ނޮވެންބަރު 3 ސާބިތު ކޮށްދެނީ ޖާނާއި ލެއިން ޤުރުބާންވާން ތިބި ޢަޒުމު ވަރުގަދަ ދަރީން އަބަދުވެސް މި ފަސްގަނޑުގައި ތިބޭނެކަންކަމަށް ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުޙައްމަދު ވިދާޅުވެއްޖެއެވެ. އެކަމަނާ މިފަދައިން ވިދާޅުވީ މިއަދު ފާހަގަ ކުރަމުންދާ ނަޞްރުގެ ދުވަހުގެ މުނާސަބަތުގައި ސޯޝަލް މީޑިއާގައި ހިއްސާކުރެއްވި ޕޯސްޓެއްގައެވެ.
އެކަމަނާ ފާހަގަކުރެއްވި ގޮތުގައި، ނޮވެންބަރު 3 ސާބިތު ކޮށްދެނީ ދިވެހީންގެ ކެރުމާއި ހިތްވަރު، އަދި ޤައުމަށާއި ދީނަށް އޮތް ލޯތްބާއި ވަފާތެރިކަންކަމެވެ. ހަމައެހެންމެ، ޤައުމީ ކޮންމެ ކަމެއްގައި ދިވެހީންނަކީ އީމާންތެރި، އެއްބައިވަންތަ ބަޔެއްކަން މިދުވަހުން ހާމަވެގެންދެއެވެ. ރައީސުލްޖުމްހޫރިއްޔާގެ އަނބިކަނބަލުންގެ ޕޯސްޓް ނިންމަވާލެއްވީ ތާއަބަދުމެ ނަޞްރާއި ނަސީބު، ފާގަތިކަމާއި ހަމަޖެހުން މި ޤައުމުގައި ދެމެހެއްޓެވުން އެދި ދުޢާކުރައްވަމުންނެވެ.
ދިވެހިރާއްޖޭގައި ނަޞްރުގެ ދުވަސް ފާހަގަކުރަނީ 1988 ވަނަ އަހަރުގެ ނޮވެންބަރުމަހުގެ 3 ވަނަ ދުވަހު ރާއްޖެއަށް ދިން ނުރައްކާތެރި ޢުދުވާނީ ހަމަލާ ނާކާމިޔާބުކޮށްލާ، ޢަދާވަތްތެރިންގެ މައްޗަށް ދިވެހީން ހޯދި މަތިވެރި ނަޞްރު ފާހަގަކުރުމުގެ ގޮތުންނެވެ. އެއީ ދިވެހި ރައްޔިތުންގެ އެއްބައިވަންތަކަމާއި، ދިވެހި ސިފައިންގެ ހިތްވަރުގަދަ ޤުރުބާނީގެ ދުވަހެކެވެ. އެ ޢުދުވާނީ ހަމަލާ މާތްﷲގެ ވާގިފުޅާއެކު ނާކާމިޔާބުކޮށްލީ ދިވެހީންގެ ހިތްވަރާއި ހިންމަތާއި މިންނަތުންނެވެ.
ނުރައްކާތެރި މި ނިރުބަވެރި ހަމަލާގައި ދިވެހީންގެ ލެއާއި ފުރާނައިން މި ޤައުމަށްޓަކައި ވަނީ ޤުރުބާންވެފައެވެ. މި ހަމަލާގައި ޖުމްލަ 19 ދިވެހި ރައްޔިތުން ޝަހީދުވިއެވެ؛ އޭގެތެރޭގައި 8 ހިތްވަރުގަދަ ސިފައިންނާއި 11 އާންމު ރައްޔިތުން ހިމެނެއެވެ. އަދި 39 ދިވެހީން ޒަޚަމުވެ، އެތައް ބަޔަކަށް ޖިސްމާނީގޮތުންނާއި ނަފުސާނީގޮތުން ބޮޑެތި ގެއްލުންތައް ލިބިގެންދިޔައެވެ. މި ނަޞްރުގެ ދުވަހަކީ ދިވެހީންގެ އެއްބައިވަންތަކަމުގެ ރަމްޒެކެވެ.