ރާއްޖޭގެ ކޮންމެ ރަށެއްގައި، ދިރިއުޅޭ ކޮންމެ ރައްޔިތަކަށްވެސް އެއް ފެންވަރެއްގައި ޚިދުމަތް ލިބެންޖެހޭނެކަމަށް ޤަބޫލުފުޅުކުރައްވާ ކަމަށާ، މީހުން ދިރިއުޅޭ ކޮންމެ ރަށެއްގައިވެސް، އަދި ރައްޔިތަކު ބޭނުންވެގެން ދިރިއުޅޭ ކޮންމެ ތަނެއްގައި، އެ ރައްޔިތަކަށްޓަކައި ސަރުކާރުން ކޮށްދޭންޖެހޭ ކަންތައްތަކެއް ހުންނާނެކަމީ އެމަނިކުފާނު ޤަބޫލުފުޅުކުރައްވާ ހަމަ ކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވިދާޅުވެއްޖެއެވެ.
ރައީސުލްޖުމްހޫރިއްޔާ މިފަދައިން ވިދާޅުވީ، އައްޑޫ ސިޓީ ހިތަދޫ، މަރަދޫ، މަރަދޫފޭދޫ އަދި ފޭދޫގެ ރައްޔިތުންނާ މިރޭ ބައްދަލުކުރައްވައި، ވާހަކަފުޅުދައްކަވަމުންނެވެ. އައްޑޫ ހައި ސްކޫލުގައި ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައި ރައީސުލްޖުމްހޫރިއްޔާ ވަނީ، އައްޑޫ ސިޓީގެ ތަރައްޤީއަށްޓަކައި މިވަގުތު އެންމެ ބޮޑަށް ބޭނުންވެފައިވާ ކަންކަން ވަކިވަކީން ފާހަގަކުރައްވައި، އެކަންކަމަށް އަވަސް ޙައްލުތައް ހޯއްދަވައިދެއްވާނެކަމުގެ ފުރިހަމަ ޔަޤީންކަން ދެއްވާފައެވެ. ރިޔާސީ އިންތިޚާބުގައި ވެވަޑައިގެންނެވި ވަޢުދުފުޅުތައް ފުއްދެވުމާ ސީދާ ގޮތުން ގުޅިފައިވާ މަޝްރޫޢުތަކުގެ އިތުރުންވެސް، ރައްޔިތުންގެ ލާބައާ މަންފާއަށްޓަކައި ގިނަގުނަ މަސައްކަތްތަކެއް އަދުގެ ސަރުކާރުން ކުރައްވަމުން ގެންދަވާކަމުގައިވެސް އެމަނިކުފާނުގެ ވާހަކަފުޅުގައި ފާހަގަކުރެއްވިއެވެ.
އައްޑޫ ސިޓީއަށް ދިމާވެފައިވާ އެންމެ ބޮޑު މައްސަލައަކީ ކަރަންޓުގެ މައްސަލަކަމުގައި ފާހަގަކުރައްވަމުން ރައީސުލްޖުމްހޫރިއްޔާ ވަނީ، ވަށާޖެހޭ ދާއިމީ ޙައްލެއް މިކަމަށް ހޯއްދަވައިދެއްވާނެކަމުގައި ވިދާޅުވެފައެވެ. އެގޮތުން 30 މެގަވޮޓްގެ ކަރަންޓު ކެޕޭސިޓީ ގާއިމުކުރުމަކީ އެމަނިކުފާނުގެ ސަރުކާރުން ކުރައްވާނެ ކަމެއްކަމުގެ ޔަޤީންކަން، އައްޑޫ ސިޓީގެ ރައްޔިތުންނަށް ރައީސުލްޖުމްހޫރިއްޔާ ދެއްވިއެވެ.
