ރާއްޖޭގެ ފުޓްބޯޅައަށް 75 އަހަރު ފުރުން ފާހަގަކުރުމުގެ ގޮތުން ފެށިގެންދިޔަ ޑައިމަންޑް ޖުބިލީ ފުޓްބޯޅަ ފެސްޓިވަލަކީ، ގިނަބަޔަކު ޝާމިލުކޮށްގެން ފުޓްބޯޅައަށް އޮތް ޝައުގުވެރިކަން ދެމެހެއްޓުމަށް ހިންގާ ހަރަކާތެއް ކަމަށް ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ގެ ރައީސް އަޙްމަދު ޠާރިގު ވިދާޅުވެއްޖެއެވެ.
(ހުކުރު ދުވަހާއި ހޮނިހިރު ދުވަހު) މިއަދާއި މާދަމާ މާފަންނު ޓާފްގައި ކުރިޔަށް ގެންދާ މި ފެސްޓިވަލާއި ގުޅޭ ގޮތުން ދައުލަތުގެ މީޑިއާއަށް ދެއްވި އިންޓަވިއުއެއްގައި ޠާރިގު ވިދާޅުވީ، މި ހަރަކާތުގެ މައިގަނޑު މަގްސަދަކީ ގިނަ ކުދިންތަކަކަށް ފުޓްބޯޅައިގެ ތެރެއިން އުފާވެރި ވަގުތުތަކެއް ހޯދައިދިނުން ކަމަށެވެ.
ޠާރިގު އިތުރަށް ވިދާޅުވީ، ފުޓްބޯޅައަށް 75 އަހަރު ފާހަގަކުރުމުގެ ގޮތުން ސީރީޒެއްގެ ގޮތުގައި އެކި ހަރަކާތްތައް މުޅި ރާއްޖޭގައި ހިންގުމަށް އެފްއޭއެމްގެ އަލަށް އިންތިހާބުވި އެގްޒެކެޓިވް ކޮމިޓީން ނިންމާފައިވާ ކަމަށެވެ. އެގޮތުން މާލޭގައި މި ފެށުނު ފުޓްބޯޅަ ފެސްޓިވަލާއެކު، އަންނަ އަހަރުގެ ޖުލައި 26 އާއި ހަމައަށް ފުޓްބޯޅަ ފެސްޓިވަލްތަކެއް ރާއްޖޭގެ އެކި ސަރަހައްދުތަކުގައި ބޭއްވުމަށް އެފްއޭއެމް އިން ވަނީ ނިންމާފައެވެ.
އެފްއޭއެމްގެ ރައީސް ވިދާޅުވީ، ގްރާސްރޫޓް ފުޓްބޯޅައަކީ އަސްލު ގިނަބަޔަކު ޝާމިލުވެގެން ކުޅުމުގެ ރޫހެއް އުފައްދާ، ކުދިން މަޖާކޮށްލުމަށްޓަކައި ހިންގާ ހަރަކާތެއް ކަމަށެވެ. މިކަމުގެ މުހިންމުކަމަކީ ގިނަ ކުދިންތަކެއް ފުޓްބޯޅައިގެ ތެރޭގައި ޝާމިލުކުރުން ކަމަށް ޠާރިގު ފާހަގަކުރެއްވިއެވެ.
“މި ކުދިންނަށް ގިނައިން ކުޅެގެން މި ކުދިން އެންޖޯއީކޮށްގެން މި ކުދިންނަށް އުފާވެރި ވަގުތުތަކެއް ދީގެން، މުސްތަގުބަލުގައި އުމުރުފުރަ މައްޗަށް އަރައިގެން 14 އަހަރާއި ހިސާބަށްދާއިރު ދެން އަޅުގަނޑުމެން މި ބަލަންޖެހެނީ ކިހާވަރެއްގެ ކޮލިޓީއެއްތޯ ކުޅުންތެރިންގެ ހުރީ،” ޠާރިގު ވިދާޅުވިއެވެ.
މާފަންނު ޓާފްގައި ކުރިޔަށްދާ މި ފެސްޓިވަލްގައި 18 އެކަޑަމީއަކުން 1500 އަށްވުރެ ގިނަ ކުދިން ބައިވެރިވާނެއެވެ. މިއީ 12 އަހަރުން ދަށުގެ އުމުރުފުރާތަކުގެ ކުދިން ބައިވެރިކޮށްގެން ކުރިޔަށް ގެންދާ ހަރަކާތެކެވެ. ރާއްޖޭގައި ރަސްމީކޮށް ފުޓްބޯޅަ ކުޅެން ފެށިތާ މި އަހަރަށް 75 އަހަރު ފުރޭއިރު، އެފްއޭއެމް އިން ވަނީ ޑައިމަންޑް ޖުބިލީ ކޮމިޓީގެ ނަމުގައި ހާއްސަ ކޮމިޓީއެއް އެކުލަވާލާ، އެކި ރަށްރަށުގައި ހާއްސަ ހަރަކާތްތަކެއް ހިންގުމަށް ނިންމާފައެވެ.