ހަކުރު ބަލީގެ ސަބަބުން ޞިއްޙީ ގޮތުން ކުރިމަތިވާ ނުރައްކާތައް ކުޑަކުރުމަށްޓަކާ ދުރާލާ ޓެސްޓުކޮށް ޑޮކްޓަރެއްގެ ލަފާ ހޯދުމާއި، ޞިއްޙީ ރަނގަޅު އާދަތަކަށް ސަމާލުވުން މުހިންމުކަމަށް ޞިއްޙީ ވަޒީރު ޢަބްދުﷲ ނާޡިމް އިބްރާހީމް ވިދާޅުވެއްޖެއެވެ. ވަޒީރު މިފަދައިން ވިދާޅުވީ، ހަކުރު ބަލީގެ ދުވަހާ ގުޅިގެން، މިކަމާމެދު އާންމުންގެ ހޭލުންތެރިކަން އިތުރުކުރުމަށް ހެލްތު ޕްރޮޓެކްޝަން އެޖެންސީ (އެޗްޕީއޭ) އާއި ހުޅުމާލޭ ހޮސްޕިޓަލް ގުޅިގެން ކުރިއަށްގެންދިޔަ ހަރަކާތުގެ ތެރެއިން ޕީއެސްއެމް ނިއުސްއަށް ދެއްވި ބަސްދީގަތުމެއްގައެވެ.
ވަޒީރު ޢަބްދުﷲ ނާޡިމް އިބްރާހީމް ފާހަގަކުރެއްވި ގޮތުގައި، ހަކުރު ބައްޔަކީ ރާއްޖެއަށް ވެސް ކުރިމަތިވެފައިވާ ޞިއްޙީ ބޮޑު މައްސަލައެކެވެ. ހަކުރު ބަލީގެ ގިނަ ކަންކަމަކީ ދިރިއުޅުމުގެ ވައްޓަފާޅިއާ ގުޅިފައިވާ ކަންތައްތަކެއްކަން ފާހަގަކުރައްވާ، ދިރިއުޅުމުގެ ކަންކަން ވަކިގޮތަކަށް ބައްޓަންކުރެވިއްޖެނަމަ ހަކުރު ބަލީގެ ސަބަބުން ޞިއްޙީގޮތުން ކުރިމަތިވާ މައްސަލަތައް ކުޑަކުރެވިދާނެކަމަށް ވަޒީރު ވިދާޅުވިއެވެ.
ވަޒީރު ވަނީ ކަސްރަތުކުރުމާއި ކެއުންބުއިމުގެ ރަނގަޅު އާދަތަކަށް އިސްކަންދީގެން، ހަކުރު ބަލިފަދަ ކަންކަމުން ރައްކާތެރިވެ ތިބުމަށް ސަމާލުކަން ދިނުމަށް އިލްތިމާސް ކުރައްވާފަ އެވެ. އަދި ހަކުރު ބައްޔަކީ އޭގެ ސަބަބުން ޞިއްޙީ އިތުރު މައްސަލަތަކަށްވެސް މީހާ ހުށަހެޅިގެންދާ ބައްޔެއްކަމުން، ދުރާލާ ބައްޔަށް ޓެސްޓުކުރެވި، ފަރުވާ ހޯދިއްޖެނަމަ އާންމު މީހެކޭ އެއްފަދައިން ދިރިއުޅުމުގެ ފުރުޞަތު ހަކުރު ބަލީގެ ޕޭޝަންޓުންނަށްވެސް ލިބިގެންދާކަން ވަޒީރު ފާހަގަކުރެއްވިއެވެ.
ވަޒީރު ވިދާޅުވީ، “ދުރާލާ ޓެސްޓުކޮށް، ޑޮކްޓަރެއްގެ ފަރުވާ ހޯދައި، ޑޮކްޓަރެއްގެ ލަފާ ހޯދައި، ގަވާއިދުން ޑޮކްޓަރަށް ދައްކަވާ މިއަށް ބޭސްފަރުވާ ކުރަމުން ގެންދެވިއްޖެނަމަ ހަމަ އާންމު ދިރިއުޅުމުގެ ހާލަތެއްގައި ޑައިބެޓީސް ޕޭޝަންޓަކަށްވެސް އުޅެވިދާނެކަން އެއީ މިއަދު އަޅުގަނޑުމެންނަށް އެނގޭ ކަމެއް. އެހެންވީމަ އަޅުގަނޑުގެ މިއަދުގެ އިލްތިމާސަކީ ގަވާއިދުން ޓެސްޓުކުރައްވާ ޑޮކްޓަރަށް ދައްކަވާ ބޭސް ނަންގަވާ، އަދި ދިރިއުޅުމުގެ އާދަތައް ޞިއްޙީ ރަނގަޅު މިންގަނޑުގެ ތެރޭގައި ހުރިހާ ބޭފުޅުންވެސް ގެންގުޅުއްވުމަށް ސަމާލުކަންދެއްވުން.”
ހަކުރު ބަލީގެ ދުވަސް ފާހަގަކުރުމަށް އެޗްޕީއޭއާއި ހުޅުމާލޭ ހޮސްޕިޓަލް ގުޅިގެން ކުރިއަށްގެންދިޔަ ހަރަކާތުގެ ތެރެއިން ވަނީ ހުޅުމާލޭގެ އެކި ގޭބިސީ ތަކަށް ޒިޔާރަތްކޮށް ހަކުރު ބައްޔާމެދު ހޭލުންތެރިކަން އިތުރުކުރުމަށްޓަކާ ބޭނުންވާ ތަފާތު މަޢުލޫމާތުތައް ފޯރުކޮށްދީފައެވެ. މީގެ ތެރޭގައި ހަކުރު ބަލި ދެނެގަންނާނެ ގޮތާއި، ބަލި ތަޙައްމަލުކުރާ ފަރާތްތަކުންވެސް ސަމާލުވާންވީ ކަންކަމާ ގުޅޭ މަޢުލޫމާތު ހިމެނެއެވެ.
ރާއްޖޭގައި ގައިންގަޔަށް ނާރާ ބަލިތަކުގެ ކަންބޮޑުވުން އިތުރުވަމުން އަންނައިރު ހަކުރު ބައްޔަކީ މިފަދައިން އިތުރު ވަމުންދާ އެއްބައްޔެވެ. ކޮންމެ އަހަރެއްގެ ވެސް ނޮވެންބަރު މަހުގެ 14 ވަނަ ދުވަސް ފާހަގަ ކުރަމުން ދަނީ ހަކުރު ބައްޔާއި މެދު ހޭލުންތެރިކަން އިތުރުކުރުމަށް މަސައްކަތްކުރާ ދުވަހުގެ ގޮތުގައެވެ. ހަކުރުބަލި ތަޙައްމަލުކުރަމުންދާ ފަރާތްތަކުން ހަކުރު ކޮންޓްރޯލްކޮށް ބައްޔާއެކު ރައްކާތެރި ދިރިއުޅުމެއް އުޅުމަށް ވަކިގޮތަކަށް ދިރިއުޅުން ބައްޓަން ކުރަންޖެހެއެވެ. އެގޮތުން ޙާލަތު ދެނެގަތުމަށް، ހަކުރު ކޮންޓްރޯލް ކުރެވިފައިވާކަން ކަށަވަރުކުރުމަށް އަދި ބަލީގެ ސަބަބުން ހަށިގަނޑުގެ ގުނަވަނަކަށް ގެއްލުމެއް ލިބޭތޯ ބެލުމަށް ހަދަންޖެހޭ ޓެސްޓްތައް ހެދުން ހިމެނެއެވެ.