ރާއްޖޭގެ ދިފާޢުގައި ޝަހީދުވި ދިވެހި ސިފައިންނާއި ރައްޔިތުންގެ ހަނދާން އާކޮށް، ގައުމީ ފަޚުރުވެރިކަން ދިރުވައި އާލާކުރުމުގެ ގޮތުން ފާހަގަކުރާ ނަޞްރުގެ ދުވަހުގެ ރަސްމީ ހަރަކާތްތައް މިއަދު ފަށައިފިއެވެ. މިހަރަކާތްތައް ފެށުނީ އިސްލާމީ މަރުކަޒުގައި ރައީސުލްޖުމްހޫރިއްޔާ ޑރ. މުޢިއްޒު ބައިވެރިވެވަޑައިގެންނެވި ފަތިސްނަމާދުގެ ޖަމާޢަތާއެކުގައެވެ.
މިއަދު، 2025 ނޮވެންބަރު 3 (ހޯމަ ދުވަސް) ގައި ކުރިއަށްދިޔަ ރަސްމީ ހަރަކާތްތަކުގެ ތެރޭގައި ހެނދުނު 6:00 ގައި 3 ނޮވެންބަރުގެ ހަނދާނީ ބިނާގައި ދިދަ ޖެހުމާއި، ގާޑް މައުންޓް ކުރުމުގެ ރަސްމިއްޔާތު ހިމެނެއެވެ. މީގެ އިތުރުން ހެނދުނު 9:00 ގައި ޒުވާނުންގެ މަރުކަޒު (ސޯޝަލް ސެންޓަރ) ގައި އޮތް ރަސްމީ ޖަލްސާވެސް ވަނީ ބާއްވާފައެވެ. ދިވެހިރާއްޖޭގެ ޤައުމީ ދިފާއީ ބާރު (އެމް.އެން.ޑީ.އެފް) އިން އިންތިޒާމުކޮށްގެން ހަވީރު 4:15 ގައި ޖުމްހޫރީ މައިދާނުގައި ބޭއްވި ޚާއްސަ ހަރަކާތެއްގައި، ނިރުބަވެރި ހަމަލާއެއް ނާކާމިޔާބުކޮށްލުމަށް ސިފައިން ކުރާ މަސައްކަތްތައް ހެވިކަމުގެ ހުނަރުތަކުން ވަނީ ދައްކާފައެވެ.
ނަޞްރުގެ ދުވަހުގެ މުނާސަބަތުގައި ރާއްޖޭގެ އެކި ކަންކޮޅުތަކުގައި ޚާއްސަ ހަރަކާތްތައް ކުރިއަށްގެންދިއުމުގެ ތެރެއިން، މިއަހަރުގެ ނަޞްރުގެ ދުވަހުގެ ޚާއްސަ ފޮޓޯ މައުރަޒަކާއި ސިފައިންގެ ހުށަހެޅުންތަކާއެކު ކުޑަކުދިންގެ ހަވީރެއް ބޭއްވުމަށް ހަމަޖެހިފައިވަނީ މިމަހުގެ 7 އަދި 8 ވަނަ ދުވަހު ތިނަދޫ ސިޓީގައެވެ. މި ހަރަކާތްތަކަކީ ދިވެހިރާއްޖޭގެ ޤައުމީ ދިފާއީ ބާރުން ރައްޔިތުންނާ ގުޅުން ބަދަހިކޮށް، ގައުމީ ރޫހު އާލާކުރުމަށް ކުރިއަށްގެންދާ މުހިންމު މަސައްކަތްތަކެކެވެ.
ތިނަދޫ ސިޓީގައި ބޭއްވުމަށް ހަމަޖެހިފައިވާ ހަރަކާތްތައް ތިރީގައި މިވަނީއެވެ.
7 ނޮވެންބަރު 2025 (ހުކުރު ދުވަސް)
- ހަވީރު 4:00 ގައި ގދ. އަތޮޅު ތަޢުލީމީ މަރުކަޒުގައި ސިފައިންގެ ފޮޓޯ މަޢުރަޒު ހުޅުވާ، އާންމުންނަށް ބެލުމުގެ ފުރުސަތު.
8 ނޮވެންބަރު 2025 (ހޮނިހިރު ދުވަސް)
- ހެނދުނު 9:00 ގައި ގދ. އަތޮޅު ތަޢުލީމީ މަރުކަޒުގައި ސިފައިންގެ ފޮޓޯ މަޢުރަޒު ދެމިގެންދާނެ.
- ހަވީރު 4:00 ގައި ތިނަދޫ ސިޓީ ސްޓޭޑިއަމްގައި އަސްކަރީ ހުށަހެޅުންތަކާއި ކުޑަކުދިންގެ ހަވީރެއް ބޭއްވުމަށް ހަމަޖެހިފައިވެއެވެ.
މި ހަރަކާތްތަކަށް ތިނަދޫ ސިޓީގެ ރައްޔިތުންނާއި، ޚާއްސަކޮށް ކުޑަކުދިންނަށް ދިވެހިރާއްޖޭގެ ޤައުމީ ދިފާއީ ބާރުން ވަނީ ދައުވަތު އަރުވާފައެވެ. މި ހަރަކާތްތަކުގެ ސަބަބުން ދިފާއީ ބާރާއި ރައްޔިތުންނާ ދެމެދު އޮންނަ ގުޅުން އިތުރަށް ހަރުދަނާވެ، ކުޑަކުދިންނަށް ސިފައިންގެ މަސައްކަތްތަކުން މައުލޫމާތުތަކެއް ލިބިގެންދާނެކަމަށް އުއްމީދުކުރެވެއެވެ.