ބާލީއަކީ ފައިދާތަކުން ފުރިގެންވާ ބާވަތެކެވެ. އޭގެ ފެނަކީ ސިއްޙީ ގޮތުން އެތައް ފައިދާތަކެއް ހިމެނޭ ގުދުރަތީ ބުއިމެކެވެ. ބާލީ ފެނަކީ ހަށިގަނޑަށް ބޭނުންވާ މުހިއްމު މާއްދާތަކާއި، ވިޓަމިންތަކާއި، މިނެރަލްތައް އަދި އެންޓި އޮކްސިޑެންޓްތައް އެކުލެވިގެންވާ ބުއިމެކެވެ. މިއަދުގެ ފަތިސްތަރީގައި ގެނެސްދެނީ ބާލީ ފެނުގެ ސިއްޙީ ފައިދާތަކާއި، ތައްޔާރު ކުރާނެ ގޮތެވެ.
ދީނީ ގޮތުން ބަލާލާއިރުވެސް ބާރލީ އަކީ ވަރަށް ފައިދާހުރި އެއްޗެއްކަން ހާމަވާ ދަލީލުތައްވެސް ފެންނަން އެބަހުއްޓެވެ.
ބާލީގައި ހިމެނޭ މުހިއްމު މާއްދާތައް
ބާލީ ފެނަކީ ހަމައެކަނި ފެނެއް ނޫނެވެ. އެއީ ހަށިގަނޑަށް ބޭނުންވާ ވަރަށް ގިނަ މާއްދާތައް އެކުލެވޭ ބުއިމެކެވެ. ބާލީގައި ހިމެނޭ ވިޓަމިން ބީ، ދަގަނޑު (އަޔަން)، ކެލްސިޔަމް، މެގްނީޒިޔަމް، ޒިންކް، ކޮޕަރ، އަދި ޕްރޮޓީން ފަދަ މާއްދާތަކުގެ ސަބަބުން ހަށިގަނޑުގެ ދިފާޢީ ނިޒާމު ވަރުގަދަވެ، ހަށިގަނޑަށް ބޭނުންވާ ބާރު ލިއްބައިދެއެވެ. މީގެ އިތުރުން، ބާލީގައި އެންޓި އޮކްސިޑެންޓްތައް ގިނަ އަދަދަކަށް ހިމެނޭތީ، ސެލްތަކަށް ލިބޭ ގެއްލުންތަކުން ދިފާޢުކޮށްދެއެވެ.
ޔޫރިނަރީ އިންފެކްޝަންތަކަށް ފަރުވާ
ބާލީ ފެނަކީ ޔޫރިނަރީ ޓްރެކްޓް އިންފެކްޝަންސް (ޔޫޓީއައި) އަށް ފަރުވާ ދިނުމުގައި ގުދުރަތީ ބޭހެއްގެ ގޮތުގައި ބޭނުންކުރެވޭ އެއްޗެކެވެ. ބާލީ ފެނަކީ ޑައިޔުރެޓިކް ސިފައެއް ހުންނަ ބުއިމަކަށް ވާތީ، ކުޑަކަމުދާ މިންވަރު އިތުރުކޮށްދެއެވެ. މިއީ ކުޑަކަމުދާ ނިޒާމުގައި އުފެދޭ ބެކްޓީރިއާ ނައްތާލުމަށް ވަރަށް މުހިއްމު ކަމެކެވެ. އަދި ހަށިގަނޑުގައި ވިހަ މާއްދާތައް ޖަމާވިޔަ ނުދީ، އެތަކެތި ސާފުކޮށް، ގުރުދާގެ މަސައްކަތް ރަނގަޅުކޮށްދިނުމަށް އެހީތެރިވެދެއެވެ. ޚާއްޞަކޮށް ހޫނު މޫސުމުގައި ހަށިގަނޑު ހައިޑްރޭޓްކޮށް ބެހެއްޓުމަށް ބާލީ ފެނަކީ ވަރަށް ރަނގަޅު އެއްޗެކެވެ.
ހިތުގެ ސިއްޙަތާއި ކޮލެސްޓްރޯލް ދަށްކުރުން
ހިތުގެ ސިއްޙަތު ރަނގަޅު ކުރުމަށް ބާލީ ފެނަކީ ވަރަށް މުހިއްމު ބުއިމެކެވެ. ބާލީގައި ހިމެނޭ ބީޓާ ގްލޫކަން (Beta-Glucan) ފައިބަރުގެ ސަބަބުން ލޭގެ ކޮލެސްޓްރޯލްގެ މިންވަރު ދަށްކޮށްދެއެވެ. މި ފައިބަރުން ނުބައި ކޮލެސްޓްރޯލް (LDL) ލޭގެ ތެރެއަށް ދިއުން މަދުކޮށް، ހިތުގެ ބަލިތަކުން ދުރުކޮށްދެއެވެ. މީގެ އިތުރުން، ބާލީ ފެނުގައި ހިމެނޭ އެންޓި އޮކްސިޑެންޓްތަކުގެ ސަބަބުން ލޭގެ ޕްރެޝަރު ދަށްކޮށް، ސްޓްރޯކް ޖެހުމުގެ ފުރުޞަތު ކުޑަކޮށްދެއެވެ. މިކަންކަމުގެ ސަބަބުން ހިތުގެ ނިޒާމު ރަނގަޅުވެ، ހަށިގަނޑުގެ އެތެރޭގައި އޮކްސިޑޭޓިވް ސްޓްރެސް އުފެދުން ކުޑަކުރެއެވެ.
