ގއ ނިލަންދޫ ކައުންސިލުން އިންތިޒާމްކޮށްގެން ބާއްވަމުންދާ ނިލަންދޫ ރާވެރިޔާ ވޮލީ މުބާރާތުގެ ނިންމުމުގެ ރަސްމިއްޔާތަށް ދިވެހިރާއްޖޭ ރައީސުލް ޖުމްހޫރިއްޔާގެ ނައިބު ހުސެއިން މުހައްމަދު ލަތީފް ނިލަންދޫއަށް ވަޑައިގަތުމަށް ހަމަޖެހިއްޖެއެވެ.
ނައިބު ރައީސްގެ އިތުރުން ގއ އަތޮޅުގެ ދާއިރާގެ 4 މަޖިލިސް މެމްބަރުންނާއި، ރަށްރަށުގެ ރައީސުންނާއި އަދި ގއ އަތޮޅު ރައީސްގެ އިތުރުން ގދ އަތޮޅު ރައީސް ހިމެނެއެވެ. މީގެ އިތުރުން ރާއްޖޭގެ މިހާތަނަށް އުފެދުނު އެންމެ މޮޅު ވޮލީ ކުޅުންތެރިޔާ އަހުމަދު އަބްދުލް ކަރީމް ލޯންގޭ އިތުރުން ވޮލީބޯލް އެސޯސިއޭޝަންގެ ނައިބު ރައީސާ އާއިދާ ހިމެނެއެވެ.
ނިލަންދޫ ރާވެރިޔާ ވޮލީ މުބާރާތަކީ މިހާރު ހުވަދު އަތޮޅުގެ ބްރޭންޑެކެވެ. ރާއްޖޭގެ އެންމެ މަތީ ފަންތީގެ ކުޅުންތެރިންގެ ހުނަރު މިމުބާރާތުން މިހާރު ފެންނަމުންދާއިރު މިއަހަރުގެ މުބާރާތަކީ ވަކިން ފޯރިގަދަ މުބާރާތެކެވެ.
މުބާރާތުގެ ނިންމުމުގެ ރަސްމިއްޔާތު މާދަމާ ރޭ އޮންނަ އިރު މި މު ބާރާތުގައި ފައިނަލުގައި ގއ ގެމަނަފުއްޓަށް ނިސްބަތްވާ 2 ޓީމް 2 ފައިނަލުގައި ކުޅޭނެއެވެ. ފިރިހެން ޑިވިޝަންގެ އެންމެ ފަހުގެ ޗެމްޕިއަން ޓޮޕް ބްރަދާސް ކުޅޭއިރު، އަންހެން ޑިވިޝަންގެ ފައިނަލުގައި ގެމަނަފުއްޓާއި ދެކޮޅަށް ނިކުންނީ ބޮންބޮން ސްޕޯޓްސް ކުލަބެވެ. ގެމަނަފުށި ވޮލީ ކުލަބަކީ މި މުބާރާތުގެ އެންމެ ކާމިޔާބު ޓީމެވެ.
މުބާރާތުގައި އަންހެން ޑީވިޝަންގެ 4 ޓީމް ބައިވެރިވެފައި ވުމާއިއެކު މި ޑިވިޝަން ކުރިއަށްދާނީ ލީގު އުސޫލުންނެވެ. މުބާރާތުގައި ބައިވެރިވެފައިވާ ޓީމްތަކަކީ އެންމެ ފަހުގެ ގެމަނަފުށި ވޮލީބޯލް ކުލަބު، ގއ މާމެންދޫ ވުމެންސް ޓީމް، ވިލިނގިލީ ޔުނައިޓެޑް ކުލަބު، އަދި ބޮންބޮން ސްޕޯޓްސް ކުލަބެވެ. . އަދި ކޮންމެ ޑިވިޝަނެއްގެ ޗެމްޕިއަން ޓީމަށް 50،000 ( ފަންސާސް ހާސް ) ރުފިޔާގެ އަދި ކޮންމެ ޑިވިޝަނެއްގެ ރަނަރަޕް ޓީމަށް 25،000 (ފަންސަވީސް ހާސް) ރުފިޔާގެ ފައިސާގެ އިނާމް ދިނުމަށްވަނީ ހަމަޖެހިފައެވެ.
އެންމެ ފަހުން ބޭއްވުނު މުބާރާތުގެ އަންހެން ޑިވިޝަންގެ ޗެމްޕިއަން ޓީމަކީ ގއ ގެމަނަފުށީ ވޮލީ ކުލަބެވެ. އަދި ފިރިހެން ޗެމްޕިއަން ޓީމަކީ ގއ ނިލަންދޫ ޓޮޕް ބްރަދާސްއެވެ.
މި މުބާރާތަކީ ހުވަދު އަތޮޅުގައި އެންމެ ޒަމާންވީ އެއްމުބާރާތެވެ. އަދި ރާއްޖޭގައި ފާހަގަކޮށްލެވޭ މޮޅެތި ކުޅުންތެރިން ރާވެރިޔާ މުބާރާތުގައި ކުޅެމުންދެއެވެ. އެގޮތުން މި ފަހަރުގެ މުބާރާތުގައި ރާއްޖޭގެ ގައުމީ ވޮލީ ކުޅުންތެރިން ކަމުގައި ވާ ޝަމާއިލް ،ހުޒާމް، ޝާމިލް، ނިމާލް ( ބުޅިކޭ ) ކުޅޭނެއެވެ. އަދި މީގެ އިތުރުން އަޒީމް ވެސް މި މުބާރާތުގައި ކުޅޭނެއެވެ.
އަންހެން ޑިވިޝަންގައި ވެސް ރާއްޖޭގެ މޮޅު ކުޅުންތެރިންގެ ކުޅުން ފެނިގެން ދާނެއެވެ. މީގެ ތެރޭގައި ރާއްޖޭގެ ގައުމީ އަންހެން ކެޕްޓަން މާޖިދާ، މާޔާ، ހައްވަ، އަދި ރަފާގެ ކުޅުން ފެނިގެން ދާނެއެވެ.