ހަނިމާދޫ އިންޓަރނޭޝަނަލް އެއަރޕޯޓުގެ އައު ޓަރމިނަލް ހުޅުވުމަށް ވާންޖެހޭ އެންމެ ފަހުގެ ތައްޔާރީތައް ބާރު ދުވެއްޔެއްގައި ކުރިއަށްދާކަމަށް މޯލްޑިވްސް އެއަރޕޯޓް ކޮމްޕެނީ ލިމިޓެޑް (އެމްއޭސީއެލް) އިން ވަނީ ހާމަކުރައްވާފައެވެ. އައު ޓަރމިނަލްގެ މަސައްކަތްތައް ނިންމާލެވި، މިހާރު ވަނީ ކުރީގެ ޓަރމިނަލްގެ ހުރިހާ ޚިދުމަތެއް އައު ޓަރމިނަލަށް ބަދަލުކޮށްފައެވެ. މި ޓަރމިނަލް ރަސްމީކޮށް ހުޅުވުމަށް ހަމަޖެހިފައިވަނީ މިމަހުގެ 9 ވަނަ ދުވަހުއެވެ.
އައު ޓަރމިނަލްގެ ޚިދުމަތްތައް ފެށުމުގެ އެންމެ ފަހުގެ ތައްޔާރީތަކާ ގުޅޭގޮތުން ޕީއެސްއެމް ނިއުސްއަށް މައުލޫމާތުދެއްވަމުން އެމްއޭސީއެލްގެ ޖެނެރަލް މެނޭޖަރ އިބްރާހިމް އިޔާޒް ވިދާޅުވީ، މި ޓަރމިނަލް ޑިޒައިންކުރެވިފައި ވަނީ އިންޓަރނޭޝަނަލް އަދި ޑޮމެސްޓިކް ދަތުރުވެރިންނަށްވެސް އެއް ފުރާޅެއްގެ ދަށުން ޚިދުމަތް ދެވޭ ގޮތަށް ކަމަށެވެ. އެގޮތުން، މި ދެ ބާވަތުގެ ދަތުރުވެރިންނަށް އެއްފަހަރާ އެއްފެންވަރެއްގެ ޚިދުމަތެއް ދިނުމަށްޓަކައި ކޮންޓްރެކްޓަރާއި އެހެނިހެން ފަރާތްތަކާ ވާހަކަދައްކައިގެން ފުރިހަމަކުރަންޖެހޭ ޕްރޮސީޖަރތައް ފުރިހަމަކޮށްފައިވާނެކަމަށް އޭނާ ވިދާޅުވިއެވެ.
އިޔާޒް އިތުރަށް ވިދާޅުވީ، އައު ޓަރމިނަލް ރަސްމީކޮށް ހުޅުވުމަށްޓަކައި، ޓަރމިނަލްގެ ޚިދުމަތްތަކާއި ޕްރޮސީޖާތައް ތައްޔާރުކުރުމާއި އިކުއިޕްމަންޓް އަދި މެޝިނަރީސް ޓެސްޓުކުރުމުގެ މަސައްކަތް މިހާރު ކުރިއަށްދާކަމަށެވެ. އަދި އައު ޓަރމިނަލްގެ ޚިދުމަތް ދިނުމަށް ބޭނުންވާ މުވައްޒަފުން ތަމްރީނުކުރުމާއި، ބައިނަލްއަޤުވާމީ އަދި ސިވިލް އެވިއޭޝަންގެ މިންގަނޑުތަކަށް އެއަރޕޯޓުގެ އޮޕަރޭޝަންސްތައް ފެއްތުމަށް ކުރަންޖެހޭ ހުރިހާ މަސައްކަތެއްގެ އެންމެ ފަހުގެ މަރުހަލާތައް ކުރިއަށްދާކަން އޭނާ ފާހަގަކުރެއްވިއެވެ. އޭނާ ވިދާޅުވީ، “މި ޓަރމިނަލުން ފޯރުކޮށްދެވޭ ޚިދުމަތްތަކަކީ ޓޮޕް ޓިއާ ޚިދުމަތްތަކަށް ހެދުމަށް އަޅުގަނޑުމެން އެބަޖެހޭ މީހުން ބިނާކުރަން. އަލަށް މިތަނަށް ސްޓާފުން ވައްދައިގެން އަދި މިތަނުގައި މިހާރު ތިބި ސްޓާފުންނަށް ހުރިހާ އިކުއިޕްމެންޓު ބޭނުންކުރަމުންދާ ގޮތުގެ ޓްރެއިނިންގްވެސް މިހާރު މިދަނީ ދެމުން. އިރާދަކުރެއްވިއްޔާ 9ގައި މި އެއަރޕޯޓު ހުޅުވާއިރު އެއަރޕޯޓުގައި ބޭނުންކުރަމުންދާ ހުރިހާ އިކުއިޕްމެންޓެއް ބޭނުންކުރަމުންދާނީ ހަމަ މިރަށު މީހުން.”
