#UNTGA26 ބައްދަލުވުމުގައި ބައިވެރިވެވަޑައިގަތުމަށް ސަޢޫދީ އަރަބިއްޔާއަށް ކުރެއްވި ރަސްމީ ދަތުރުފުޅެއްގެ ތެރޭގައި، މިނިސްޓަރ ޠާރިޤު އިބްރާހީމް ވަނީ ރިޔާޟްގައި ހުންނަ ދިވެހިރާއްޖޭގެ އެމްބަސީއަށް ޒިޔާރަތްކުރައްވާފައެވެ. މި ޒިޔާރަތުގައި، އެމަނިކުފާނު ވަނީ ސަޢޫދީ އަރަބިއްޔާއަށް ރާއްޖެއިން ކަނޑައަޅުއްވާފައި ހުންނަވާ ސަފީރު އަޙްމަދު ސަރީރާއި، އެމްބަސީގެ މުވައްޒަފުންނާ ބައްދަލުކުރައްވާފައެވެ.
ބައްދަލުކުރެއްވުމުގައި މިނިސްޓަރ ޠާރިޤު ވަނީ ބައިނަލްއަޤްވާމީ ފެންވަރުގައި ދިވެހިރާއްޖޭގެ މަޤްބޫލުކަން އިތުރުކުރުމަށް އެމްބަސީއިން ކުރަމުންދާ މަސައްކަތްތަކަށް ތަޢުރީފުކުރައްވާފައެވެ. އަދި، ޚާއްސަކޮށް ސަޢޫދީ އަރަބިއްޔާގެ ދަތުރުވެރިންނާއި އިންވެސްޓަރުންނާ ހަމައަށް ރާއްޖޭގެ ފަތުރުވެރިކަމާއި އިންވެސްޓްކުރުމުގެ ފުރުސަތުތަކުގެ މަޢުލޫމާތު ފޯރުކޮށްދިނުން އިތުރަށް ހަރުދަނާކުރުމާ ބެހޭގޮތުން ފުޅާ ދެކެވުމެއް ބާއްވާފައިވެއެވެ.
މި މަޝްވަރާތަކުގެ މަޤްޞަދަކީ ސަޢޫދީގެ ބާޒާރުގައި ރާއްޖޭގެ މަޤްބޫލުކަން އިތުރުކޮށް، ދެޤައުމުގެ ގުޅުން އިތުރަށް ބަދަހިކުރުމެވެ. މިނިސްޓަރގެ މި ދަތުރުފުޅަކީ ދިވެހިރާއްޖޭގެ ބޭރުގެ ގުޅުންތަކާއި ފަތުރުވެރިކަން ކުރިއެރުވުމަށް ސަރުކާރުން ދެއްވާ އިސްކަން ރަމްޒުކޮށްދޭ ދަތުރުފުޅެކެވެ.