ރާއްޖޭގެދަނޑުވެރިކަމުގެ އުފެއްދުންތަކަށް ޚާއްޞަކޮށް، ކާބޯތަކެތީގެ ރައްކާތެރިކަމުގެ މިންގަނޑުތަކަށް ފެތޭ ޕެކޭޖިންގ ނިޒާމެއް ތަޢާރަފުކުރުމުގެ މަސައްކަތް ސަރުކާރުން ކުރަމުން އަންނަކަމަށް، ދަނޑުވެރިކަމާއި ދިރޭތަކެއްޗާ ބެހޭ ވަޒީރު ޑރ. މަރިޔަމް މާރިޔާ ވިދާޅުވެއްޖެއެވެ. ވަޒީރު މިކަން ހާމަކުރެއްވީ ހއ. ހަނިމާދޫގައި ސްމޯލް އައިލެންޑް ޖިއޮގްރަފިކް ސޮސައިޓީ (ސިގްސް) އިން ޤާއިމުކުރި ބަޔޯޕްލާސްޓިކް ކޮތަޅު އުފެއްދުމުގެ މަރުކަޒު ހުޅުއްވައިދެއްވާ ދެއްކެވި ވާހަކަފުޅުގައެވެ.
ވަޒީރު ޑރ. މާރިޔާ ވިދާޅުވީ ދިވެހިރާއްޖޭގެ ސާފު ކަނޑުތަކާއި ނާޒުކު ވެއްޓަށް ތިމާވެށި ހީނަރުވުމުގެ ބޮޑެތި ގޮންޖެހުންތަކާ ކުރިމަތިލާންޖެހިފައިވާކަމަށެވެ. ސިގްސްއިން ކުރިއަށް ގެންދިޔަ ދިރާސާއަކުން ހާމަވެފައިވާ ގޮތުގައި، ހުޅުމާލޭގައި ދިރިއުޅޭ ގޭބިސީތަކުން އެކަނިވެސް އަހަރަކު 3 މިލިޔަނަށްވުރެ ގިނަ ޕްލާސްޓިކް ކޮތަޅު ބޭނުންކުރާކަމަށާއި، މި ކޮތަޅުތައް މުޅިން ފަނާވުމަށް 20 އަހަރު ހޭދަވާކަމަށް ވިދާޅުވިއެވެ. މިފަދަ ނުރައްކާތަކުން ރައްކާތެރިވުމަށް ދެމެހެއްޓެނިވި ހައްލުތައް ހޯދުމުގެ މުހިންމުކަން ވަޒީރު ފާހަގަކުރެއްވިއެވެ.
ތިމާވެށީގެ ނުރައްކާތަކުގެ އިތުރުން، ސައިންޓިފިކް ދިރާސާތަކުގެ އެންމެ ފަހުގެ ހޯދުންތަކުން ކަންބޮޑުވުން އުފެދޭ ހަގީގަތެއް ޢިލްމީގޮތުން ކަށަވަރުކޮށްދީފައިވާކަމަށް ޑރ. މާރިޔާ ވިދާޅުވިއެވެ. އެއީ މައިކްރޯޕްލާސްޓިކް ކުނޑިތައް އިންސާނުންގެ ހަށިގަނޑުގެ ގުނަވަންތަކުގައާއި ލޭގެ ނިޒާމުގައި ދައުރުވާ ކަމުގެ ހެކިތަކެވެ. މި ނުރައްކާތެރި މާއްދާތައް އިންސާނުންގެ ހަށިގަނޑަށް ވަންނަނީ ނޭވާލާ ނިޒާމާއި، ކާނާ އަދި ބޯފެން މެދުވެރިކޮށްކަމަށް ވިދާޅުވެ، މިއީ ދުޅަހެޔޮ ޞިއްޙަތަށް ކުރިމަތިވެފައިވާ ބޮޑު ނުރައްކަލެއްކަން ފާހަގަކުރެއްވިއެވެ.
