ނިލަންދޫ ކައުންސިލުން އިންތިޒާމްކޮށްގެން ބާއްވަމުންދާ ރާވެރިޔާ ވޮލީ މުބާރާތުގެ 2 ޑިވިޝަންގެ ފައިނަލް މެޗު މިއަދު އޮންނަ އިރު މިއީ އެއްގޮތަށް ވުރެ ގިނަ ގޮތް ގޮތުން ހާއްސަ ދުވަހެކެވެ.
މުބާރާތުގެ ފައިނަލް ތަކުގައި ވާދަކުރާ ޓީމްތަކަށް ބަލާއިރު، އަންހެން ޑިވިޝަންގެ ބޮންބޮން ސްޕޯޓްސް ކުލަބަކީ މިދިޔަ އަހަރުގެ މުބާރާތުގެވެސް ފައިނަލްގައި ކުޅުނުޓީމެވެ. ފައިނަލްގައި ބަލިވީވެސް ގެމަނަފުށީ ވޮލީ ކުލަބު އަތުންނެވެ. އެ ފައިނަލްގައި ފަހަތުން އަރައި 3-1 ސެޓުން ކާމިޔާބުކޮށް ތަށި އުފުލާލީ ގެމަނަފުށީ ވޮލީ ކުލަބެވެ.
މިދިޔަ އަހަރު މުބާރާތުގައި އެޓީމް ވަނީ ކުޅުނު ހުރިހާ މެޗެއް ކާމިޔާބު ކޮށްފައެވެ. ހިތްދަތިކޮށް އެ މުބާރާތަށްފަހު ބޮންބޮން މި ފަަހަރުގެ މުބާރާތާއި ކުރިމަތިލީ މުޅިން އާ ހިތްވަރާއި ވަރުގަދަ ޓީމްއަކާއި އެކުއެވެ. ރާއްޖޭގެ އަންހެން އެންމެ ތަޖުރިބާ ކާރު ކުޅުންތެރިޔާ މާޖިދާގެ ލީޑަރުކަމުގައި މި މުބާރާތުގައި ކުޅުނު ހުރިހާ މެޗެއް ވަނީ ކާމިޔާބުކޮށްފައެވެ. މީގެ ތެރޭގައި ގެމަނަފުށި މެޗުވެސް ހިމެނެއެވެ. މި މުބާރާތުގައި ގެމަނަފުށި އަންހެން ވޮލީޓީމް ބަލިވެފައިވަނީ ހަމައެކަނި ބޮން ބޮން އަތުންނެވެ.
ގެމަނަފުށި އަންހެން ވޮލީޓީމާއި ރަށަށް ބޮޑު ދުވަހެއް
ގެމަނަފުށީ އަންހެން ވޮލީ ޓީމް މިހާތަނަށް ހޯދާފައިވާ ކާމިޔާބީތަކަށް ބަލާއިރު 2005 ގައި ބޭއްވި އަތޮޅު ވޮލީ ލީގުގެ ރަނަރަޕްކަމާއި، 2014 ވަނަ އަހަރާއި 2015 ވަނަ އަހަރާއި 2017 ވަނަ އަހަރު ބޭއްވުނު އަތޮޅު ވޮލީ މުބާރާތުގެ ޗެމްޕިއަންކަމާއި، ރާވެރިޔާ ވޮލީ މުބާރާތުގެ 2022 ގެ ޗެމްޕިއަންކަމާއި، ރާވެރިޔާ ވޮލީ މުބާރާތުގެ 2023 ގެ ރަނަރަޕްކަން ފާހަގަކޮށްލެވެއެވެ. މީގެއިތުރުން 2012 ވަނަ އަހަރުގެ ޤައުމީ ވޮލީ މުބާރާތުގެ ޗެމްޕިއަންކަން ޕޮލިސް ކުލަބު ބަލިކޮށް ގެމަނަފުށީ އަންހެންޓީމް ވަނީ ހޯދާފައެވެ.
މީގެ އިތުރުން ގެމަނަފުށި ކައުންސިލުން މިއަރު ބޭއްވި ވޮލީ މުބާރާތުގެ ޗެމްޕިއަންކަން ވެސް ވަނީ ހޯދާފައެވެ. މިއަދަކީ ގެމަނަފުއްޓަށް ބޮޑު ދުވަހަކަށް ނޫނީ ނުވާނެއެވެ. ރަށުން ބޭރުގައި އޮންނަ މުބާރާތެއްގައި ރަށުން ބޭރުގައި ފައިނަލްގައި 2 ޑިވިޝަންގެ ޓީމް ކުޅުން އެއީ ކުޑަކަމެއް ނޫނެވެ. މުޅި ރަށަށް އައި އީދެއް ކަހަލައެވެ. އަނެއްކޮޅުން މި މުބާރާތުގައި ގެމަނަފުށި ފިރިހެން ޓީމް ކުޅުނު މެޗުތަކާއި ދެއްކި ޕާފޯމަންސަށް ބަލާއިރު ފައިނަލް މެޗު ބުރަވެވެނީ ކޮން ޓީމަކަށްކަމެއް ބުނަން ދަތި ވެދާނެއެވެ. މިޓީމުގައި ހިމެނޭ ގައުމީ ޓީމްގެ ކުޅުންތެރިޔާ އަލީ ހުޒާމް( ހުޒަންޓޭ ) އަކީ މި މުބާރާތުގައި އެންމެ މޮޅަށް ކުޅޭ ކުޅުންތެރިޔާ ކަމަށް ގިނަ ބަޔަކު އިއްތިފާގު ވެއެވެ. ހުޒާމްގެ އެންމެ ރަނގަޅު ފޯމުގައި މި މުބާރާތުގައި ދަނީ ކުޅެމުންނެވެ.
