ގައުމީ އެއަރލައިން މޯލްޑިވިއަންގެ ދަތުރުތައް ބަންގްލަދޭޝްގެ ވެރިރަށް ޑާކާއަށް އަލުން ފެށުމަށް ނިންމައި، އެކަމަށްޓަކައި ބޭނުންވާ މަސައްކަތްތައް ފަށައިފިއެވެ. މިގޮތުން، މޯލްޑިވިއަނުން ވަނީ ބަންގްލަދޭޝްގައި އެ ކުންފުނީގެ ޖެނެރަލް ޕެސެންޖަރ ސޭލްސް އެޖެންޓެއް (ޖީ.އެސް.އޭ) ހޯދުމަށް އިޢުލާނުކޮށްފައެވެ. މިއީ މޯލްޑިވިއަންގެ ބައިނަލްއަޤްވާމީ ދަތުރުތަކުގެ ވިއުގަ އިތުރަށް ފުޅާކުރުމަށް ކުރާ މަސައްކަތެކެވެ.
މޯލްޑިވިއަނުން ކޮށްފައިވާ އިޢުލާނުގައިވާ ގޮތުން، ބަންގްލަދޭޝްގައި ޖީ.އެސް.އޭގެ ހިދުމަތް ދިނުމަށް ޝައުޤުވެރިވާ ފަރާތްތަކަށް އެ ފުރުސަތު ވަނީ ހުޅުވާލާފައެވެ. މި މަޤާމަށް އެދި ހުށަހެޅުމުގެ ސުންގަޑިއަކީ މިމަހުގެ 6 ވަނަ ދުވަހުގެ ކުރިންނެވެ. ޖީ.އެސް.އޭ ހަމަޖެއްސުމަކީ ދަތުރުތައް އަލުން ފެށުމަށްޓަކައި ކުރަންޖެހޭ އެންމެ މުހިންމު އެއް ކަމެވެ.
މޯލްޑިވިއަނުން މީގެ ކުރިންވެސް ބަންގްލަދޭޝްގެ ޑާކާއަށް ދަތުރުތައް ބާއްވާފައިވެއެވެ. ނަމަވެސް މިދިޔަ އަހަރުގެ އޮގަސްޓް މަހުގެ ތެރޭގައި އެ ދަތުރުތައް ވަނީ ވަގުތީ ގޮތުން މެދުކަނޑާލާފައެވެ. އެއީ އޭރު ބަންގްލަދޭޝްގެ ސިޔާސީ މަޝްރަހު ހަލަބޮލިވެ، ދަތުރުފަތުރުގެ ހާލަތަށް ބަދަލުތަކެއް އައުމާ ގުޅިގެންނެވެ. ދަތުރުތައް މެދުކަނޑާލުމުގެ ކުރިން ކޮންމެ ހަފްތާއަކުވެސް މޯލްޑިވިއަންގެ ދަތުރުތައް ޑާކާއަށް ބާއްވަމުން ދިޔައެވެ.
ބަންގްލަދޭޝަށް ދަތުރުތައް އަލުން ފެށުމަށް ނިންމާފައިވާއިރު، މޯލްޑިވިއަނުން މިހާރުވެސް ބައިނަލްއަޤްވާމީ ދަތުރުތައް ކުރަނީ އިންޑިއާ އަދި ޗައިނާއަށެވެ. މި ދެ ޤައުމުގެ ޖުމްލަ ފަސް މަންޒިލަކަށް މޯލްޑިވިއަންގެ ދަތުރުތައް މިހާރު ދަނީ ބާއްވަމުންނެވެ. މީގެ އިތުރުން، ޗުއްޓީ ދުވަސްތަކާ ދިމާކޮށް ބައެއް އެހެން މަންޒިލްތަކަށްވެސް ސީޒަނަލް ދަތުރުތައް މޯލްޑިވިއަނުން ބާއްވަމުން ގެންދެއެވެ.