ބާރލީ ފެން؛ ޔޫރިން އިންފެކްޝަން، ހިތުގެ މައްސަލަތަކަށް ފަރުވާއެއް—-ފޮޓޯ: ހީލްބީން
ބަރުދަން ލުއިކުރުމާއި ހަކުރުގެ މިންވަރު ކޮންޓްރޯލް ކުރުން
ބަރުދަން ލުއިކުރުމަށް ބާލީ ފެން ބޭނުންކުރުމަކީ ވަރަށް ފައިދާހުރި ކަމެކެވެ. ބާލީ ފެނުގައި ގިނަ އަދަދަކަށް ފައިބަރު ހިމެނޭތީ، ޚާއްޞަކޮށް ބީޓާ ގްލޫކަންގެ ސަބަބުން ބަނޑު ފުރިފައި ހުންނަ އިޙްސާސް ދިގުދެމިގެންދެއެވެ. މިއީ ކެއުންތަކުގެ މެދުގައި ކާލާ އާދަ ކުޑަކުރުމަށް އެހީތެރިވެދޭ ކަމެކެވެ. ހަމައެހެންމެ، ބާލީ ފެނަކީ ހަކުރު ބަލި (ޑައިބެޓިކްސް) ކޮންޓްރޯލް ކުރުމަށް ވެސް އެހީތެރިވެދޭ އެއްޗެކެވެ. ބީޓާ ގްލޫކަންގެ ސަބަބުން ކެއުމަށްފަހު ގުލްކޯޒް ހަށިގަނޑަށް ވަންނަ މިންވަރު ލަސްކޮށް، ލޭގެ ހަކުރުގެ މިންވަރު ކޮންޓްރޯލް ކުރުމަށް އެހީތެރިވެދެއެވެ.
ދިފާޢީ ނިޒާމާއި ހަޖަމުކުރުމުގެ ނިޒާމު
ބާލީ ފެނުގައި ހިމެނޭ ފައިބަރުގެ ސަބަބުން ހަޖަމުކުރުމުގެ ނިޒާމަށް ވަރަށް ފައިދާ ކުރެއެވެ. މީގައި ހިމެނޭ ފައިބަރު (ސޮލިއުބަލް އަދި އިންސޮލިއުބަލް) ގެ ސަބަބުން ބަނޑުހަރުވުން (ކޮންސްޓިޕޭޝަން) އިން ދިފާޢުކޮށްދެއެވެ. އަދި ބާލީ ފެނަކީ ޕްރީބަޔޮޓިކްއެއްގެ ގޮތުގައި މަސައްކަތްކޮށް، ބަނޑުގައި ހުންނަ ރަނގަޅު ބެކްޓީރިއާތަކަށް ކާނާ ފޯރުކޮށްދީ، ހަޖަމުކުރުމުގެ ނިޒާމުގެ ޞިއްޙަތު ރަނގަޅުކޮށްދެއެވެ. މީގެ އިތުރުން، ބާލީ ފެނުގައި ހިމެނޭ އެންޓި އޮކްސިޑެންޓްތަކުގެ ސަބަބުން ހަށިގަނޑުގެ ދިފާޢީ ނިޒާމު ވަރުގަދަވެ، ބަލިތަކުން ދިފާޢުވުމަށް އެހީތެރިވެދެއެވެ.
ބާލީ ފެން ތައްޔާރުކުރާނެ ގޮތް
ބާލީ ފެން ތައްޔާރުކުރުމަކީ ވަރަށް ފަސޭހަ ކަމެކެވެ. ތިރީގައި އެވަނީ ބާލީ ފެން ތައްޔާރުކުރާނެ ގޮތުގެ ފިޔަވަޅުތަކެވެ:
ބޭނުންވާ ތަކެތި:
- ބައި ޖޯޑު ބާލީ
- ތިން ޖޯޑު ފެން
ތައްޔާރުކުރާނެ ގޮތް:
ތެއްޔަކަށް ބައި ޖޯޑު ބާލީ އެޅުމަށްފަހު ތިން ޖޯޑު ފެން އަޅުއްވައި، 25 މިނިޓް ވަންދެން މަތި ޖަހައި ކައްކާށެވެ. އެއަށްފަހު ފެންތައް ފުރާނާލާށެވެ. އޭރުން ހުންނާނީ ބަރާބަރު އެއް ޖޯޑުގެ ބާލީ ފެން ތައްޔާރު ކުރެވިފައެވެ. މި ފެން ހިހޫ ކުރުމަށްފަހު ދުވާލަކު ތިން އިރު ބުއިމަކީ ވަރަށް ފައިދާހުރި ކަމެކެވެ.
ބާލީ ފެނަކީ ހަށިގަނޑުގެ އެތައް ބައިތަކަށް ފައިދާކުރާ، ގުދުރަތީ ބޭހެއްގެ ގޮތުގައި ބޭނުންކުރެވޭ ބުއިމެކެވެ. ޔޫރިނަރީ އިންފެކްޝަންތަކަށް ފަރުވާ ދިނުމާއި، ހިތުގެ ސިއްޙަތު ރަނގަޅުކުރުމާއި، ބަރުދަން ލުއިކުރުމަށް އެހީތެރިވެދޭ މި ބުއިން، ދިރިއުޅުމުގެ ޞިއްޙީ އާދަތަކުގެ ތެރެއަށް ވެއްދުމަކީ ހަށިގަނޑުގެ ޞިއްޙަތު ދެމެހެއްޓުމަށްޓަކައި ކުރެވިދާނެ ވަރަށް މުހިއްމު ކަމެކެވެ. ބާލީ ފެނުގައި ހިމެނޭ ފައިބަރާއި، މިނެރަލްތަކާއި، އެންޓި އޮކްސިޑެންޓްތަކުގެ ސަބަބުން ހަށިގަނޑަށް ބާރު ލިބި، ދުޅަހެޔޮކަން އިތުރުވެގެންދާނެއެވެ.