ޓޮޕް ބްރަދާސްއަށް އިތުރު ރެކޯޑެއް
މި މުބާރާތުގައި ޓޮޕް ބްރަދާސް ދައްކަމުން ދިޔައީ މުޅިން ތަފާތު މޮޅު ކުޅުމެކެވެ. މިދިޔަ އަހަރުގެ މުބާރާތް ކާމިޔާބުކޮށް ތަށި މިލްކުކުރުމަށް ނިކުތް ބޮންބޮން ސްޕޯޓްސް ކުލަބުގެ މައްޗަށް ކުރި ހޯދައި މިދިޔަ އަހަރުގެ މުބާރާތުގެ ތަށި އުފުލާލީ އެއްވެސް މެޗަކުން ބަލިނުވެއެވެ. އެއާއި އެކު މިފަހަރުގެ މުބާރާތުގެ ފައިނަލާއި ހަމައަށް ޓޮޕް ބްރަދާސް ދަތުރުކުރީވެސް އެއްވެސް މެޗަކުން ބަލި ނުވެ މޮޅު ކުޅުމަކާއިއެކުއެވެ. އަދި ގައުމީ ޓީމްގެ ކުޅުންތެރިޔާ ޝަމާއިލް ގެ ބާރު ހަމަލާތައް ހުޢްޓުވުމުގައި ޓީމްތަކަށް ވަނީ އުނދަގޫތަކެއް ކުރިމަތި ވެފައެވެ.
މުބާރާތައް ނަޒަރެއް
ނިލަންދޫ ރާވެރިޔާ ވޮލީ މުބާރާތަކީ ރާއްޖޭގައި ނަންހިނގާ ބޮޑު މުބާރާތެކެވެ. މިހާތަނަށް މެދުނުކެނޑި ހުވަދޫގައި ބޭއްވި އެންމެ ގިނަދުވަސްވީ އެއް މުބާރާތެވެ. މުބާރާތުގެ އަގާއި ރަށްރަށުގެ ޝައުގުވެރިކަން މި މުބާރާތަށް ލިބުންއެއީ މި މުބާރާތް ކާމިޔާބުވެ ބޮޑު މުބާރާތަކަށް ވުމުގެ އެއް އަސްލެވެ. މުބާރާތުގެ ތައްޔާރީތަކާއި ފެންވަރު ދުވަހެއް ދުވަހަށް ދަނީ ރަނގަޅު ވަމުންކަން ގިނަ ޓީމްތަކުން ދަނީ ފާހަގަ ކުރަމުންނެވެ. މީގެ އިތުރުން މި ފަހަރުގެ މުބާރާތުގެ ހިންގުމާއި ތައްޔާރީތަކަކީ ވަކިން ފާހަގަކޮށްލަން ޖެހޭ ކަމެކެވެ. މުބާރާތުގެ ލައިވް ކުރުންވެސް ވަރަށް ބޮޑުތަން ރަނގަޅެވެ.
އަދި ކޮންމެ ޑިވިޝަނެއްގެ ޗެމްޕިއަން ޓީމަށް 50،000 ( ފަންސާސް ހާސް ) ރުފިޔާގެ އަދި ކޮންމެ ޑިވިޝަނެއްގެ ރަނަރަޕް ޓީމަށް 25،000 (ފަންސަވީސް ހާސް) ރުފިޔާގެ ފައިސާގެ އިނާމް ދިނުމަށްވަނީ ހަމަޖެހިފައެވެ.
އެންމެ ފަހުން ބޭއްވުނު މުބާރާތުގެ އަންހެން ޑިވިޝަންގެ ޗެމްޕިއަން ޓީމަކީ ގއ ގެމަނަފުށީ ވޮލީ ކުލަބެވެ. އަދި ފިރިހެން ޗެމްޕިއަން ޓީމަކީ ގއ ނިލަންދޫ ޓޮޕް ބްރަދާސްއެވެ.
މި މުބާރާތަކީ ހުވަދު އަތޮޅުގައި އެންމެ ޒަމާންވީ އެއްމުބާރާތެވެ. އަދި ރާއްޖޭގައި ފާހަގަކޮށްލެވޭ މޮޅެތި ކުޅުންތެރިން ރާވެރިޔާ މުބާރާތުގައި ކުޅެމުންދެއެވެ. އެގޮތުން މި ފަހަރުގެ މުބާރާތުގައި ރާއްޖޭގެ ގައުމީ ވޮލީ ކުޅުންތެރިން ކަމުގައި ވާ ޝަމާއިލް ،ހުޒާމް، ޝާމިލް، ނިލާމް( ޕާޓޭ) ކުޅޭނެއެވެ. އަދި މީގެ އިތުރުން އަޒީމް ވެސް މި މުބާރާތުގައި ކުޅޭނެއެވެ.
އަންހެން ޑިވިޝަންގައި ވެސް ރާއްޖޭގެ މޮޅު ކުޅުންތެރިންގެ ކުޅުން ފެނިގެން ދާނެއެވެ. މީގެ ތެރޭގައި ރާއްޖޭގެ ގައުމީ އަންހެން ޓީމް ކުޅުންތެރިޔާ މާޖިދާ، އަދި ރަފާގެ ކުޅުން ފެނިގެން ދާނެއެވެ.