ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ފުވައްމުލަކު ސިޓީއަށް ވަޑައިގެންނެވުމުން އެ ރަށުގެ ރައްޔިތުން އެމަނިކުފާނަށް ހޫނު މަރުޙަބާއެއް ދަންނަވައިފި އެވެ.
މި ދަތުރުފުޅަކީ ފުވައްމުލަކު ސިޓީއާއި އައްޑޫ ސިޓީއަށް ކުރައްވާ ދެ ދުވަހުގެ ރަސްމީ ދަތުރުފުޅެކެވެ. ރައީސުލްޖުމްހޫރިއްޔާ މި ދަތުރުފުޅުގައި ފުރާވަޑައިގެންނެވީ މިއަދު ހަވީރު ކަމަށް ރައީސް އޮފީހުން މަޢުލޫމާތު ދެ އެވެ. ފުރަތަމަ މަންޒިލެއްގެ ގޮތުން އެމަނިކުފާނު ވަޑައިގެންނެވީ އަށް އަވަށުގެ މައްޗަށް އެކުލެވޭ ފުވައްމުލަކު ސިޓީއަށެވެ.
ރައީސުލްޖުމްހޫރިއްޔާ އެ ސިޓީއަށް ވަޑައިގެންނެވިއިރު އެމަނިކުފާނަށް އިސްތިޤުބާލު ދެންނެވުމަށް އެއަރޕޯޓް ސަރަހައްދަށް ގިނަ އަދަދެއްގެ ރައްޔިތުން ޖަމާވެފައިވެ އެވެ. ރައީސުލްޖުމްހޫރިއްޔާ ވަނީ އެތަނަށް ޖަމާވެފައި ހުރި ހުރިހާ ރައްޔިތުންނާ ސަލާމް ކުރައްވާފަ އެވެ. އަދި ބައެއް ރައްޔިތުންގެ ކަންބޮޑުވުންތައް ހިއްސާ ކުރެއްވުމުން އެ ވާހަކަތައް ވެސް އެއްސެވި އެވެ. މީގެ އިތުރުން ބައެއް އާންމުންނާއެކު އެމަނިކުފާނު ފޮޓޯ ނަންގަވާފައިވެ އެވެ.
މި ދަތުރުފުޅުގެ ތެރެއިން ފުވައްމުލަކު ސިޓީގައި ބައެއް މަޝްރޫޢުތައް ރަސްމީކޮށް އިފްތިތާޙު ކޮށްދެއްވުމަށް ވަނީ ހަމަޖެހިފަ އެވެ. އަދި މުހިންމު ބައެއް މަޝްރޫޢުތައް ރަސްމީކޮށް ފައްޓަވައިދެއްވުމަށް ވެސް ވަނީ ހަމަޖެހިފަ އެވެ. މި މަޝްރޫޢުތަކުގެ ތަފްސީލުތައް އެމަނިކުފާނުގެ ދަތުރުފުޅުގެ ތެރެއިން ފަހުން ހާމަކުރައްވާނެ އެވެ.
ދަތުރުފުޅުގެ އެންމެ މުހިންމު އެއް ބަޔަކީ އެ ރަށުގެ ރައްޔިތުންނާއި ބައްދަލުކުރެއްވުމަށް މިރޭ ބާއްވާ ޚާއްސަ ޖަލްސާ އެވެ. މި ޖަލްސާގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވާހަކަފުޅު ދައްކަވައި، ފުވައްމުލަކު ސިޓީއަށް ޚާއްސަ ބައެއް ތަރައްޤީގެ މަޝްރޫޢުތައް އިޢުލާނު ކުރެއްވުމަށް ވަނީ ހަމަޖެހިފަ އެވެ. މި ޖަލްސާއަށް އެ ސިޓީގެ ގިނަ އަދަދެއްގެ ރައްޔިތުން ޖަމާވާނެ ކަމަށް ލަފާކުރެވެ އެވެ.
ރައީސުލްޖުމްހޫރިއްޔާގެ މި ދެ ދުވަހުގެ ދަތުރުފުޅުގެ ދެވަނަ މަންޒިލަކީ އައްޑޫ ސިޓީ އެވެ. އައްޑޫ ސިޓީއަށް އެމަނިކުފާނު ވަޑައިގަތުމަށް ހަމަޖެހިފައިވަނީ މާދަމާގެ ވަގުތެއްގަ އެވެ. އެ ސިޓީގައި ވެސް ތަރައްޤީގެ ބައެއް މަޝްރޫޢުތައް އިފްތިތާޙުކޮށް، ރައްޔިތުންނާ ބައްދަލުކުރެއްވުމަށް ވަނީ ހަމަޖެހިފަ އެވެ.