ދެން އެންމެ ބޮޑުވެފައި އޮތީ އިންފްރާސްޓްރަކްޗަރ ނުވަތަ މަގުހެދުމުގެ މައްސަލަކަމުގައި ވިދާޅުވެ، ވާހަކަފުޅުދައްކަވަމުން ރައީސުލްޖުމްހޫރިއްޔާ ވިދާޅުވީ، މި މައްސަލައަށް ޙައްލެއް ނުލިބި އޮތުމުގެ ސަބަބުން އިޤްތިޞާދަށްވެސް ހުރަސްތަކެއް ކުރިމަތިވާކަމުގައެވެ. މަގުތައް ހެދުމަކީ ވުނޭރުންނާއި އާންމު ރައްޔިތުންނަށްވެސް ކޮންމެހެން ބޭނުން ކުރިއެރުމެއް ކަމަށާ، ވަޢުދުވެވަޑައިގެންނެވި ގޮތަށް، ސިޓީގެ ހުރިހާ މަގުތަކެއްވެސް ހައްދަވައި ދެއްވާނެކަމުގެ ޔަޤީންކަން، ރައީސުލްޖުމްހޫރިއްޔާ ވަނީ ދެއްވާފައެވެ. މަގު ހެދުމުގެ މަޝްރޫޢު ނިންމަވާނީ، މަރުހަލާތަކަށް ބައިނުކުރައްވައި ކަމުގައިވެސް އެމަނިކުފާނު ވަނީ ފާހަގަކުރައްވާފައެވެ.
ކިތަންމެ ދަތި ޙާލެއްގައި ނަމަވެސް މާލެއަށް ދިރިއުޅުން ބަދަލުކުރައްވާ އެއް ސަބަބަކީ ވަޒީފާކަން ފާހަގަކުރައްވަމުން ރައީސުލްޖުމްހޫރިއްޔާ ވަނީ، ކުރިއަށް އޮތް ދުވަސްތަކުގައި އައްޑޫ ސިޓީއިން ވަޒީފާގެ ގިނަ ފުރުޞަތުތަކެއް ހަމަޖެހިގެންދާނެކަމުގެ އުންމީދީ ޚަބަރު ހިއްސާކުރައްވާފައެވެ. ވަކީން ޚާއްޞަކޮށް، ފަތުރުވެރިކަމުގެ ދާއިރާއިން ކުރިއަށް ގެންދަވާން ހަމަޖެހުނު މަޝްރޫޢުތަކާއެކު، ދާދި އަވަހަށް ވަޒީފާތައް އުފެދި، އައްޑޫ ސިޓީގެ ރައްޔިތުންނަށް ވަޒީފާގެ ފުރުޞަތުތައް ތަނަވަސްވާނެކަމުގައި އެމަނިކުފާނު ވިދާޅުވިއެވެ.
މިމޭރުމުން ވާހަކަފުޅު ކުރިއަށްގެންދަވަމުން ރައީސުލްޖުމްހޫރިއްޔާ ވަނީ، އަހަރުތަކެއް ވަންދެން ކުރިއެރުމެއް ނުލިބި ހުއްޓިފައި އޮތް ޝަންގްރިއްލާ ރިސޯޓް، މިއަހަރުގެ ފަހުކޮޅު ހުޅުވޭނެކަމުގެ ޔަޤީންކަން ލިބިވަޑައިގެންފައިވާކަން ހާމަކުރައްވާފައެވެ. ހަމަ މިފަދައިން ހަންކެޑެ މަޝްރޫޢުގައި ހުރި ހުރަސްތައްވެސް ނައްތާލެވި، 1000 އެނދުގެ އިންޓަގްރޭޓަޑް ޓުއަރިޒަމް މަޝްރޫޢެއް މާލަހެއް ނުވެ ފެށޭނެކަމުގައި ރައީސުލްޖުމްހޫރިއްޔާ ވިދާޅުވިއެވެ. އަދި، އެމަނިކުފާނުގެ ވަޢުދުފުޅުތަކުގެ ތެރޭގައި ހިމެނިގެން ކުރިއަށްގެންދަވާ އައްސޭރި ޓުއަރިޒަމް މަޝްރޫޢުގެ ތެރެއިންވެސް ވަޒީފާގެ ފުރުޞަތުތައް އިތުރުވެގެންދާނެކަން ރައީސުލްޖުމްހޫރިއްޔާ ފާހަގަކުރެއްވިއެވެ.