ހަނިމާދޫ އިންޓަރނޭޝަނަލް އެއަރޕޯޓުގެ އައު ޓަރމިނަލް ހުޅުވިގެން ދިއުމާއެކު، މި ޓަރމިނަލުން އޭ320 އަދި ބޮއިންގ 737 މަރުކާގެ ފްލައިޓްތަކަށް ޚިދުމަތް ދެވޭނެއެވެ. މީގެ އިތުރުން، އެ އެއަރޕޯޓްގައި އެއްފަހަރާ 9 ފްލައިޓް ޕާކުކޮށްފައި ބޭއްވޭނެ އޭޕްރަންއެއް ވަނީ ތަރައްޤީކޮށްފައެވެ. އެގޮތުން މި އޭޕްރަންގައި އެއަރބަސްގެ 3 ބޯޓާއި އޭޓީއާރްގެ 6 މަތިންދާ ބޯޓް އެއްފަހަރާ ޕާކުކުރެވޭނެއެވެ. ދިވެހިވަންތަކަން ދައްކުވައިދޭގޮތަށް ފަރުމާކޮށްފައިވާ މި ޒަމާނީ ޓަރމިނަލަކީ 10،380 އަކަމީޓަރުގެ ބޮޑު ޓާމިނަލެކެވެ. ޓާމިނަލްގެ އެންމެ ތިރީ ފަންގިފިލާ ބޭނުންކުރާނީ އެތެރޭގެ އުދުހުންތަކަށް ކަމަށާއި، މަތީ ފަންގިފިލާ ބޭނުންކުރާނީ އިންޓަރނޭޝަނަލް ދަތުރުތަކަށް ކަމަށް އެމްއޭސީއެލްއިން ބުނެއެވެ. ހަނިމާދޫ އެއަރޕޯޓަކީ އަތޮޅުތެރޭގެ އެއަރޕޯޓެއްގައި ބޭނުންކުރާ ފުރަތަމަ އެއިރޯ ބްރިޖްވެސް ޤާއިމްކޮށްފައިވާ އެއަރޕޯޓެވެ.
އެންމެ ޒަމާނީ ފެންވަރަށް ތަރައްޤީކޮށްފައިވާ މި އެއަރޕޯޓަކީ އަހަރަކު 1.3 މިލިޔަން ފަތުރުވެރިންނަށް ޚިދުމަތް ދެވޭ ފެންވަރުގެ އެއަރޕޯޓެކެވެ. އިންޑިއާގެ ޖޭއެމްސީއާ ހަވާލުކޮށްގެން ކުރިއަށްގެންދިޔަ މި މަޝްރޫޢުގެ ޢަމަލީ މަސައްކަތް ފަށާފައިވަނީ 2022 ވަނަ އަހަރުގެ ޖަނަވަރީ މަހުގެ ތެރޭގައެވެ. ހަނިމާދޫ އިންޓަރނޭޝަނަލް އެއަރޕޯޓުގެ އައު ޓަރމިނަލް ރަސްމީކޮށް ހުޅުވުމަށް ތައްޔާރުވަމުން އަންނައިރު، މިކަމުގެ ސަބަބުން އުތުރުގެ ރަށްތަކުގެ އިޤްތިޞާދަށް ބޮޑެތި ކުރިއެރުންތަކެއް ލިބޭނެކަމަށް ބެލެވެއެވެ.