ނިލަންދޫ ކައުންސިލް ރާވެރިޔާ ވޮލީ މުބާރާތުގެ ފުރަތަމަ މެޗުގައި ބޮން ބޮން ލެޖެންޑުންގެ މައްޗަށް ފަސޭހަ މޮޅެއް ހޯދައި މުބާރާތުގެ ފެށުން ރަނގަޅު ކޮށްފިއެވެ.
ނިލަންދޫ ރަސްމީ ވޮލީކޯޓުގައި ކުރިއަށްދިޔަ މި މެޗު އެޓީމުން ކާމިޔާބު ކުރީ ސީދާ 3 ސެޓުންނެވެ.
މެޗުގެ ފުރަތަމަ ސެޓުގައި ގެމަނަފުށީގެ ވޮލީ ޓީމުން ދިޔައީ މޮޅަށް ކުޅެމުންނެވެ. ގައުމީޓީމްގެ ކުޅުންތެރިޔާ ހުޒަންޓޭގެ ބާރު ހަމަލާތައް ދިފާއު ކުރުމުގައި ބޮންބޮން އަށް ކާމިޔާބެއް ނުވެއެވެ. ފުރަތަމަ ސެޓު ތަފާތު ބޮޑުކޮށް 25-12 އިން ގެންދިޔައެވެ.
ދެވަނަ ސެޓުގައި ގެމަނަފުށި ފެނިގެން ދިޔައީ ތަފާތު މޮޅުކޮށެވެ. މި ސެޓުގައި ވެސް އަލީ ހުޒާމް، އަދި ގައުމީ ޓީމްގެ ކުޜީގެ ކުޅުންތެރިޔާ އަލީ އަކްބަރުގެ މޮޅު ކުޅުންފެނިގެން ގޮސްފައިވެއެވެ. މިސެޓުވެސް ގެންދިޔައީ ތަފާތު ބޮޑުކޮށް 25-8 އިންނެވެ. 3 ވަނަ ސެޓުގައި ބޮންބޮން ލެޖެންޑުން ގެ ފަރާތުން މާ އެދެވޭ ކުޅުމެއް ފެނިގެން ގޮސްފައި ނުވާއިރު މި ސެޓު ވެސް ތަފާތު ބޮޑުކޮށް 25-10 އިން ނަގައި މެޗް ކާމިޔާބު ކުރިއެވެ.
މި މެޗުގެ މޮޅު ކުޅުންތެރިޔަކަށް ހޮވުނީ ގެމަނަފުށީ ވޮލީ ކުލަބުގެ ޖޯޒީ ނަންބަރު 12 އަލީ ހުޒާމް ( ހުޒަންޓޭ ) އެވެ.
ރާވެރިޔާ ވޮލީ މުބާރާތުގެ ގަވާއިދުގައި ކޮންމެ ޓީމަކަށްވެސް ރަށުންބޭރު އެއްކުޅުންތެރިޔަކަށް ފުތިސަތު ދީފައިވާއިރު ގައުމީ ޓީމްގެ ކުޅުންތެރިންނަށްވެސް ވަނީ ފުރިސަތު ދީފައެވެ.
މުބާރާތުގެ ފިރިހެން 6 ޓީމް ބަހާލައިފައިވަނީ 2 ގުރޫޕަކަށެވެ. ގްރޫޕް އޭގައި ހިމެނެނީ ގެމަނަފުށި ވޮލީބޯލް ކުލަބު، ބޮންބޮން ސްޕޯޓްސް ކްލަބް ލެޖެންޑްސް، އަދި އެންމެ ފަހުގެ ޗެމްޕިއަން ޓޮޕް ބްރަދާސް އެވެ.
ގްރޫޕް ބީގައި ހިމެނެނީ ބޮންބޮން ސްޕޯޓްސް ކުލަބު، މަރަޓާ ވޮލީބޯލް ޓީމް، އަދި ދަ ރެޒިޑެންސް މޯލްޑިވްސްއެވެ.
