ބޭންކް އޮފް މޯލްޑިވްސް (ބީއެމްއެލް) އިން، ހަނިމާދޫ އިންޓަރނޭޝަނަލް އެއާޕޯޓުގައި ދަތުރުވެރިންނަށް ފަސޭހައިން ޑޮލަރު ލިބޭނެ އިންތިޒާމް ހަމަޖައްސައިފި އެވެ. މިގޮތުން ޑޮލަރު އޭޓީއެމްއަކާއި ޑޮލަރު ދޫކުރާ ޚާއްސަ ކައުންޓަރެއް މިރޭ ވަނީ ގާއިމުކޮށްފަ އެވެ. މި ޚިދުމަތްތައް ރަސްމީކޮށް ފައްޓަވައިދެއްވީ އެއާޕޯޓު ރަސްމީކޮށް ހުޅުވުމަށް ރޭ ބޭއްވި ހާއްސަ ރަސްމިއްޔާތެއްގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެވެ.
މި ޚިދުމަތްތައް ގާއިމުކުރުމުގެ މަގުސަދަކީ ހަނިމާދޫ އިންޓަރނޭޝަނަލް އެއާޕޯޓު ބޭނުންކުރާ ދަތުރުވެރިންނަށް ބޭނުންވާ ފޮރިން ކަރަންސީ ފަސޭހަކަމާއެކު ލިބޭނެ މަގު ފަހިކޮށްދިނުމެވެ. މި އިންތިޒާމާއެކު، އުތުރުގެ ރަށްރަށަށް ދަތުރުކުރާ އަދި އެ ސަރަހައްދުން ދަތުރުފަށާ ފަރާތްތަކަށް ބޭންކިންގެ މުހިންމު ޚިދުމަތްތައް ލިބިގެންދާނެއެވެ.
މިކަމާ ގުޅިގެން ވާހަކަ ދައްކަވަމުން ބީއެމްއެލްގެ ސީއީއޯ އަދި މެނޭޖިންގ ޑިރެކްޓަރ މުޙައްމަދު ޝަރީފް ވިދާޅުވީ، ރާއްޖޭގެ ކޮންމެތާކުންވެސް ބޭންކުގެ ޚިދުމަތްތަކަށް ފަސޭހައިން ވާސިލުވެވޭނެ ވަސީލަތްތައް ގާއިމުކުރުމަށް ބެންކުން ވަރަށް ބޮޑު އިސްކަމެއް ދެއްވާ ކަމަށެވެ. ޝަރީފް އިތުރަށް ވިދާޅުވީ: “ހަނިމާދޫ އިންޓާނޭޝަނަލް އެއާޕޯޓުން ޑޮލަރު ލިބޭނެ އިންތިޒާމު ހަމަޖައްސައިދިނުމަކީ އަޅުގަނޑުމެނަށް ލިބޭ އުފަލެއް. ހަނިމާދޫ އިންޓާނޭޝަނަލް އެއާޕޯޓްގައި ޑޮލަރު ކައުންޓަރާއިއެކު ޑޮލަރު އޭޓީއެމް ވެސް ގާއިމުކުރެވުމުން ހާމަވެގެން ދަނީ އަޅުގަނޑުމެންގެ ކަސްޓަމަރުންނަށް ރާއްޖޭގެ ކޮންމެތާކުންވެސް ބޭންކުގެ ޚިދުމަތްތަކަށް ފަސޭހައިން ވާސިލުވެވޭނެ ވަސީލަތްތައް ގާއިމުކުރުމަށް އަޅުގަނޑުމެން ދޭ އަހުމިއްޔަތުކަން.”
ބީއެމްއެލް އަކީ މުޅި ރާއްޖެ ހިމެނޭ ބޭންކިން ވިއުގަޔަކާއެކު 20 އަތޮޅުގައި 42 ބްރާންޗް، 202 ސެލްފްސާވިސް ބޭންކިން ސެންޓަރު، 262 އޭޓީއެމްގެ ޚިދުމަތް ދެމުން އަންނަ ބޭންކެކެވެ. އެ ބޭންކުގެ އަމާޒަކީ އާންމު ފަރުދުންނާއި ވިޔަފާރިތަކާއި ރާއްޖޭގެ އެކި ކަންކޮޅުތަކުގައިވާ މުޖުތަމައުތަކަށް އެހީތެރިކަން ފޯރުކޮށްދިނުން ކަމަށް ބީއެމްއެލް އިން ބުނެ އެވެ.