ފުވައްމުލައް ސިޓީގެ ތަރައްގީއަށް މުހިންމު ދެ މަޝްރޫޢެއްގެ އެއްބަސްވުމުގައި މިރޭ ވަނީ ސޮއިކޮށްފައެވެ. އެއީ ސިޓީގައި އާ ބަނދަރެއް ތަރައްގީކުރުމާއި، އިސްލާމީ މަރުކަޒެއް ގާއިމްކުރުމުގެ މަސައްކަތެވެ. މި ދެ މަޝްރޫއުގައި ސޮއިކުރީ ރައީސް ޑރ. މުހައްމަދު މުއިއްޒު، އެ ސިޓީގެ ރައްޔިތުންނާ ބައްދަލުކުރެއްވުމަށް ބޭއްވި ޖަލްސާގައެވެ.
އައު ބަނދަރު ތަރައްގީކުރުމުގެ މަސައްކަތް
އާ ބަނދަރެއް ތަރައްގީކުރުމުގެ މަސައްކަތް ހަވާލުކުރީ ހެވީފޯސް ޕްރައިވެޓް ލިމިޓެޑްއާއެވެ. ކޮންސްޓްރަކްޝަން މިނިސްޓްރީގެ ފަރާތުން އެއްބަސްވުމުގައި ސޮއިކުރެއްވީ ގެދޮރުވެރިކަމާއި ބިނާރާ ބެހޭ ވަޒީރު ޑރ. އަބްދުﷲ މުއްތަލިބެވެ. ހެވީފޯސްގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އިބްރާހިމް ޒަމީރެވެ.
މި މަޝްރޫޢާ ގުޅޭގޮތުން ރައީސް ޑރ. މުއިއްޒު ވިދާޅުވީ، އާ ބަނދަރު ތަރައްގީ ކުރާއިރު، ސިޓީގެ ޑައިވިން އިންޑަސްޓްރީ އާއި އާންމުކޮށް ހުރިހާ ވިޔަފާރިތައް ކުރާ ފަރާތްތަކުގެ ހުރިހާ ބޭނުންތަކަށްވެސް ފުދޭ ގޮތަށް އިންޖިނިއަރިން ޑީޓެއިލް ޑިޒައިން މަސައްކަތާ އެކީގައި ނިމިގެންދާނެ ކަމަށެވެ. އަދި ބަނދަރު މިހާރަށްވުރެ މާ ބޮޑުކޮށް ހުރިހާ ފަރާތްތަކަށް ބަނދަރުގެ ބޭނުން ކުރެވޭ ގޮތަށް ބަނދަރު ނިންމައިދޭނެ ކަމުގެ ޔަގީންކަން ރައީސް ވަނީ ދެއްވައިފައެވެ.
ޒަމާނީ އިސްލާމީ މަރުކަޒު
ފުވައްމުލައް ސިޓީގައި އިސްލާމީ މަރުކަޒެއް އެޅުމުގެ މަސައްކަތް ހަވާލުކުރީ އަފާމީ މޯލްޑިވްސްއާއެވެ. އިސްލާމީ ކަންތައްތަކާ ބެހޭ ވުޒާރާގެ ފަރާތުން އެއްބަސްވުމުގައި ސޮއިކުރެއްވީ ވަޒީރު ޑރ. މުހައްމަދު ޝަހީމް އަލީ ސައީދެވެ. އަފާމީ މޯލްޑިވްސްގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު އަމީން މުހައްމަދެވެ.
މި މަރުކަޒަކީ، ސިޓީގެ ރައްޔިތުންނަށް ދީނީ އިލްމު ފެތުރުމާއި، އިޖްތިމާއީ ކަންކަމުގައި ބޭނުންކުރެވޭނެ ފުރިހަމަ މަރުކަޒެކެވެ. މަސައްކަތް ނިމިގެންދާއިރު، މި މަރުކަޒުގައި ނަމާދު ކުރާ ބައިގެ އިތުރުން، ޒަމާނީ ފެންވަރުގެ ކޮންފަރެންސް ހޯލަކާއި މުއްސަނދި ލައިބްރަރީއަކާއި ދީނީ ތަޢުލީމު ދިނުމަށް ހާއްސަ ކުލާސްރޫމްތަކެއް ހިމެނޭނެއެވެ. މީގެ އިތުރުން އިމާމު ރޫމަކާއި މަރުކަޒުގެ އޮފީސް ބައެއްވެސް ހުންނާނެއެވެ.
އެހެންކަމުން، މި މަރުކަޒަކީ ހަކަތައަށް އެންމެ އެކަށީގެންވާ ގޮތަކަށް ފަރުމާކުރެވިފައިވާ އިމާރާތަކަށް ވެގެންދާނެއެވެ. މަރުކަޒު ފުރިހަމައަށް އޭސީ ކުރެވުމުގެ އިތުރުން، ކަރަންޓުގެ ހޭދަ ކުޑަކުރުމަށްޓަކައި ސޯލާ ޕެނަލް ހަރުކުރުމަށް ވެސް ވަނީ ހަމަޖެހިފައެވެ. ފުވައްމުލައް ސިޓީގެ ރައްޔިތުންނަށް އިސްލާމީ ހަރުދަނާ އަގުތައް ދިރިއުޅުމުގެ އެންމެހައި ކަންކަމުގައި ދަމަހައްޓައި، ދީނީ އިލްމު ހޯދުމުގެ ފަސޭހަ މަގުތައް ހުޅުވައިދިނުމުގެ ގޮތުން ކުރިއަށްގެންދާ މި މަޝްރޫއަކީ ރައީސް ޑރ. މުއިއްޒު، ރިޔާސީ އިންތިހާބުގެ ކެމްޕޭނުގައި ވެވަޑައިގެންނެވި މުހިންމު ވައުދެކެވެ.