މިދިޔަ މަހުގެ 22 ވަނަ ދުވަހު އައްޑޫ ސިޓީ ހިތަދޫގެ ގެއަކުން މަރުވެފައި އޮއްވައި ފެނުނު ދެމަފިރިންގެ މަރުގެ ތަހުގީގަށް ބޭނުންވާ ތަހުލީލީ ރިޕޯޓުތައް އަދިވެސް ނުލިބޭތީ، މަރުވި ސަބަބު މިވަގުތަށް ހާމަކުރެވެން ނެތް ކަމަށް ފުލުހުން މިއަދު ބުނެފިއެވެ. މި ހާދިސާ ހިނގާފައިވަނީ ހިތަދޫގެ ޓޫރިޒަމް ޒޯންގައި ހުންނަ ގެއެއްގެ ތެރެއިންނެވެ.
ފުލުހުން މިއަދު އޮންލައިންކޮށް ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން ވިދާޅުވީ، ހިތަދޫ ގެއެއްގެ ތެރެއިން ފެނުނު (މަރުވެފައި ތިބި) ދެމަފިރިން ކަމަށްވާ "ކުރޭނުގެ" އިބްރާހީމް އަބްދުﷲ (60އ) އާއި "ނާރެސް" ފަރަހަނާޒް ރަޝީދު (52އ) ގެ މަރުގެ މައްސަލަ ވަރަށް ގާތުން ތަހުގީގު ކުރިއަށްދާ ކަމަށެވެ. މި މައްސަލަ ތަހުގީގު ކުރުމުގައި އެހެން ފަރާތެއްގެ އެއްވެސް އަނިޔާވެރި ހަމަލާއެއް ނުވަތަ އިހުމާލެއްގެ ހެއްކެއް މިހާތަނަށް ފެނިފައިނުވާ ކަމަށް ފުލުހުން ބުނެއެވެ.
ސައުތު ރީޖަންގެ ކޮމާންޑަރު، އަހުމަދު ޝަމީމް ވިދާޅުވީ، މަރުވި ދެމަފިރިން ތިބި ގޭގެ ދޮރުތައް ހުރީ ވަރަށް ރަނގަޅަށް ތަޅުލާފައި ކަމަށާއި، އިތުރު ދިމާލަކުން މީހަކަށް އެތެރެއަށް ނުވަދެވޭނެ ގޮތަށް ހުރިކަން ތަހުގީގަށް އެނގިފައިވާ ކަމަށެވެ. އެގޮތުން ފުލުހުން ވެސް އެ ގެއަށް ވަދެފައިވަނީ ވަރަށް ގިނަ މަސައްކަތްތަކެއް ކޮށްގެން ކަމަށް އޭނާ ވިދާޅުވިއެވެ.
ޝަމީމް އިތުރަށް ހާމަކުރެއްވި ގޮތުގައި، މަރުވި ދެމަފިރިންގެ އޮޓޮޕްސީއެއް ހެދުމާމެދު މަޝްވަރާ ކުރެވުނު ނަމަވެސް، އެ ދެމަފިރިން ވަޅުލާފައިވަނީ މިދިޔަ މަހުގެ 25 ވަނަ ދުވަހު އޮޓޮޕްސީއެއް ނުހަދައި ކަމަށެވެ. ތަހުގީގަށް ބޭނުންވާ ސާމްޕަލްތައް ނަގާފައިވީ ނަމަވެސް، ތަހުލީލީ ރިޕޯޓުތައް އަދި ނުލިބޭތީ މަރުވި ސަބަބު ހާމަކުރެވޭކަށް ނެތް ކަމަށް އޭނާ ވިދާޅުވިއެވެ. "އެހެންވީމަ މިވަގުތަށް އަދި މަރުވާން މެދުވެރިވީ ކޮން ސަބަބެއްކަން އަޅުގަނޑުމެންނަށް ހާމަކުރެވޭކަށް ނެތް،" ކޮމާންޑަރު ޝަމީމް ވިދާޅުވިއެވެ.
މި ހާދިސާއާ ގުޅިގެން ގިނަ ބަޔަކު ދަނީ އެކި ވާހަކަތައް ދައްކަމުންނެވެ. އޭގެ ތެރޭގައި، އެ ގޭގައި ބަހައްޓާފައި ހުރި ޖަނަރޭޓަރުން ނުކުތް ދުމުގެ އަސަރުން މަރުވީ ކަމަށް ބެލެވޭ ކަމަށް ބައެއް ފަރާތްތަކުން ބުނެއެވެ. ނަމަވެސް، މަރުގެ ސަބަބު ރަސްމީކޮށް ހާމަކުރެވޭނީ ފުލުހުންގެ ތަހުގީގު ނިމި، ތަހުލީލީ ރިޕޯޓުތައް ލިބުމުންނެވެ.