އައްޑޫ ސިޓީ ހިތަދޫ، މަރަދޫ، މަރަދޫފޭދޫ އަދި ފޭދޫގެ ތަރައްޤީއާ ސީދާ ގޮތުން ގުޅިފައިވާ 19 މަޝްރޫޢެއްގައި މިރޭގެ ރަސްމިއްޔާތުގައި ސޮއިކުރައްވާފައިވާއިރު، އައްޑޫގައި މީހުން ދިރިއުޅޭ ހުރިހާ ރަށެއްގައިވެސް ތަރައްޤީގެ ގިނަ މަޝްރޫޢުތަކެއްގެ ޢަމަލީ މަސައްކަތްތައް، ރައީސުލްޖުމްހޫރިއްޔާގެ މި ދަތުރުފުޅުގައި ހިމެނިގެން ވަނީ ފައްޓަވާފައެވެ. އެގޮތުން ސޮއިކުރެއްވި ކޮންމެ މަޝްރޫޢަކާއި، ޢަމަލީ ގޮތުން މަސައްކަތް ފެށުނު ކޮންމެ މަޝްރޫޢެއްވެސް ފުރިހަމަކަމާއެކު ނިންމަވައިދެއްވާނެކަމުގެ ޔަޤީންކަން، ރައީސުލްޖުމްހޫރިއްޔާ ވަނީ ތަކުރާރުކޮށް ދެއްވާފައެވެ. މިއިން ކޮންމެ މަޝްރޫޢަކީވެސް މުހިންމު ކުރިއެރުންތަކެއް ލިބޭނެ މަޝްރޫޢުތަކެއްކަން އެމަނިކުފާނުގެ ވާހަކަފުޅުގައި ފާހަގަކުރެއްވިއެވެ.
މީގެ އިތުރުން ޖުމުލަ ގޮތެއްގައި ރާއްޖޭގެ ހުރިހާ ރައްޔިތުންގެ ލާބައާއި މަންފާއަށްޓަކައި އެމަނިކުފާނުގެ ސަރުކާރުން ކުރައްވަމުންގެންދަވާ މަސައްކަތްތަކަށް އަލިއަޅުވާލައްވަމުން، ކުރިއަށް އޮތް 2026 ވަނަ އަހަރުގެ ބަޖެޓުގެ ތެރެއިން ކުރިއަށް ގެންދަވާނެ ބައެއް ކަންކަންވެސް ފާހަގަކުރެއްވިއެވެ. އޭގެ ތެރޭގައި ރިޔާސީ ވަޢުދުފުޅުތަކުގައި ހިމެނޭ ކަންކަމުގެ އިތުރުންވެސް ކަންކަން ހިމެނޭކަން އެމަނިކުފާނު ފާހަގަކުރެއްވިއެވެ.
ހަމަ މިއާއެކު، ޕްރައިވެޓް ސެކްޓަރުގެ ކުންފުނިތަކާ ޙަވާލުކުރައްވައިގެން ގިނަ މަޝްރޫޢުތަކެއް ހިންގަވާނެކަން އެމަނިކުފާނު ފާހަގަކުރެއްވިއެވެ. މީގެ ތެރެއިން 205 މަޝްރޫޢެއްގެ އެއްބަސްވުމުގައި ސޮއިކުރެއްވުން، ބުރާސްފަތި ދުވަހު މާލޭގައި ކުރިއަށްގެންދަވާނެކަންވެސް އެމަނިކުފާނު ވަނީ ހާމަކުރައްވާފައެވެ. މީގެއިތުރުން ސަރުކާރުން ހޯދާފައިވާ އެކި ޚިދުމަތްތަކަށް ދައްކަންޖެހޭ ފައިސާ ޚަލާސްކުރެއްވުމުގެ ކަންކަން މިހާރު ކުރިއަށްދާކަމަށާ، މިމަހުގެ ނިޔަލަށް އެކަންވެސް މުޅިން ނިންމަވާލެވޭނެކަމުގެ ޔަޤީންކަން، ރައީސުލްޖުމްހޫރިއްޔާ ވަނީ ދެއްވާފައެވެ.
މިފަދަ ހުރިހާ ކަމެއްވެސް މި މޭރުމުން ކުރެވެމުން ދިއުމުގެ އެންމެ ބޮޑު ސަބަބަކީ ރައްޔިތުންގެ އެއްބާރުލުންކަމުގައި ފާހަގަކުރައްވަމުން، ރައީސުލްޖުމްހޫރިއްޔާ ވަނީ ދިވެހި ލޮބުވެތި ރައްޔިތުންނަށް ޝުކުރުއަދާކުރައްވާފައެވެ. އެމަނިކުފާނަށް ރައްޔިތުން ކުރައްވާ އިތުބާރާއެކު، އިޚްލާސްތެރިކަމާއި، އަމާނާތްތެރިކަމާއެކު ޒިންމާ އަދާކުރެއްވުމުގައި ދެމިހުންނަވާނެކަމުގެ ޔަޤީންކަން ރައީސުލްޖުމްހޫރިއްޔާ މިރޭ ދެއްކެވި ވާހަކަފުޅުގައި ވަނީ ދެއްވާފައެވެ.