ނ. މާފަރު އިންޓަނޭޝަނަލް އެއާޕޯޓް އިތުރަށް ތަރައްގީކުރުމުގެ މަސައްކަތް ޗައިނާގެ ކުންފުންޏަކާ ހަވާލުކޮށްފިއެވެ. މި މަސައްކަތް ހަވާލުކުރުމުގެ އެއްބަސްވުމުގައި ސޮއިކޮށްފައިވަނީ މިއަދު ބޭއްވި ރަސްމިއްޔާތެއްގައެވެ. މި އެއްބަސްވުމުގެ ދަށުން މާފަރު އެއާޕޯޓުގެ ޓާމިނަލް ބިލްޑިންގަށް އިތުރުކުރަންޖެހޭ ބައިގެ މަސައްކަތްތަކާއި، އެއާޕޯޓް ތަރައްގީކުރުމުގެ އިތުރު މަސައްކަތްތައް ކުރިއަށް ގެންދާނެއެވެ.
މި އެއްބަސްވުމުގައި އައިލެންޑް އޭވިއޭޝަންގެ ފަރާތުން ސޮއިކުރީ ޗައިނާގެ ހުނާން ނަންބަރު 6 އިންޖިނިއަރިން ކުންފުންޏާއެވެ. އައިލެންޑް އޭވިއޭޝަނުން ހާމަކުރެއްވި ގޮތުގައި، މި މަޝްރޫޢުގެ ދަށުން މާފަރު އެއާޕޯޓްގެ ޓާމިނަލް ބިލްޑިންގަށް ބޭނުންވާ އިތުރުކުރުންތައް ހިމެނޭނެއެވެ. މީގެ އިތުރުން އެ އެއާޕޯޓްގެ ފެންވަރު ރަނގަޅުކުރުމަށް ވެސް އިތުރު މަސައްކަތްތަކެއް ކުރުމަށް ވަނީ ރާވާފައެވެ.
މާފަރު އިންޓަނޭޝަނަލް އެއާޕޯޓް ހުޅުވާފައިވަނީ 2019 ވަނަ އަހަރުގެ ޑިސެމްބަރު މަހުއެވެ. މި އެއާޕޯޓަކީ އަބޫދާބީ ފަންޑް ފޯ ޑިވެލޮޕްމެންޓް (އޭޑީއެފްޑީ) އިން 60 މިލިއަން ޑޮލަރު ޚަރަދުކޮށްގެން ތަރައްގީކޮށްފައިވާ އެއާޕޯޓެކެވެ. މި އެއާޕޯޓް މިހާރު ހިންގަމުން ގެންދަނީ ސަރުކާރުގެ އެއާލައިން ހިންގާ ކުންފުނި ކަމަށްވާ އައިލެންޑް އޭވިއޭޝަނުންނެވެ. މާފަރު އެއާޕޯޓަކީ އޭ320 އާއި ބޮއިން 737 މަރުކާގެ ބޯޓު ފަހަރަށް ވެސް ޖެއްސޭ ފެންވަރުގެ އެއާޕޯޓެކެވެ.
ނ. އަތޮޅަކީ ރާއްޖޭގައި ގުދުރަތީ ގޮތުން އެންމެ ރީތި އެއް އަތޮޅު ކަމަށްވާއިރު، މާފަރު އެއާޕޯޓް އިތުރަށް ތަރައްގީކުރުމުގެ ސަބަބުން މި އަތޮޅުގައި އިންވެސްޓްމަންޓްތަކަށް ފުރުސަތުތައް އިތުރުވެ، އިގްތިޞާދީ ގޮތުން ބޮޑެތި ކުރިއެރުންތަކެއް ލިބިގެންދާނެ ކަމަށް ބެލެވެއެވެ