ގދ. ގައްދޫ ހޮސްޕިޓަލްގެ ދެ ބުރީގެ އާ އިމާރާތްކުރުމުގެ މަސައްކަތް، 101.7 މިލިއަން ރުފިޔާގެ މަޝްރޫޢެއްގެ ގޮތުގައި، މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)އާ މިއަދު ހަވާލުކޮށްފިއެވެ. މި މަޝްރޫޢު ނިންމުމަށް ހަ ސަތޭކަ ދުވަހުގެ މުއްދަތެއް ދީފައިވާކަމަށް ސިއްހީ ވުޒާރާއިން މައުލޫމާތު ދެއްވައެވެ.
މިއަދު ސިއްހީ ވުޒާރާގައި ބޭއްވި ރަސްމިއްޔާތެއްގައި، މި މަސައްކަތުގެ އެއްބަސްވުމުގައި ސިއްހީ ވުޒާރާގެ ފަރާތުން ސޮއިކުރެއްވީ ސްޓޭޓް މިނިސްޓަރު އަހުމަދު ގާސިމެވެ. އެމްޓީސީސީގެ ފަރާތުން މި އެއްބަސްވުމުގައި ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރު، ޑެޕިއުޓީ ކޮމިޝަނަރު އޮފް ޕޮލިސް ރިޓަޔާޑް އަހްމަދު ސައުދީއެވެ.
މި މަޝްރޫއުގެ ތެރޭގައި 30 އެނދުގެ ދެ ބުރީގެ ހޮސްޕިޓަލް އިމާރާތަކާއި ސާވިސް ބިލްޑިންއަކާއެކު ދެ ބުރީގެ އެކަމަޑޭޝަން ބްލޮކަކާއި، އައިސޮލޭޝަން ފެސިލިޓީއާއި ފްލޫ ކްލިނިކްގެ އިތުރުން އެކްސްރޭގެ ހިދުމަތްތައް ގާއިމުކުރުން ހިމެނެއެވެ.
ސިއްހީ ވުޒާރާއިން ވިދާޅުވީ، ގދ. ގައްދޫގައި ގާއިމުކުރެވޭ މި ހޮސްޕިޓަލަކީ ޒަމާނީ ފެންވަރަކަށް ގާއިމްކުރެވޭ، ޖާގަ ތަނަވަސް ހޮސްޕިޓަލް އިމާރާތަކަށް ވެގެންދާނެ ކަމަށެވެ. މިއީ ގައްދޫ ރައްޔިތުންނަށް ދެވޭ ސިއްހީ ހިދުމަތްތަކުގެ ފެންވަރު ރަނގަޅުކުރުމަށް އެޅޭ މުހިންމު ފިޔަވަޅެކެވެ.