ހަނިމާދޫގައި ޤާއިމުކުރި ބަޔޯޕްލާސްޓިކް މަރުކަޒަކީ މިފަދަ ގޮންޖެހުންތަކަށް ޢަމަލީ ހައްލެއް ހޯދުމުގެ މަސައްކަތުގެ ނަމޫނާއެއްކަމަށް ވަޒީރު ވިދާޅުވިއެވެ. މިތަނުން އުފައްދާ ބަޔޯޕްލާސްޓިކް ކޮތަޅުތަކަކީ އާންމު ޕްލާސްޓިކް ކޮތަޅުތަކެކޭ އެއްފަދައިން ބޭނުންކުރެވޭނެ، އެހެންނަމަވެސް ތިމާވެށްޓާ ރައްޓެހި އަދި ގުދުރަތީގޮތުން މުޅިން ފަނާވެދާނެ ބާވަތެއްގެ ތަކެއްޗެވެ. މިއީ ދެމެހެއްޓެނިވި ހައްލުތަކަކީ މުޖުތަމަޢުގެ ޢަމަލީ ދިރިއުޅުމާ ގުޅިލާމެހިފައިވާ ހައްލުތަކަކަށް ވާންޖެހޭކަމުގެ ހެއްކެއްކަމަށް ޑރ. މާރިޔާ ވިދާޅުވިއެވެ.
ސިގްސްއިން ދިވެހިރާއްޖޭގެ ދަނޑުވެރިކަމުން އުފެދޭ ކުންޏާއި ގޭބިސީތަކުން އުފެދޭ ކުނި މެނޭޖްކުރުމަށް ދިރާސާކުރުމާއި، ދެމެހެއްޓެނިވި އާދަތައް ކުރިއެރުވުމުގެ މަސައްކަތް ކުރިއަށް ގެންދާކަން ވަޒީރު ފާހަގަކުރެއްވިއެވެ. މިފަދަ އިސްނެގުންތަކަކީ ކާބޯތަކެތީގެ އިސްރާފު މަދުކުރުމުގެ މަސައްކަތްތަކާ ގުޅިލާމެހިފައިވާ ކަންކަމަށްވާއިރު، މިއީ ބޭރުގެ އިމްޕޯޓަށް ބަރޯސާވުން މަދުކޮށް، ޤައުމުގެ އިޤްތިޞާދީ ފުދުންތެރިކަން އިތުރުކުރުމަށް އެޅޭ މުހިންމު ފިޔަވަޅުތަކެއްކަމަށް ވިދާޅުވިއެވެ.
ވަޒީރު ޑރ. މާރިޔާ ވިދާޅުވީ، ކާބޯތަކެތީގެ ރައްކާތެރިކަމުގެ މިންގަނޑުތަކަށް ފެތޭ ޕެކޭޖިންގ ނިޒާމެއް ތަޢާރަފުކުރުމަކީ، ތިމާވެށްޓާ ރައްޓެހި، ދެމެހެއްޓެނިވި ތަރައްޤީގެ ނިޒާމެއް ޤާއިމުކުރުމަށް އެޅޭ ހަރުދަނާ ފިޔަވަޅުތަކުގެ ތެރެއިން މުހިންމު ފިޔަވަޅެއްކަމަށެވެ. އަދި މި ބަޔޯޕްލާސްޓިކް މަރުކަޒުގެ މަޝްރޫޢަކީ، ވޯލްޑް ބޭންކްގެ “ޕްލީޒް” އިނީޝިއޭޓިވްގެ ދަށުން މާލީ އެހީތެރިކަން ލިބި، ސެކެޕް އަދި ޔުނޮޕްސްއާ ގުޅިގެން ތަންފީޒުކުރެވިފައިވާ ފާހަގަކޮށްލެވޭ ޚާއްޞަ މަޝްރޫޢެއްކަން ވެސް އެކަމަނާ ފާހަގަކުރެއްވިއެވެ.