މި މަހުގެ 5 ވަނަ ދުވަހު އޮލިމްޕަހުގައި ކުލަގަދަ ޕްރިމިއާރ އަކަށް ފަހު މިހާރު ހައުސްފުލް ޝޯތަކެއް ދައްކަމުންދާ ސެޓާން ސްޓޫޑިއޯ އާއި ޝައި ޕްރޮޑަކަޝަންގެ “ކޮސް ގިނަ މިސްޓޭކް” ބެލުމަށް ގްރޫޕް ހާދާލައިގެން ދާންޖެހޭހާވެސް މަޖާ ފިލްމެއްގެ ގޮތުގައި ބެލުންތެރިން ސިފަކޮށްފިއެވެ.
މިފިލްމްގައި އުޅޭ ގިނަ ތަރިން މީގެ ކުރިން ފެނިފައިވަނީ ސީރިއަސް ރޯލުތަކުން ކަމަށްވެފައި، މި ފިލްމްގައި އެ ތަރިން ފެނިގެން ދާ ރޯލުތަކުން ކޮސްވާހާ މަޖާކަމަށް ފިލްމް ބެލުމަށް ފަހު މީޑިއާކަށް ދިން އިންޓަވިއުއެއްގައި ބެލުންތެރިއަކު ވަނީ ސިފަކޮށްފައެވެ.
މިއަހަރުގައި އަޅުވާ ފުރަތަމަ ކޮމެޑީ ފިލްމް ކޭޖީއެމްގެ ތަރުޙީބު ބޮޑުވެފައިވާއިރު، މިހާރު ޓިކެޓް ބުކިންގ އަށް ބާރު ބޮޑުވަމުން ދާކަމަށް ފިލްމްގެ ޕްރޮޑަކްޝަން ހައުސް އިން ވަނީ ބުނެފައެވެ. މީގެ އިތުރުން ފިލްމްގެ ޓިކެޓް ގަނަން ފަރާތްތަކުން ގްރޫޕް ބޮޑުކޮށްގެން ޓިކެޓް ނަގާކަން ފާހަނގަވާ ކަމަށާއި، ބެލެވެނީ ކޮމެޑީ ފިލްމަކަށް ވުމުން މަޖާވަގުތު ކޮޅެއް ހޭދަކޮށްލުމަށް ގިނަ ބެލުންތެރިން ބޭނުންވެފައި ތިބި ކަމަށްވެސް ޕްރޮޑަކްޝަން ހައުސްއިންވަނީ ބުނެފައެވެ.
މި ފިލްމް އޮލިމްޕަސް ސިނަމާގައި ދެއްކުމަށް ހަމަޖެހިފައިވަނީ ނޮވެމްބަރ 19ގެ ނިޔަލަށެވެ. އެގޮތުން މިހާރު މި ފިލްމް ޓިކެޓް އޮލިމްޕަސް ޓިކެޓް ކައުންޓަރުން ވިކެމުން ދާއިރު، 7743399 އަށް ވައިބަރ މެދުވެރިކޮށްވެސް ޓިކެޓް ބައްލަވައިގަތުމަށް ފިލްމްގެ ޕްރޮޑަކްޝަން ހައުސްއިން ވަނީ ބުނެފައެވެ.
މީގެ އިތުރުން ރާއްޖޭގެ އެކި ރަށްރަށުގައި އާއި، ރިސޯޓް ތަކުގައި މިފިލްމް ސްކްރީން ކުރުމަށް ބޭނުންވާ ފަރާތްތަކުން 7779621 / 9111164 އަށް ވައިބަރ މެދުވެރިކޮށް މެސެޖް ކުރެއްވުމަށްވެސް ޕްރޮޑަކްޝަން ހައުސްއިން ވަނީ ބުނެފައެވެ.
ދިވެހި ފިލްމީ ދުނިޔޭގައި ކޮމެޑީ ޖޯންރާގެ ފިލްމްތައް އުފެއްދުމުގެ އެންމެ ކާމިޔާބު ޕްރޮޑަކްޝަން ހައުސްގެ ގޮތުގައި ފާހަގަ ކޮށްލެވޭ ޝައި ޕްރޮޑަކްޝަންގެ ފިލްމްތަކުގެ ތެރޭގައި ހިމެނޭ ނޯޓީފޯޓީ އާއި ފޯޓީ ޕްލަސް ފަދަ ހިޓް ފިލްމްތަކަށް ފަހު މިފިލްމްވެސް ވެގެންދާނީ ބެލުންތެރިން ކޮސްކޮށްލާ ހެއްވާލާނެ ވަރުގެ ފިލްމަކަށް ކަމަށް ޝައި ޕްރޮޑަކްޝަންގެ ވެރިޔާ އަދި މި ފިލްމްގެ ޕޮރޮޑިއުސަރ އިސްމާއިލް ޝަފީޤުވަނީ ބުނެފައެވެ.
