މާލޭގައި ހުންނަ އެމް.ޕީ.އެލް ޓަވަރެއްގެ އެޕާޓްމަންޓަކުން ގިނަ އަދަދެއްގެ މަސްތުވާތަކެތި ކަމަށް ބެލެވޭ ތަކެތި ފެނުނު މައްސަލައެއް ދިވެހި ފުލުހުންގެ ޚިދުމަތުން ވަނީ ތަހުގީގު ކުރަން ފަށާފައެވެ. މި މައްސަލައަކީ، ފިރިހެނަކަށް އަނިޔާކުރާ އަޑު އިވޭ ކަމަށް ބުނެ ހުށަހެޅުނު ރިޕޯޓަކާ ގުޅިގެން ފުލުހުން އެ އެޕާޓްމަންޓް ބަލައި ފާސްކުރުމުގެ ތެރެއިން ފެނުނު މައްސަލައެކެވެ.
ފުލުހުންގެ މައުލޫމާތު ދެއްވާ ގޮތުގައި، މި ތަކެތި ފެނިފައިވަނީ 2025 ނޮވެމްބަރ 09 ވަނަ ދުވަހުގެ ރޭ ދަންވަރު 01:31 ހާއިރުއެވެ. އެވަގުތު އެޕާޓްމަންޓް ބަލައި ފާސްކުރިއިރު، ވަގުތީ ބަރުދަނުގައި 17.39 ކިލޯ ހުރި މަސްތުވާތަކެތި ކަމަށް ބެލެވޭ ބޮޑު މިންވަރެއްގެ ތަކެތި ވަނީ ފުލުހުންނަށް ފެނިފައެވެ. މި މައްސަލައާ ގުޅިގެން، އެވަގުތު އެޕާޓްމަންޓުގައި ހުރި، ދަފްތަރު. ނަންބަރު ދރ 1786 / މާލެ، މުޙައްމަދު ޖަޒުލާން އަޝްރަފު (29 އަހަރު) ވަނީ ހައްޔަރުކޮށްފައެވެ.
ހައްޔަރުކުރި މުޙައްމަދު ޖަޒުލާން އަޝްރަފުގެ ބަންދާމެދު ގޮތެއް ނިންމުމަށް ކޯޓަށް ހާޒިރުކުރުމުން، ޝަރީއަތް ނިމެންދެން ބަންދުގައި ބެހެއްޓުމަށް ކޯޓުން ވަނީ އަމުރުކޮށްފައެވެ. މަސްތުވާތަކެތީގެ މި މައްސަލަ އިތުރަށް ތަހުގީގު ކުރިއަށް ގެންދަނީ ޑްރަގް އެންފޯސްމަންޓާއި ހުޅުމާލެ ޕޮލިސް ގުޅިގެންނެވެ. މިހާރު ފުލުހުން ދަނީ މި މައްސަލައިގެ ހަގީގަތް ހޯދުމަށްޓަކައި އިތުރު ތަހުގީގުތައް ހިންގަމުންނެވެ.