަމުގެ ދެމެހެއްޓެނިވިކަން ކަށަވަރުކުރުމަށް އަޅާފައިވާ ފިޔަވަޅެކެވެ.