ނިލަންދޫ ކައުންސިލް ރާވެރިޔާ ވޮލީ މުބާރާތް 2025 ގެ ފައިނަލް މެޗު މާދަމާ އޮންނަ އިރު ގެމަނަފުށި ވޮލީ ކުލަބުގެ ކުޅުންތެރިން ތިބީ މޮޅުވުމުގެ ރޫހުގައި ކަމަށް ގެމަނަފުށީ ވޮލީ ކުލަބުގެ ކޯޗު މުހައްމަދު އިބްރާހިމް ( ކޯޗު މޯޑު ) ބުނެފިއެވެ.
ނިލަންދޫ ރާވެރިޔާ ވޮލީ މުބާރާތުގެ ފައިނަލް މެޗު އޮންނާނީ މާދަމާ ހަވީރު އަދި ރޭގަނޑުއެވެ. ހަވީރު އަންހެން ޑިވިޝަންގެ ފައިނަލް މެޗުގައި ގެމަނަފުށީ އަންހެން ވޮލީ ކުލަބު ނިކުންނާނީ ބޮންބޮން ސްޕޯޓްސް ކުލަބާއި ދެކޮޅަށެވެ. އަނެއްކޮޅުން މާދަމާ ރޭ އޮންނަ ފައިނަލްގައި ފިރިހެން ޑިވިޝަންގައި ގެމަނަފުށީ ވޮލީ ކުލަބު ނިކުންނާނީ އެންމެ ފަހުގެ ޗެމްޕިއަން ޓޮޕް ބްރަދާސްއާއި ދެކޮޅަށެވެ.
މި މުބާރާތުގައި ޓޮޕް ބްރަދާސް ފައިނަލަށް ދަތުރުކުރީ ކުޅުނު ހުރިހާ މެޗެއް ކާމިޔާބު ކޮށްގެންނެވެ. ގެމަނަފުށި ހަމައެކަނި ބަލިވެފައިވަނީ ޓޮޕް ބްރަދާސް މެޗުންނެވެ. މި މެޗު އެޓީމުން ކާމިޔާބު ކުރީ 3-0 ސެޓުންނެވެ.
ފައިނަލް މެޗަށް ނިކުތުމުގެ ކުރިން ގެމަނަފުށީ ވޮލީ ކުލަބުގެ ކޯޗު މުހައްމަދު އިބްރާހިމް ހުވަދޫއަށް ވިދާޅުވީ މި މެޗަށް ޓީމް އޮތީ ވަރަށް ތައްޔާރުވެފައި ކަަމަށާއި، މި މެޗަށް މުޅި ޓީމް އޮތީ މޮޅުވުމުގެ ރޫހެއްގައި ކަމަށެވެ. ގްރޫޕް ސްޓޭޖުގައި ޓޮޕް ބްރަދާސް މެޗުގައި ހެދުނު މިސްޓޭކްސްތައް ރަނގަޅު ކުރާނެ ކަމަށާއި މި މެޗަކީ މުޅި ރަށަށް ލިބޭނެ ބޮޑު ކުރިއެރުމެއް ކަމަށެވެ
ފާއިތުވެ ދިޔަ 5 ފަރަކަށް މުބާރާތް ނިމިގެން ދިޔައީ މުޅިން ސެމީ ފައިނަލުތަކުން ބަލިވެގެން. އެހެންނަމަވެސް މިފަހަރު މުޅިރަށްވެސް އޮތީ މިކަމުގައި. ވަކިން ޙާއްސަކޮށް ދެ ޑިވިޝަންގެ ޓީމް ފައިނަލްގައި ކުޅުމާއި މިފަހަރުގެ މުބާރާތުގެ ކުޅުމަށް ބަލާއިރު މިއީ ކާމިޔާބު މުބާރާތެއް ކަމަށް އަޅުގަނޑު ބަލާނީ- ކޯޗު މޯޑު
މުޅި މުބާރާތުގެ ކުޅުމަށް ބަލާއިރު ގެމަނަފުށީ ވޮލީ ކުލަބުގެ ޓީމުގެ ގައުމީ ޓީމް ކުޅުންތެރިޔާ އަލީ ހުޒާމްގެ ކުޅުން ވަރަށް ބޮޑަށް ފާހަގަ ވެއެވެ. ވަކިން ޙާއްސަކޮށް ސެމީ ފައިނަލް މެޗުގައި ބޮންބޮން ސްޕޯޓްސް ކުލަބާ ދެކޮޅަށް ކުޅުނު ކުޅުން ފާހަގަކޮށްލެވެއެވެ. ތަޖުރިބާ ކާރު ކުޅުންތެރިޔާ އަލީ އަކްބަރު އާއި އެކު ގެމަނަފުށީ ޓީމް ފެނިގެން ދަނީ މޮޅު ޓީމެއްގެ ގޮތުގައެވެ.