މި މުބާރާތުގައި އަންހެން ޑީވިޝަންގެ 4 ޓީމް ބައިވެރިވެފައި ވުމާއިއެކު މި ޑިވިޝަން ކުރިއަށްދާނީ ލީގު އުސޫލުންނެވެ. މުބާރާތުގައި ބައިވެރިވެފައިވާ ޓީމްތަކަކީ އެންމެ ފަހުގެ ގެމަނަފުށި ވޮލީބޯލް ކުލަބު، ގއ މާމެންދޫ ވުމެންސް ޓީމް، ވިލިނގިލީ ޔުނައިޓެޑް ކުލަބު، އަދި ބޮންބޮން ސްޕޯޓްސް ކުލަބެވެ.
އަންހެން ޑިވިޝަންގެ ފުރަތަމަ މެޗުގައި ވާދަކުރާނީ މާމެންދޫ ވޮލީ ޓީމް އަދި ވިލިނގިލީ ޔުނައިޓެޑް ކުލަބެވެ. މި މެޗް އޮންނާނީ 2 ނޮވެމްބަރ 2025 ގެ ހަވީރު 16:00 ގައެވެ.
އެންމެ ފަހުން ބޭއްވުނު މުބާރާތުގެ އަންހެން ޑިވިޝަންގެ ޗެމްޕިއަން ޓީމަކީ ގއ ގެމަނަފުށީ ވޮލީ ކުލަބެވެ. އަދި ފިރިހެން ޗެމްޕިއަން ޓީމަކީ ގއ ނިލަންދޫ ޓޮޕް ބްރަދާސްއެވެ.
މިމުބާރާތް ކުރިޔަށް ގެންދިޔުމަށް ހަމަޖެހިފައިވަނީ އަންހެން އަދި ފިރިހެން ދެ ޑިވިޝަނަށް ބަހާލައިގެންނެވެ. އަދި ކޮންމެ ޑިވިޝަނެއްގެ ޗެމްޕިއަން ޓީމަށް 50،000 ( ފަންސާސް ހާސް ) ރުފިޔާގެ އަދި ކޮންމެ ޑިވިޝަނެއްގެ ރަނަރަޕް ޓީމަށް 25،000 (ފަންސަވީސް ހާސް) ރުފިޔާގެ ފައިސާގެ އިނާމް ދިނުމަށްވަނީ ހަމަޖެހިފައެވެ.
މި މުބާރާތަކީ ހުވަދު އަތޮޅުގައި އެންމެ ޒަމާންވީ އެއްމުބާރާތެވެ. އަދި ރާއްޖޭގައި ފާހަގަކޮށްލެވޭ މޮޅެތި ކުޅުންތެރިން ރާވެރިޔާ މުބާރާތުގައި ކުޅެމުންދެއެވެ. އެގޮތުން މި ފަހަރުގެ މުބާރާތުގައި ރާއްޖޭގެ ގައުމީ ވޮލީ ކުޅުންތެރިން ކަމުގައި ވާ ޝަމާއިލް ،ހުޒާމް، ޝާމިލް، ނިމާލް ( ބުޅިކޭ ) ކުޅޭނެއެވެ. އަދި މީގެ އިތުރުން އަޒީމް ވެސް މި މުބާރާތުގައި ކުޅޭނެއެވެ. އަންހެން ޑިވިޝަންގައި ވެސް ރާއްޖޭގެ މޮޅު ކުޅުންތެރިންގެ ކުޅުން ފެނިގެން ދާނެއެވެ. މީގެ ތެރޭގައި ރާއްޖޭގެ ގައުމީ އަންހެން ކެޕްޓަން މާޖިދާ، މާޔާ، ހައްވަ، އަދި ރަފާގެ ކުޅުން ފެނިގެން ދާނެއެވެ.