ހަނިމާދޫ އިންޓަނޭޝަނަލް އެއާޕޯޓްގެ މަސައްކަތުގެ %72 ނިންމާފައި ވަނީ ރައީސް ޑރ. މުހައްމަދު މުއިއްޒުގެ ސަރުކާރުން ކަމަށް، އެ އެއާރޕޯޓް ހިންގާ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް)ގެ ސީއީއޯ އަދި މެނޭޖިން ޑިރެކްޓަރު، އިބްރާހިމް ޝަރީފު މުހައްމަދު ވިދާޅުވެއްޖެ އެވެ. އެމަނިކުފާނު މިކަން ހާމަ ކުރެއްވީ ހަނިމާދޫ އެއާޕޯޓް ހުޅުވުމަށް ބޭއްވި ރަސްމިއްޔާތުގައި ވާހަކަފުޅު ދައްކަވަމުންނެވެ.
ސީއީއޯ ޝަރީފް ވިދާޅުވިގޮތުގައި، މި ސަރުކާރު ވެރިކަމަށް ވަޑައިގަތް އިރު، އެއާޕޯޓްގެ މަސައްކަތް ނިމިފައި ހުރީ %28 އާއި %30 އާ ދެމެދުގަ އެވެ. އެގޮތުން، ޓާމިނަލް އިމާރާތާއި، ކާގޯ ޓާމިނަލް އިމާރާތާއި، ޖެޓީއާއި، ފަޔާ ސްޓޭޝަނާއި، އިންޖީނުގެ ވެސް ނުނިމި ހުއްޓެވެ. މި ހުރިހާ ކަމެއް މިހާ ކުޑަ ދުވަސްކޮޅެއްގެ ތެރޭގައި ކުރުމަށް ބާރު އަޅުއްވާ، އެހީތެރި ވެދެއްވީތީ ރައީސއ ޑރ މުއިއްޒަށް ޝަރީފް ވަނީ ޚާއްސަ ޝުކުރެއް ދަންނަވާފައެވެ.
ޝަރީފް ވިދާޅުވީ، މިއީ ވިއްކަން ހެދި ފައްޓަރުބައެއް ނޫން ކަމަށާއި، ޖަވާހިރުން ބިނާ ކުރާނީ މާ އުފާވެރި މުސްތަގުބަލެއް ކަމަށެވެ. މި ބިޔަ މަސައްކަތް ނިންމުމުގައި އެހީތެރިކަން ފޯރު ކޮށްދެއްވި މިނިސްޓަރު ޑރ. މުއްތަލިބާއި، ޓީމަށް ވެސް ޝުކުރު އަދާ ކުރައްވައި، މަސައްކަތުގައި ބައިވެރިވި ކުނި ކަހާ މީހާއިން ފެށިގެން ރެޔާއި ދުވާލު މަސައްކަތް ކުރި ކޮންމެ މުވައްޒިފަކަށް ވެސް އެމަނިކުފާނު ވަނީ ޝުކުރު ދަންނަވާފަ އެވެ.
ހަނިމާދޫ އެއާޕޯޓަކީ ހަމައެކަނި ވައިގެ ބަނދަރެއް ނޫން ކަމަށް ސީއީއޯ ޝަރީފް ސިފަ ކުރެއްވި އެވެ. އެއީ ބޮޑު ތިލަދުންމަތި އުތުރުން ދިއްލާލެވުނު އިގުތިސާދީ ދަންމަރެއް ކަމަށާއި، އެ ސަރަހައްދު ދުށް ގަދީމީ ހުވަފެނެއް ކަމުގައި ވިދާޅުވިއެވެ. އެމްއޭސީއެލްއާ މި މަސައްކަތް ހަވާލު ކޮށްދެއްވީ އުތުރުގެ ތަރައްގީގެ ތަޅުދަނޑި ކަމަށް ވެސް ޝަރީފް ވިދާޅުވިއެވެ.
މި އިގްތިސާދީ ބޮޑު މަސައްކަތުގެ ސަބަބުން ބޮޑު ތިލަދުންމަތި ހޭލައިގަންނާނެ ކަމަށާއި، އެތައް ހާސް ވަޒީފާއެއް އުފަން ވެގެން އަންނާނެ ކަމަށް ޝަރީފް ވިދާޅުވިއެވެ. އަދި މުޅި ރާއްޖެއަށް ބޭރު ފައިސާގެ ސުމާރެއް ނެތް މަންފާތަކެއް ލިބިގެންދާނެއިރު، ވަށައިގެން ފަތުރުވެރިކަމުގެ ސިނާއަތްތައް ތަރައްގީވާނެ ކަމަށް ވެސް އެމަނިކުފާނު ވިދާޅުވިއެވެ.
ޝަރީފް ވިދާޅުވީ، މި ވައިގެ ބަނދަރަކީ ކޮންމެ 365 ދުވަހަކުން 1.5 މިލިއަން ފަތުރުވެރިން ރާއްޖޭގެ އަސްކަނިން އެތެރެވާނެ ފަދަ ޒަމާނީ ވަސީލަތްތަކާއެކު އުފަން ކުރި އަޖައިބެއް ކަމަށެވެ. އަދި 2.7 ކިލޯމީޓަރުގެ ދިގު މި ރަންވޭގައި ބޮއިންގ 737 އާއި އޭ-320 ފަދަ ބޮޑެތި މަތިންދާ ބޯޓުތައް ޖައްސާ މަންޒަރު ބަލަން ސަރަހައްދުގެ ރައްޔިތުން އުފާވެރިކަމާއެކު ތިބޭނެ ކަމުގެ އުފާވެރި އުންމީދު އެމަނިކުފާނު ފާޅުކުރެއްވިއެވެ.