މީގެ އިތުރުން މިފިލްމް އުފައްދާ ސެޓާން ސްޓޫޑިއޯ އަކީ މިހާރު ރާއްޖޭގައި އެންމެ މަގުބޫލު ޕްރޮޑަކްޝަން ހައުސްގެ އިތުރުން، މިދިޔަ އަހަރުގެ އެންމެ ކާމިޔާބު ފިލްމް “ކަމަނާ” އާއި، މި އަހަރުގެ މިހާތަނަށް އެޅުވުނު އެންމެ ކާމިޔާބު ފިލްމް “ކަނބުލޮ” ފަދަ ފިލްމް އުފައްދާ، ބެލުންތެރިންގެ އިތުބާރު ހޯދާފައިވާ ޕްރޮޑަކްޝަން ހައުސްއެކެވެ. މި ދެ ސްޓޫޑިއޯ ގުޅިގެން މީގެ ކުރިންވެސް ފިލްމްތަކެއް ވަނީ ބެލުންތެރިންނާއި ހަމަޔަށް ގެނެސްދީފައެވެ.
ޔޫސުފް ޝަފީޢު (ޔޫއްޕެ)ގެ ވާހަކައަކަށް އުފައްދާ މި ފިލްމްގެ ޑައިރެކްޓަރަކީ މަޝްހޫރު އެކްޓަރ އަދި ޑައިރެކްޓަރ ޢަލީ ސީޒަންއެވެ. މިފިލްމް ޝޫޓް ކޮށްފައިވަނީ މިއަހަރު ކުރީކޮޅު މ.މުލަކުގައެވެ.
މި ފިލްމަކީ މި ފަހުގެ ތާރީޚެއްގައި ފިލްމީ ދާއިރާގެ އެންމެ ގިނަ ތަރިން އެއް ފިލްމަކުން ފެނިގެންދާނެ އެއް ފިލްމެވެ. އެގޮތުން ފިލްމުގެ ހުރިހާ ތަރިންގެ ރޯލުވެސް އެއްވަރަކަށް ފެނިގެންދާއިރު ތަރިންގެ ތެރޭގައި ޔޫސުފް ޝަފީޢު (ޔޫއްޕެ)، ޢަލީ ސީޒަން، އާމިނަތު ރިޝްފާ، މަރިޔަމް ޢައްޒަ، އަހްމަދު ނިމާލް، ޢަލީ ޢާޒިމް (ދޮން އައްޔަ)، ޖުމައްޔިލް ނިމާލް، ފުބޫ، ޝިފާ، ޑޯރާ، އަމަން ގެ އިތުރުން ޝާއްކޮ އަންމަޑޭ އާއި ގުލިސްތާނު އަދި ހާމިދު ފަދަ ކުޅަދާނަ ފަންނާނުން ހިމެނެއެވެ. މި ފިލްމްގެ ކެމެރާމަނަކީ ތަޖުރިބާކާރު އަދި ރާއްޖޭގައި އެފަދަ ދެވަނައެއް ނުވާ ކެމެރާމަން، އިބްރާހިމް ވިސާން (ކަނޑި) އެވެ. އަދި ފިލްމްގެ ޕޯސްޓް ޕްރޮޑަކްޝަން މަސައްކަތް ކޮށްފައިވަނީ އަބްދުﷲ މުއާޒް ޕްރޮޑަކްޝަން އާއި، ބްލެކް މީޑިއާގެ އިތުރުން ޔޫއްޕެ ޕްރޮޑަކްޝަން އިންނެވެ.
މުހައްމަދު އަބްދު ޣަނީ (ތޭރަ) ހަދާފައިވާ ޅެންތަކަށް މި ފިލްމްގެ ލަވަތައް ކިޔާފައިވަނީ މުހައްމަދު އަބްދު ޣަނީ (ތޭރަ)، މަރިޔަމް އަޝްފާ، އާއި ޖަލާލްގެ އިތުރުން ފުބޫއެވެ.
އިސްމާއިލް ޝަފީގް ޕްރޮޑިއުސް ކުރާ މި ފިލްމުގެ އެގްޒެކެޓިވް ޕްރޮޑިއުސަރަކީ އަލީ ޝާނިޒް މުހައްމަދުއެވެ.