މުބާރާތުގެ ފިރިހެން 6 ޓީމް ބަހާލައިފައި ވަނީ 2 ގުރޫޕަކަށެވެ. ގްރޫޕް އޭގައި ހިމެނެނީ ގެމަނަފުށި ވޮލީބޯލް ކުލަބު، ބޮންބޮން ސްޕޯޓްސް ކްލަބް ލެޖެންޑްސް، އަދި އެންމެ ފަހުގެ ޗެމްޕިއަން ޓޮޕް ބްރަދާސް އެވެ. ގްރޫޕް ބީގައި ހިމެނެނީ ބޮންބޮން ސްޕޯޓްސް ކުލަބު، މަރަޓާ ވޮލީބޯލް ޓީމް، އަދި ދަ ރެޒިޑެންސް މޯލްޑިވްސްއެވެ.
މި މުބާރާތުގައި އަންހެން ޑީވިޝަންގެ 4 ޓީމް ބައިވެރިވެފައި ވުމާއިއެކު މި ޑިވިޝަން ކުރިއަށްދާނީ ލީގު އުސޫލުންނެވެ. މުބާރާތުގައި ބައިވެރިވެފައިވާ ޓީމްތަކަކީ އެންމެ ފަހުގެ ގެމަނަފުށި ވޮލީބޯލް ކުލަބު، ގއ މާމެންދޫ ވުމެންސް ޓީމް، ވިލިނގިލީ ޔުނައިޓެޑް ކުލަބު، އަދި ބޮންބޮން ސްޕޯޓްސް ކުލަބެވެ. . އަދި ކޮންމެ ޑިވިޝަނެއްގެ ޗެމްޕިއަން ޓީމަށް 50،000 ( ފަންސާސް ހާސް ) ރުފިޔާގެ އަދި ކޮންމެ ޑިވިޝަނެއްގެ ރަނަރަޕް ޓީމަށް 25،000 (ފަންސަވީސް ހާސް) ރުފިޔާގެ ފައިސާގެ އިނާމް ދިނުމަށްވަނީ ހަމަޖެހިފައެވެ.
އެންމެ ފަހުން ބޭއްވުނު މުބާރާތުގެ އަންހެން ޑިވިޝަންގެ ޗެމްޕިއަން ޓީމަކީ ގއ ގެމަނަފުށީ ވޮލީ ކުލަބެވެ. އަދި ފިރިހެން ޗެމްޕިއަން ޓީމަކީ ގއ ނިލަންދޫ ޓޮޕް ބްރަދާސްއެވެ.
މި މުބާރާތަކީ ހުވަދު އަތޮޅުގައި އެންމެ ޒަމާންވީ އެއްމުބާރާތެވެ. އަދި ރާއްޖޭގައި ފާހަގަކޮށްލެވޭ މޮޅެތި ކުޅުންތެރިން ރާވެރިޔާ މުބާރާތުގައި ކުޅެމުންދެއެވެ. އެގޮތުން މި ފަހަރުގެ މުބާރާތުގައި ރާއްޖޭގެ ގައުމީ ވޮލީ ކުޅުންތެރިން ކަމުގައި ވާ ޝަމާއިލް ،ހުޒާމް، ޝާމިލް، ނިމާލް ( ބުޅިކޭ ) ކުޅޭނެއެވެ. އަދި މީގެ އިތުރުން އަޒީމް ވެސް މި މުބާރާތުގައި ކުޅޭނެއެވެ.
އަންހެން ޑިވިޝަންގައި ވެސް ރާއްޖޭގެ މޮޅު ކުޅުންތެރިންގެ ކުޅުން ފެނިގެން ދާނެއެވެ. މީގެ ތެރޭގައި ރާއްޖޭގެ ގައުމީ އަންހެން ކެޕްޓަން މާޖިދާ، މާޔާ، ހައްވަ، އަދި ރަފާގެ ކުޅުން ފެނިގެން ދާނެއެވެ.